1Joh 5 - ÎVUKU RÎA ÛVORO MWARO

Nîtûvootete nthî

¹ Mûndû wa wonthe wîtîkîtie atî Jesû nîke Mesaya nî mwana wa Ngai, na mûndû wa wonthe wendete mûciari nîwendete wana nginya mwana.

² Tûmenyaga atî nîtwendete ciana cia Ngai na njîra ya kwenda Ngai, na kwathîkîra maathani make.

³ Nîûndû wendo wetû kûrî Ngai nî atî twathîkîre Maathani make na maathani make tî mûrigo kûrî tue.

⁴ Nîûndû mûndû wa wonthe ûciarîtwe nî Ngai nîmûvootu nthî. Tûvootaga nthî na njîra ya wîtîkio.

⁵ Nû ûngîvoota nthî? Nwa ûrîa tu wîtîkîtie atî Jesû nî mwana wa Ngai.

Ûira wîgiî Jesû Kristû

⁶ Jesû Kristû nîke ûrîa waûkire na njîra ya manjî ma ûvatithio na nthakame ya gîkuû gîake. Ke ndaaûka tu na njîra ya manjî nwatî aûkire na manjî na nthakame. Roho ke mwene nî mûira atî ûvoro ûyû nî wa ma nîûndû Roho ûma.

⁷ 8 Kûrî na aira athatû, nao nî;

⁸ Roho, manjî na nthakame; na onthe athatû nîmetîkanagia.

⁹ Nîtwîtîkagia ûira wa andû, nwatî ûira wa Ngai nîwîthagîrwa ûrî na vinya mwîngî. Ngai ke mwene nîarutîte ûira ûyû îgûrû rîgiî Mûriû.

¹⁰ Kwoguo mûndû wa wonthe wîtîkagia Mûriû wa Ngai arî na ûira ûyû ngororî yake. Nwatî mûndû wa wonthe ûtetîkîtie Ngai nî atuîte Ngai wa maveeni, nîûndû mûndû ûcio ndetîkanîtie na ûrîa Ngai augîte ûrî ta ûira wîgiî Mûriû wake.

¹¹ Ûyû nîguo ûira atî: Ngai nîatûvete mwoyo wa tene na tene. Naguo mwoyo ûyû umaga kûrî Mûriû wake.

¹² Mûndû wa wonthe ûrî na Mûriû arî na mwoyo; mûndû wa wonthe ûtarî na Mûriû wa Ngai ndarî na mwoyo.

Mwoyo wa tene na tene

¹³ Mue arîa mwîtîkîtie Mûriû wa Ngai nîramwandîkîra nîguo mûmenye atî mûrî na mwoyo wa tene na tene.

¹⁴ Twîthagîrwa tûrî na ûmîrîru tûrî mbere ya Ngai nîûndû nîtwîcî na ma atî tûngîmwîtia kîndû wa kîonthe kûringana na wendi wake, ke nîatwîgucaga.

¹⁵ Ethîrwa na ma nîtwîcî atî rîrîa twamwîtia kîndû nîatwîgucaga, nîtwîcî atî nîatûvecaga kîrîa kîonthe twamwîtia.

¹⁶ Ûngîona mûndû agîka rîvia rîrîa rîtangîtûma mûndû aûragwe mûvoere, na Ngai nîakaava mûndû ûcio mwoyo. Ûndû ûyû wîkîkaga kûrî andû arîa mekîte wîvia ûtangîtûma makue. Nwatî kûrî na wîvia ûtûmaga mûndû akue. Ndirauga atî mûndû nwa avoe nîûndû wa rîvia rîu.

¹⁷ Gwîka naaî nî mevia, nwatî kûrî wîvia ûtangîtûma mûndû akue.

¹⁸ Nîtwîcî atî gûtirî mwana wa Ngai wîkaraga akîvagia, nîûndû Mûriû wa Ngai nîamûgitagîra, na ûrîa mûcûku ndangîmwîka naaî.

¹⁹ Nîtwîcî atî tûrî a Ngai wana ethîrwa nthî yonthe îrî rungu rwa wathani wa Ûrîa Mûcûku.

²⁰ Tue nîtwîcî atî Mûriû wa Ngai nî mûku na atî nîatûmîte tûtaûkîrwe, nîguo tûmenye Ngai Ûrîa wa ma. Ûtûûro wetû ûrî kûrî Ngai ûrîa wa ma na kûrî Mûriû Jesû Kristû. Ûyû nîke Ngai ûrîa wa ma na nwake mwoyo wa tene na tene.

²¹ Ciana ciakwa, reganani na ngai cia maveeni!