1Joh 2 - ÎVUKU RÎA ÛVORO MWARO

Kristû mûtethia wetû

¹ Ciana ciakwa nîramwandîkîra maûndû mama nîguo mûtikevie. Nwatî mûndû angîvia, tûrî na Jesû Kristû na nî mûthingu. Ke nîke ûtûciragîrîra arî mbere ya îthe.

² Kristû ke mwene nîke ûtûmaga twoverwe mevia metû, na twa mevie metû tu, nwatî nî wana mevia ma andû onthe.

³ Ethîrwa nwa twathîkîre maathani ma Ngai nwa twîthîrwe tûrî na ûma atî nîtûmûmenyete.

⁴ Mûndû ûrîa ugaga atî nîamwîcî na ndathîkagîra maathani make nî mûthaani na ndaarî yake gûtirî na ûma.

⁵ Nwatî mûndû ûrîa wathîkagîra kiugo gîake nîethagîrwa na ma ecûrîtwe nî wendo wa Ngai. Tûngîvota kûmenya tûrî ngwatanîro na Ngai na njîra ta îno:

⁶ arîa maugaga atî matûûraga marî ngwatanîro na Ngai magîrîrwe nî gûtûûra ta ûrîa Jesû Kristû aatûûraga.

Rîathani rîcerû

⁷ Arata akwa rîathani rîrîa nîramwandîkîra tî rîcerû, nwatî nî rîrîa rîkûrû mûtûûraga narîo. Rîathani rîu rîkûrû nî ndûmîrîri îrîa mwegwire kuuma wa Kîammbîrîria.

⁸ Nwatî nîramwandîkîra rîathani rîcerû na Mesaya nîwonanîtie atî ûndû ûcio nî wa ma na wanamue nîmwonanîtie wa guo. Nîûndû nduma nî îrathira, naguo ûtheri ûrîa wa ma nî ûramûrîka.

⁹ Mûndû wa wonthe ugaga atî ke arî ûtherirî na nîamenaga aa mwarwang'ina na aa mûrwang'ina, ethagîrwa arî ndumarî wata mbere.

¹⁰ Mûndû wa wonthe wendete mûrwang'ina na mwarwang'ina ekaraga ûtherirî na ndarî ûndû ûngîtûma mûndû wîngî evie.

¹¹ Nwatî mûndû wa wonthe ûmenete mûrwang'ina, kana mwarwang'ina ethagîrwa arî ndumarî. Ke athiîcagîra ndumarî na ndamenyaga kûrîa athiîte nîûndû nduma nî îmûtete metho.

¹² Nîramwandîkîra mue ciana ciakwa, nîûndû mûrî overe mevia menyu nîûndû wa ûrîa Kristû eekire.

¹³ Nîramwandîkîra mue andû akûrû, nîûndû nîmwîcî ûrîa ûtûûraga mwoyo kuuma wa Kîammbîrîria. Nîramwandîkîra mue andû ethî, nîûndû nîmûvootete Ûrîa Mûcûku. Nîramwandîkîra mue ciana ciakwa, nîûndû nîmwîcî Îthe wetû.

¹⁴ Nîramwandîkîra mue andû akûrû nîûndû nîmwîcî ûrîa watûûraga kuuma wa Kîammbîrîria. Nîramwandîkîra mue andû ethî nîûndû mûrî na vinya na Kiugo Kîam Ngai nîgîtûûraga ndaarî yenyu wana nîmûvootete ûrîa mûcûku.

¹⁵ Mûtikende nthî kana indo irîa ciîthagîrwa irî kuo. Mûndû ûrîa wendete nthî, ndethagîrwa endete îthe wetû.

¹⁶ Indo cionthe cia nthî ta, merirîria macûku ma mwîrî, merirîria ma indo njûku irîa twonaga, wana kana mwîtîîo nîûndû wa indo cia gûkû nthî matiîthagîrwa maumîte kûrî îthe wetû, nî ma nthî.

¹⁷ Nthî na indo cionthe irîa irî kuo, irîa ciîriragîrua nî andû nîirathira. Nwatî mûndû ûrîa wîkaga wendi wa Ngai atûûraga tene na tene.

Nthû ya Kristû

¹⁸ Ciana ciakwa, rîîrî nîrîo îvinda rîa mûthiia! Mue nîmwîguîte atî nthû ya Kristû nîgûka; na rîu nîkûgîte na nthû nyîngî cia Kristû. Kwoguo nîtûmenyete atî rîîrî nîrîo îvinda rîa mûthiia.

¹⁹ Andû aya nama matiarî a gîkundi gîetû, kwoguo nîmaatûtigire. Maangîethîrwe marî a gîkundi gîetû nîmangîekaranirie natue. Nwatî nîmaatûtigire nîguo kûonekane waro atî matiarî etû.

²⁰ Nwatî mue mûrî etîrîrie Roho Mûtheru nî Kristû, kwoguo mue muonthe nîmûmenyete ûma.

²¹ Nîramwandîkîra tî nîûndû atî mûtiîcî ûma, nwatî nîramwandîkîra nîûndû nîmwîcî ûma, na nîmwîcî atî gûtirî ûthaani varîa varî ûma.

²² Nû vi ûveenanagia? Nî ûrîa ûregaga atî Jesû tîke Mesaya. Mûndû ûyû nîke nthû ya Kristû na nîmûreganu na Îthe na Mûriû.

²³ Mûndû wa wonthe ûregete Mûriû nîaregete wana nginya îthe. Mûndû wa wonthe wîtîkîrîte Mûriû nîetîkîrîte îthe wanake.

²⁴ Tigani ûvoro ûrîa mwegwire kuuma Kîammbîrîria wîkare ngororî cienyu. Ethîrwa ûvoro ûcio ûgekaraga ndaarî yenyu vîndî cionthe, mue nîmûgûtûûra mûrî ûrûmwe na Mûriû na Îthe.

²⁵ Kîveo kîrîa Kristû aatwîrîre nî mwoyo wa tene na tene.

²⁶ Nîramwandîkîra ûvoro wîgiî andû arîa marageria kûmûvîtithia.

²⁷ Nwatî mue nîmûvetwe Roho mûtheru nî Kristû. Kîveo kîu nîkîo mûtûûraga nakîo, kwoguo gûtirî na vata wa kûthomithua nî mûndû, nîûndû Roho wake amûthomithagia maûndû monthe na maûndû marîa athomithagia nî ma ma, na tî ma maveeni. Thiîni na mbere kwathîkîra ûrîa Roho aramûthomithia na mwîkarage mûrî ûrûmwe na Kristû.

²⁸ Na rîu twana twakwa, îkarani ndaarî yake nîguo vîndî îrîa agaaûka, tûkethîrwa tûrî na ûmîrîru, nîguo tûtikegue nthoni tûrî mbere yake mûthenya ûrîa agaaûka.

²⁹ Ethîrwa nîmwîcî atî Kristû nî mûthingu, nîmwagîrîrwe nî kûmenya atî mûndû wonthe wîkaga maûndû ma ûthingu nî mwana wa Ngai.