1Joh 4 - ÎVUKU RÎA ÛVORO MWARO

Roho wa ma na wa maveeni

¹ Arata akwa, mûtigetîkagie andû onthe arîa maugaga atî marî na Roho. Nwatî ambagani mûkamaroria waro nîguo mûmenye kana roho ûrîa marî naguo umîte kûrî Ngai nîûndû kûrî na arathi eengî a maveeni meyumîrîtie gûkû nthî.

² Mûkaavotaga gûkûranaga Roho wa Ngai na njîra îno: mûndû wa wonthe umbûraga atî Jesû Kristû aûkire arî na mwîrî ta mûndû, arî na Roho ûrîa umaga kûrî Ngai.

³ Nwatî mûndû wa wonthe ûtaumbûraga Jesû ndarî na Roho ûrîa uumaga kûrî Ngai. Roho ûrîa arî naguo nî ûrîa uumaga kûrî nthû ya Kristû. Nîmwegwire atî nthû îo nîgûka, na rîu nî îrîkîtie gûkinya gûkû nthî.

⁴ Nwatî mue ciana ciakwa mûrî a Ngai, na nîmûvootete arathi a maveeni. Nîûndû Roho ûrîa mûrî naguo ûrî na vinya gûkîra roho ûrîa wîthagîrwa ûrî gûkû nthî.

⁵ Arathi acio a maveeni nî a gûkû nthî, kwoguo maragia maûndû ma gûkû nthî. Nao andû a gûkû nthî nîmamathikagîrîria.

⁶ Nwatî tue tûrî a Ngai. Mûndû wa wonthe wîcî Ngai nîatûthikagîrîria. Mûndû wa wonthe ûtarî wa Ngai ndatûthikagîrîria. Na njîra ta îno nîtûmenyaga Roho wa ma na roho wa maveeni.

Ngai nî wendo

⁷ Arata akwa, nîtwendanageni mûndû na ûrîa wîngî nîûndû wendo umaga kûrî Ngai. Mûndû ûrîa wendanaga nî mwana wa Ngai, na ke nîwîcî Ngai.

⁸ Mûndû wa wonthe ûtendanaga ndecî Ngai, nîûndû Ngai nî wendo.

⁹ Ngai nîwonanirie ûrîa atwendete na njîra îno; ke nîwatûmire Mûrû wake wa mûmwe gûkû nthî nîguo tûgîe mwoyo nîûndû wake.

¹⁰ Wendani wîkariî ûû: tî atî nîkwa twendire Ngai, nwatî nîke watwendire na agîtûma Mûriû wake atuîke wa gûtûma tûoverwe mevia metû.

¹¹ Arata akwa, ethîrwa ûguo nîguo Ngai aatwendire, wanatue nîtwagîrîrwe nî kwendanaga.

¹² Gûtirî mûndû wanona Ngai, nwatî tûngîendana Ngai agatûûraga ndaarî yetû naguo wendo wake ûkethagîrwa ûrî mûkinyanîru ndaarî yetû.

¹³ Ûndû ûrîa tûmenyaga naguo atî Ngai atûûraga ndaarî yetû, natue tûtûûraga ndaarî yake nî atî: ke nîwatûvere Roho wake.

¹⁴ Tue nîtwonete na nîtumbûraga atî Îthe nîwatûmire Mûriû wake atuîke Mûvonokia wa nthî.

¹⁵ Mûndû wa wonthe umbûraga atî Jesû nî Mûriû wa Ngai, Ngai ekaraga ndaarî yake nake ekaraga ndaarî ya Ngai.

¹⁶ Kwoguo tue nîtwîcî na nîtwîtîkîtie wendo ûrîa Ngai atwendete naguo. Ngai nî wendo na mûndû wa wonthe wîkaraga endanîte, ekaraga ndarî ya Ngai nake Ngai ekaraga ndaarî yake.

¹⁷ Gîtûmi Kîam wendo wîthîrwe ûrî mûkinyanîru ndaarî yetû nî atî nîguo tûkaagîa na ûmîrîru rîrîa mûthenya wa gûtuîrwa ûgaakinya. Tûkaagîa na ûmîrîru nîûndû wata ûrîa Kristû eekariî arî gûkû nthî, nwaguo wanatue twîkariî.

¹⁸ Varîa varî na wendani vatirî guoya. Wendani ûrîa mûkinyanîru nîûrutûrûraga guoya wonthe. Kwoguo mûndû ûrîa wîtigagîra ndethagîrwa arî na wendo mûkinyanîru, nîûndû guoya wîthagîrwa ûvuana na îvera.

¹⁹ Tue twendanaga nîûndû Ngai nîwatwendire mbere.

²⁰ Mûndû angiuga atî nîendete Ngai, nwatî ethîrwe nî amenete mûrwang'ina kana mwarwang'ina, ke nî mûthaani. Nîûndû mûndû ûrîa ûtendete mûrwang'ina ûrîa onaga ndangîvota kwenda Ngai ûrîa atonaga.

²¹ Rîîrî nîrîo rîathani rîrîa tûrî narîo kuuma kûrî Kristû atî: mûndû ûrîa wendete Ngai, nwanginya ende mûrwang'ina kana mwarî wa ng'ina wanake.