1Maû 10 - ÎVUKU RÎA ÛVORO MWARO

Gûkua kwa Mûthamaki Saûlo

¹ Afilisiti nîmaarûire mbaara na Aisiraeli kîrîmarî Kîam Giliboa. Nao andû eengî a Isiraeli nîmaaûragîrwe na amwe nîmaaûrire wa vamwe na mûthamaki Saûlo.

² Nwatî nîmaakinyîre mûthamaki Saûlo na avîcî ake. Nîmaamanyitire na makîûraga Jonathani, Abinadabu na Malikishua avîcî a Saûlo.

³ Mbaara nîyanenevire mûno gîkundirî kîrîa Saûlo aarî. Andû arîa maavûthagîra moota nîmaaikirie mîguî na Saûlo nîwagurarirue mûno nî mûguî.

⁴ Nake nîwerire mwanake ûrîa wamûkuuagîra indo cia mbaara atîrî, “Comora rûviû rwaku na ûmbûrage, nîguo Afilisiti aya matatîîte Ngai matikanume.” Nwatî mwanake ûcio wamûkuuagîra indo cia mbaara ndaamûraga nîûndû nîwetigagîra mûno. Kwoguo Saûlo nîwacomorire rûviû rwake na akîyûraga naruo.

⁵ Mwanake ûcio rîrîa aamenyire atî Saûlo nîwakua, wanake nîwarutire rûviû rwake na akîyûraga.

⁶ Kwoguo Saûlo na avîcî ake nîmaakwire wa vamwe na andû a mûciî wake onthe.

⁷ Rîrâ ndû a Isiraeli arîa maatûûraga Kîamndarî nîmoonire atî athigari a mbaara nîmaaûra na makîmenya atî Saûlo na avîcî nîmaaûragwa, nîmaaumire matûûrarî mao na makîûra. Afilisiti nîmaacokire magîûka na magîtûûra matûûrarî mau.

⁸ Mûthenya ûcio wîngî Afilisiti nîmaaûkire kûthûgathûga ciimba. Nîmeethîre Saûlo na avîcî ake marî akuû kûu kîrîmarî Kîam Giliboa.

⁹ Nîmaatinirie kîongo gîa Saûlo, na makîmwovora indo ciake cia mbaara. Nîmaatûmire anjaama vûrûrirî wonthe wa Afilisiti makavecane ûvoro ûcio mwaro kûrî ngai ciao na kûrî andû ao.

¹⁰ Nîmaaigire indo ciake cia mbaara hekarûrî ya ngai ciao na nîmaacuririe kîongo gîake hekarûrî ya Dagoni.

¹¹ Nwatî andû arîa maatûûraga Jabeshi vûrûrirî wa Gileadi nîmegwire maûndû monthe marîa Afilisiti meekîte Saûlo.

¹² Kwoguo arûme arîa maarî njamba nîmaathiîre na magîoca mîîrî ya Saûlo na avîcî ake na makîmîreta Jabeshi. Nîmaacokire makîthika mavîndî mao rungu rwa mûtî wa mûvuru kûu Jabeshi na nîmeenyerekirie vandû va mîthenya mûgwanja.

¹³ Saûlo aakwire nîûndû ndaarî mwîvokeku kûrî Ngai-Mûnene. Nîwaregire kwathîkîra watho wa Ngai-Mûnene, na nîwathiîcaga kûria ûtaaro kûrî ago,

¹⁴ vandû va kûria ûtaaro kûrî Ngai-Mûnene. Kwoguo Ngai-Mûnene nîwaûragire Saûlo na akînengera Daudi mûvîcî wa Jesse ûthamaki.