1Joh 3 - ÎVUKU RÎA ÛVORO MWARO

Ciana cia Ngai

¹ Oneni wendo ûrîa wîngîvîte ûrîa Îthe wetû atwendete naguo atî twîtagwa ciana cia Ngai na nîguo tûrî. Kîrîa gîatûmire nthî yaga gûtûmenya nî atî ndîaicî Ngai.

² Arata akwa, tue rîu tûrî ciana cia Ngai. Gûtiramenyekana waro ûrîa tûkethîrwa twîkariî. Nwatî nîtwîcî atî rîrîa Kristû akoonekana, tûkethîrwa twîkariî take nîûndû tûkaamwona nama ûrîa ekariî.

³ Mûndû wa wonthe wîrîgîrîrîte Kristû nîethagîrwe arî mûtheru wata ûrîa Kristû arî mûtheru.

⁴ Mûndû wa wonthe wîvagia nî areganîte na Watho nîûndû kwîvia nîkûrega Watho wa Ngai.

⁵ Nîmwîcî atî Kristû aaûkire kûthengutia mevia, na atî ndaarî yake gûtirî rîvia.

⁶ Kwoguo mûndû wa wonthe ûtûûraga arî ûrûmwe na Kristû ndevagia nwatî mûndû wa wonthe wîvagia, ndaanamwona na ndamwîcî.

⁷ Ciana ciakwa mûtikanetîkîre kûevenua nî mûndû wana ûrîkû. Mûndû wa wonthe wîkaga maûndû ma ûthingu nî mûthingu wata ûrîa Kristû arî mûthingu.

⁸ Mûndû wa wonthe wîvagia nî wa Ngoma nîûndû Ngoma îtûûraga îvagia kuuma wa Kîammbîrîria. Kîrîa gîatûmire Mûriû wa Ngai aûke, nî gûcûkangia wîra wa Ngoma.

⁹ Gûtirî mwana wana ûmwe wa Ngai ûthiîcaga na mbere kwîvia nîûndû arî na Ûngai. Ke ndevagia nîûndû Ngai nîke Îthe.

¹⁰ Îno nîyo ngûrani îrîa îthagîrwa îrî vo gatagatîrî ga ciana cia Ngai na ciana cia Ngoma. Mûndû wa wonthe ûtekaga ûrîa kwagîrîrîte, tî mwana wa Ngai na andû arîa matendete andû arîa engî tî ciana cia Ngai.

Endanagani mûndû na ûrîa wîngî

¹¹ Ndûmîrîri îrîa mwegwire kuuma wa Kîammbîrîria nî îno: nwanginya twendanage.

¹² Tûtiagîrîrwe nî kwîthîrwa twîkariî ta Kaini ûrîa warî wa Ûrîa Mûcûku, na waûragire mûrwang'ina, Abili. Kaini aaûragire mûrwang'ina nîkî? Aamûragire nîûndû ciîko irîa ke eekaga ciarî njûku, nwatî cia mûrwang'ina Abili ciarî mbaro.

¹³ Ariû na aarî a îthe wetû, mûtikamake andû a gûkû nthî mangîmûmena.

¹⁴ Nîtwîcî atî nîtûthengutîrîtue gîkuû na tûgakinya mwoyorî nîûndû nîtwendete ariû na aarî a îthe wetû. Mûndû ûrîa ûtendanaga atûûraga gîkuûrî.

¹⁵ Mûndû wa wonthe ûmenete mûrwang'ina nî mûragani na nîmwîcî atî gûtirî mûragani wîthagîrwa arî na mwoyo wa tene na tene ndaarî yake.

¹⁶ Ûndû ûrîa ûtûmenyithagia ûrîa wendo wîkariî, nî ûyû: atî Kristû nîwarutire mwoyo wake nîûndû wetû. Tue natue nîtwagîrîrwe nî kûruta mîoyo yetû nîûndû wa ariû na aarî a îthe wetû.

¹⁷ Mûndû angîthîrwa nî mûtongu na one mûrwang'ina kana mwarwang'ina arî na thîna nwatî arege kûmwîguîra ntha, mûndû ûcio nwa ethîrwe endete Ngai?

¹⁸ Ciana ciakwa wendani wetû ndûgatuîke wa kanyua tu, nwatî nîwîthagîrwe ûrî wa ciîko na ûrî wa ma.

Ûmîrîru mbere ya Ngai

¹⁹ Ûndû ûyû nîguo ûgaatûmenyithagia atî tûrî a ma, na atî twîthagîrwa tûtarî na nganja ngororî cietû tûrî mbere ya Ngai.

²⁰ Ethîrwa thamiri cietû nîitûtucagîra, nîtwîcî waro atî Ngai nî Mûnene gûkîra thamiri cietû na nîecî maûndû monthe.

²¹ Kwoguo arata akwa, ethîrwa thamiri cietû itiratûtuîra tûkethagîrwa tûrî na ûmîrîru tûrî mbere ya Ngai.

²² Ngai nîatûvecaga kîndû wa kîonthe kîrîa twamwîtia nîûndû nîtûrûmagîrîra maathani make na nîtwîkaga maûndû marîa mamûkenagia.

²³ Narîo rîathani rîake nî atî; nwa nginya twîtîkie Mûriû wake Jesû Kristû na twendanage mûndû na ûrîa wîngî ta ûrîa Kristû aatwathire.

²⁴ Arîa onthe mathîkagîra maathani ma Ngai matûûraga marî ûûrûmwe na Ngai nake Ngai atûûraga arî ûûrûmwe nao. Tûmenyaga atî Ngai atûûraga arî ûrûmwe natue nîûndû wa Roho ûrîa atûvete.