1Atha 9 - ÎVUKU RÎA ÛVORO MWARO

Ngai nîwaumîrîre Solomoni rîngî

¹ Rîrîa mûthamaki Solomoni aarîkirie gûtumîra Ngai-Mûnene hekarû, na gûtuma mûciî wa mûthamaki, vamwe na kûvingia maûndû monthe marîa eendaga gwîka,

² Ngai-Mûnene nîwamumîrîre rîngî, wata ûrîa aamumîrîrîte arî Gibeoni.

³ Ngai-Mûnene nîwerire Solomoni atîrî, “Nîmbîguîte îvoya rîaku wana îthaithana rîaku. Nînamûra nyomba îno ûndumîrîte nîguo ndûûre ngoocagîrwa kuo tene na tene. Nîndûûra nîmîgitîrîte na nîmîmenyererete vîndî cionthe.

⁴ Ethîrwa ûkaandungatagîra ûrî na wîvokeku na ûthingu ta ûrîa aguo Daudi eekaga, na ûvingagie mawatho makwa na maûndû monthe marîa ngwathîte,

⁵ nîngaatûma gîtî gîaku Kîam ûthamaki kîîvande kûu Isiraeli tene na tene ta ûrîa nerîre aguo Daudi rîrîa naamwîrire atî, ‘gûtigaatura mûndû kuuma nyomba yaku wa gwîkarîra gîtî Kîam ûthamaki wa Isiraeli.’

⁶ Nwatî ethîrwa mue kana njiarwa cienyu nî mûkaarega kûnûmîrîra kana mûrege kwathîkîra mawatho makwa na irîra cia watho wakwa ûrîa nîmûvete, na mûgooce ngai ciîngî,

⁷ nîngaaruta andû akwa a Isiraeli kuuma vûrûrirî ûrîa namaveere. Nîngaacoka ndiganîrie hekarû îno nyamûrîte îgatuîka yakwa ya kûngoocagîra, nao Aisiraeli nîmakaavûthua na manyararwe nî andû a ndûrîrî cionthe.

⁸ Wana ethîrwa nyomba îno îrî na ngumo ûguo, nîîkomomorwa, na mûndû wa wonthe ûkaavîtûkîrîra vo nîakaamaka na aciive akîûragia atîrî, ‘Ngai-Mûnene eekire vûrûri ûyû vamwe na hekarû îno ûguo nîkî?’

⁹ Nao andû nîmakaamacokeria atîrî, ‘Nîûndû nîmaatiganîrie Ngai-Mûnene, Ngai wao, ûrîa warutire methe mao ma tene vûrûrirî wa Misiri, na makîrûmîrîra ngai ciîngî na makîigooca na magîitungatîra. Ngai-Mûnene nîwamaretere mathîna mama monthe.’ ”

Maûndû marîa Solomoni na Hiramu meetîkanîrie

¹⁰ Solomoni aatumire hekarû vamwe na nyomba yake kwa îvinda rîa mîaka mîrongo îîrî.

¹¹ Mûthamaki Hiramu wa Turo nîwavete Solomoni mbaû cionthe cia mîtarakwe na cia mîthithinda vamwe na thaavu cionthe irîa eendaga nîûndû wa wîra ûcio. Kwoguo Solomoni nîwacokire akîva Hiramu matûûra mîrongo îîrî vûrûrirî wa Galili.

¹² Hiramu nîwacokire akîuma Turo na akîthiî kwona matûûra marîa aaveerwe nî Solomoni, nwatî ndaakenua nîmo.

¹³ Kwoguo Hiramu nîwaûririe Solomoni atîrî, “Mûrwaiya, nî matûûra ma mûthemba ûrîkû mama ûmvete?” Kwoguo matûûra mau metagwa Kabuli nginya ûmûnthî.

¹⁴ Hiramu nîwatûmanîrîte mûthamaki Solomoni makîria ya kilo ngiri inya (4,000) cia thaavu.

Maûndû mengî marîa Solomoni eekire

¹⁵ Mûthamaki Solomoni nîwarutithagia andû wîra wa gûtuma hekarû vamwe na nyomba yake na vinya, na gwîcûria mûthetu mwena wa îrathîro wa îtûûra rîa Jerusalemu na gûtuma rîngî matûûra ma Hazoru, Megido na Gezeri.

¹⁶ (Mûthamaki wa Misiri, nîwatharîkîrîte îtûûra rîa Gezeri, akarîtava, akaûraga Akanaani arîa maatûûraga kuo na akavîvia îtûûra rîu. Nîwacokete akavecana îtûûra rîu rûrî rûracio kûrî mwarî ûrîa wavikîtue nî Solomoni.

¹⁷ Kwoguo Solomoni nîwatumire îtûûra rîa Gezeri rîngî). Nîwacokire agîtuma Bethi Horoni ya mwena wa ngurumo,

¹⁸ Baalathu, na Tamarû îtûûra rîrîa rîrî werûrî wa Juda,

¹⁹ vamwe na matûûra monthe kûrîa Solomoni aaigaga indo ciake, matûûra marîa maaigagwa ikaari ciake cia mbaara, matûûra ma andû ake arîa maathiîcaga matûîte mbarathi, na kîrîa kîonthe Solomoni eendaga gûtuma kûu Jerusalemu, wana kûu Lebanoni na vûrûrirî wonthe ûrîa aathanaga.

²⁰ Andû onthe a Amori, Ahiti, Aperizi, Ahivi, na Ajebusi arîa mataaûragwa na mataarî Aisiraeli

²¹ vamwe na njiarwa ciao irîa ciatigarire vûrûrirî wa Kanaani irîa andû a Isiraeli mataavota kûthiria viû nîmaarutithagua wîra na vinya nî Solomoni, na nwaguo matwîre nginya ûmûnthî.

²² Nwatî Solomoni ndaatua andû a Isiraeli ngombo; aamatwire athigari a mbaara, ndungata ciake, anene ake, atongoria a athigari a mbaara, amûrithia a ikaari ciake cia mbaara, na andû ake arîa maathiîcaga matûîte mbarathi.

²³ Kwarî na andû magana matano ma mîrongo îtano (550) arîa maarî arûngamîrîri a andû arîa maarutithagua wîra na vinya kûrîa wîra wa Solomoni warutagwa.

²⁴ Nwatî mwarî wa mûthamaki wa Misiri nîwaumire îtûûrarî rîa Daudi na akîthiî nyombarî yake îrîa Solomoni aamûtumîrîte; nake Solomoni nîwacokire agîcûria mûthetu mwena wa îrathîro wa îtûûra rîa Jerusalemu.

²⁵ Solomoni nîwarutagîra matega ma kûvîvua na ma thayû metharî ya kîgongoona îrîa aatumîrîte Ngai-Mûnene maita mathatû wa mwaka. Nwa wavîvagîria Ngai-Mûnene ûbani. Ûguo nîguo aarîkirie gûtuma hekarû.

²⁶ Mûthamaki Solomoni nîwacokire agîtuma meri nyîngî kûu Ezioni-geberi, vakuvî na Elothi, rûtererî rwa Îria Îtune, kûu vûrûrirî wa Edomu.

²⁷ Mûthamaki Hiramu nîwatûmire ndungata ciake irîa ciarî na ûûgî wa kûthiîra îriarî nîguo ikarutage wîra vamwe na ndungata cia Solomoni.

²⁸ Nao nîmaathiîre na magîkinya vûrûrirî wa Ofiri, na magîcoka na thaavu makîria ya kilo ngiri îkûmi na inya (14,000) na makîvirîra mûthamaki Solomoni.