1Atha 8 - ÎVUKU RÎA ÛVORO MWARO

Îthandûkû rîa kîrîkanîro nîrîaretirwe hekarûrî

¹ Mûthamaki Solomoni nîwacokire agîta athuuri onthe a Isiraeli na atongoria onthe a mîvîrîga na atongoria a mbarî cia andû a Isiraeli mathiî kûrî ke kûu Jerusalemu nîguo magakuue îthandûkû rîa Kîrîkanîro Kîam Ngai-Mûnene kuuma Zayuni, îtûûra rînene rîa Daudi marîvire hekarûrî.

² Nao onthe nîmaaûnganire kîrugorî kwa mûthamaki Solomoni mwerirî wa Ethanimu, nîguo mweri wa mûgwanja.

³ Rîrîa atongoria onthe maaûnganire vamwe, athînjîri-Ngai nîmaakuuire îthandûkû rîa kîrîkanîro Kîam Ngai-Mûnene

⁴ na makîrîvira hekarûrî. Alawi na athînjîri-Ngai nîmaakuuire Îgema rîa Ngai-Mûnene na indo irîa nyamûre ciarî îgemarî na makîivira hekarûrî.

⁵ Mûthamaki Solomoni na andû onthe a Isiraeli arîa maaûnganîte varî ke nîmaathiîre mbere ya îthandûkû rîa kîrîkanîro na makîruta îgongoona rîa ng'ondu na ndegwa nyîngî ûndû itangîatarîkire.

⁶ Athînjîri-Ngai nîmaacokire magîkuua îthandûkû rîa kîrîkanîro na makîrigîrîra vandû varîa vatheru Mûno rungu rwa akerubi.

⁷ Mathagu ma akerubi maatambarûkîte magakunîkîra îthandûkû rîa kîrîkanîro vamwe na itugî irîa ciarîkuuîte.

⁸ Itugî icio itingîonirwe nî mûndû arûngamîte vandû vengî tiga arûngamîte mbere ya vandû varîa vatheru Mûno. Itugî icio irî vo nginya ûmûnthî.

⁹ Gûtiarî kîndû ndaarî ya îthandûkû rîa kîrîkanîro tiga ivengere igîrî cia mathiga irîa Musa eekîrire kuo arî Horebu. Musa aaciîkîrire kuo rîrîa Ngai-Mûnene aarûthire kîrîkanîro na andû a Isiraeli rîrîa maaumaga vûrûrirî wa Misiri.

¹⁰ Rîrîa athînjîri-Ngai maaumaga vandû varîa vatheru, îtu nîrîecûrire kûu hekarûrî wa rîmwe.

¹¹ Kwoguo athînjîri-Ngai matingîavotire kûthiî na mbere kûruta wîra nîûndû wa îtu, nîûndû riiri wa Ngai-Mûnene nîwecûrîte hekarûrî.

¹² Solomoni nîwacokire akîvoya atîrî, “We Ngai-Mûnene waigire riûa îgûrû, nwatî wendire gûtûûra ndumarî îno ndumanu.

¹³ Rîu nîngûtumîrîte hekarû nene, nîguo îtuîke vandû vaku va gûtûûra tene na tene.”

Solomoni nîwarîrie andû

¹⁴ Mûthamaki Solomoni nîwagarûrûkîre andû onthe a Isiraeli marûngamîte na akîmarathima.

¹⁵ Nîwaugire atîrî, “Ngai-Mûnene, Ngai wa Isiraeli arogoocwa. Nîûndû na vinya wake nîavingîtie kîîranîro kîrîa eerîre vava Daudi rîrîa aaugire atî,

¹⁶ ‘Kuuma rîrîa naarutire andû akwa Aisiraeli vûrûrirî wa Misiri, ndianathuura îtûûra wanarî rîmwe mîvîrîgarî yonthe ya Isiraeli varîa nîngîatumîrwe hekarû nîguo ngoocagîrwe vo. Nwatî nînathuurire Daudi nîguo atongorie andû akwa Aisiraeli.’ ”

¹⁷ Solomoni nîwathiîre na mbere kuga atîrî, “Vava Daudi nîwendeete gûtumîra Ngai-Mûnene, Ngai wa Isiraeli hekarû nîguo agoocagîrwe kuo,

¹⁸ nwatî Ngai-Mûnene nîwamwîrire atî, ‘Wana ethîrwa nîwendeete kûndumîra hekarû, nîwekire waro nîûndû wa gwîciiria ûguo,

¹⁹ nwatî we tîwe ûkaandumîra hekarû. Mûvîcîguo ûrîa ûgaaciara nîke ûkaandumîra hekarû.’

²⁰ “Rîu Ngai-Mûnene nîavingîtie kîîranîro gîake; nîûndû nînatuîkire mûthamaki wa Isiraeli vuva wa vava Daudi wata ûrîa Ngai-Mûnene eeranîre, na nîndumîrîte Ngai-Mûnene, Ngai wa Isiraeli hekarû nîguo agoocagîrwe vo.

²¹ Nîndumîte vandû va kwiga îthandûkû rîa kîrîkanîro Kîam Ngai-Mûnene. Kîrîkanîro kîu nîkîo Ngai-Mûnene aarûthire na methe metû rîrîa aamarutire vûrûrirî wa Misiri.”

Îvoya rîa Solomoni

²² Solomoni nîwacokire akîrûngama mbere ya metha ya kîgongoona ya Ngai-Mûnene andû onthe a Isiraeli marî vo, akîambararia njara ciake na îgûrû,

²³ na akiuga atîrî, “Ngai-Mûnene, Ngai wa Isiraeli, gûtirî Ngai wîngî tawe îgûrû kana gûkû nthî! Nîûvingagia kîrîkanîro gîaku na andû aku na nîûmoonagia wendo ûtathiraga rîrîa matûûra makwîvokete.

²⁴ Nîûvingîtie kîîranîro kîrîa werîre vava Daudi. Maûndû marîa waririe na kanyua gaku ûmûnthî nîûmavingîtie na vinya waku.

²⁵ Kwoguo we Ngai-Mûnene, Ngai wa Isiraeli, rîu vingia kîîranîro kîrîa werîre vava Daudi rîrîa wamwîrire atî, ‘vîndî cionthe gûkethagîrwa kûrî na mûndû wa njiarwa ciaku ûkethagîrwa arî mûthamaki wa Isiraeli, ethîrwa mûkambathîkagîra wata ûrîa aakwathîkagîra.’

²⁶ Kwoguo we Ngai-Mûnene, Ngai wa Isiraeli, rîu tiga maûndû marîa werire vava Daudi, ndungata yaku mavinge.

²⁷ “Nwatî we Ngai nama nwa ûtûûre gûkû nthî? Taroria, kûu îgûrû wana îgûrû mûno ndûngîganîra; ûngîganîra hekarûrî îno ngûtumîrîte atîa?

²⁸ Ngai-Mûnene, Ngai wakwa, thikîrîria mavoya na mathaithana makwa marîa nie ndungata yaku nîrakûthaitha namo ûmûnthî.

²⁹ Menyagîrîra hekarû îno ûtukû na mûthenya. Vandû ava nîwe wathuurire nîguo ûgoocagîrwe vo. Thikagîrîria mavoya makwa vîndî îrîa ngûvoya nîrî hekarûrî îno.

³⁰ Thikagîrîria mavoya makwa vamwe na mavoya ma andû aku vîndî îrîa magûkûvoya marî hekarûrî îno. Tûthikîrîrie na ûtûovere ûrî îgûrû kûu ûtûûraga.

³¹ “Ethîrwa mûndû nîakaavîtîria mûndû ûrîa wîngî na avirwe metharî ya kîgongoona hekarûrî îno yaku na evîtithue.

³² We Ngai-Mûnene nakûthaitha ûkaathikîrîria na ûgaatuithania ndungata ciaku ûrî kûu îgûrû. Ûkaaverithia mûndû ûrîa mwîvia wata ûrîa kwagîrîrîte, nake mûndû ûrîa mûthingu ûgaatûma agîe na maûndû maringanîte na ûthingu wake.

³³ “Vîndî îrîa andû aku Aisiraeli mangîkaavootwa nî nthû ciao nîûndû wa kwîthîrwa makûvîtîrîtie, na macoke magûcokerere na maûke hekarûrî îno na makûvoye na wînyivia nîguo ûmovere,

³⁴ nakûthaitha ûkaamathikîrîria ûrî kûu îgûrû. Ûkoovera andû aku Aisiraeli mevia mau na ûkaamacokia vûrûrirî ûrîa waveere methe mao.

³⁵ “Vîndî îrîa ûkaagiria mbura yure nîûndû wa ûrîa andû aku makeethîrwa makûvîtîrîtie, na macoke merire na makûvoye marî na wînyivia marî hekarûrî îno,

³⁶ nakûthaitha ûkaamathikîrîria ûrî kûu îgûrû. Ûkoovera andû aku a Isiraeli mevia mao, na ûkaamathomithia mîtugo mîaro îrîa magîrîrwe nî kûrûmîrîra. Ûcoke urithie mbura vûrûrirî waku ûrîa waveere andû aku rîrî îgai rîao.

³⁷ “Vûrûri ûyû ûngîkaagîa yûra kana mûrimû mûcûku, kana ndavaîki kana ikundi cia ngige kana mûgariû, kana andû aku matharîkîrwe nî nthû ciao, kana kûgîe na mûthiro kana mûrimû gatagatîrî kao,

³⁸ ûkaathikîrîria mavoya mao. Mûndû wa wonthe kana andû aku a Isiraeli mangîgaakûthaitha wa mûndû atambarûkîtie njara ciake erekerete hekarûrî îno nîûndû wa kwîgua kîeva ngororî ciao,

³⁹ nakûthaitha ûkaathikîrîria mavoya mao ûrî kûu ûtûûraga îgûrû, ûkaamovera na ûmatethie. Na nîûndû we wenga nîwe wîcî ngoro ya mûndû, îka wa mûndû kûringana na ûrîa ûkoona kwagîrîrîte,

⁴⁰ nîguo andû aku magwîtigagîre vîndî cionthe rîrîa magûtûûra vûrûrirî ûrîa waveere methe metû.

⁴¹ “Na njîra wata îo mûgeni ûtarî wa andû aku a Isiraeli angîûka kuuma vûrûri wa kûraca nîûndû wa rîîtwa rîaku,

⁴² (nîûndû andû a mavûrûri mengî nîmakegua ngumo ya rîîtwa rîaku, vinya na ûvoti) mûndû ûcio angîgaaûka gûkûvoya arî hekarûrî îno,

⁴³ nakûthaitha ûkaamûthikîrîria ûrî îgûrû kûrîa ûtûûraga na ûkaamûvingîria ûrîa agaakûûria, nîguo andû onthe a gûkû nthî makûmenye na makwathîkîre ta ûrîa andû aku a Isiraeli mekaga. Nîmagaacoka mamenye atî nyomba îno ndumîte îtanîtue na rîîtwa rîaku.

⁴⁴ “Rîrîa ûkaatha andû aku mathiî makarûe na nthû ciao na makûvoye marî wa kûrîa kuonthe makethîrwa marî, merekerete îtûûra rîîrî we ûthuurîte vamwe na hekarû îno îtanîtue nawe,

⁴⁵ nakûthaitha ûkaathikîrîria mavoya mao ûrî kûu îgûrû na ûkaamava ûvootani.

⁴⁶ “Andû aku mangîgakwîvîria (nîûndû gûtirî mûndû ûtevagia) nawe ûtûmbwe nî marûrû na ûmarekererie kûrî nthû ciao imavoote na imatave marî mîgwate na imavire vûrûrirî wacio, ûrî kûraca kana gûkuvî;

⁴⁷ mangîkeerira marî kûu vûrûrirî ûcio maavirirwe matavwa na makûvoye makiumbûraga ûrîa marî evia na marî aganu, nakûthaitha Ngai-Mûnene ûkaathikîrîria mavoya mao.

⁴⁸ Ethîrwa nîmagaagûcokerera na meciria mao monthe, vamwe na ngoro yonthe marî wa kûu vûrûrirî wa nthû icio ciamatavire, na makûvoye merekerete vûrûri ûyû wao ûrîa waveere methe mao, na îtûûra rîîrî we wathuurire, na hekarû îno ndumîte îtanîtue na rîîtwa rîaku,

⁴⁹ nakûthaitha vîndî îo ûkaathikîrîria mavoya mao ûrî kûu îgûrû kûrîa ûtûûraga na ûkaamava ûvootani.

⁵⁰ Ûkoovera andû aku mevia monthe marîa makethîrwa makwîvîtie vamwe na mavîtia monthe marîa makethîrwa makûvîtîrîtie namo, na ûgarûre ngoro cia nthû ciao irîa ciamatavire nîguo nthû icio imeguîre ntha.

⁵¹ Acio nî andû aku, na nî îgai rîaku, arîa warutire Misiri, kûrîa kwaviûvîte ta mwaki wa kûrarûra cuuma.

⁵² “Ngai-Mûnene, thikîrîria mathaithana makwa nie ndungata yaku, vamwe na mathaithana ma andû aku a Isiraeli na wîgucage mavoya mao vîndî îrîa yonthe magaakûvoyaga.

⁵³ We nîwe wamathuurire kuuma kûrî andû onthe a gûkû nthî nîguo matuîke îgai rîaku, wata ûrîa waririe na njîra ya Musa, ndungata yaku rîrîa we Mwathani, Ngai-Mûnene warutire methe metû Misiri.”

Îvoya rîa Mûthiia

⁵⁴ Solomoni arîkia kûvoya Ngai-Mûnene, nîwaûkîrire vau mbere ya metha ya kîgongoona varîa aaturîtie maru ambararîtie njara na îgûrû.

⁵⁵ Nîwarûngamire na akîrathima andû onthe a Isiraeli arîa maaûnganîte vau na mûgambo mûnene akiugaga atîrî,

⁵⁶ “Ngai-Mûnene arokumua, ûcio ûveete andû ake a Isiraeli thayû wata ûrîa aameerîre. Nîavingîtie ciîranîro ciake cionthe mbaro irîa eeranîre na njîra ya ndungata yake Musa.

⁵⁷ Ngai-Mûnene, Ngai wetû aroekara natue, wata ûrîa eekaraga na methe metû ma tene; na ndagatûtige kana ariganîrwa nî tue.

⁵⁸ Arotûma tûmwathîkagîre, nîguo tûrûmagîrîre njîra ciake cionthe na tûvingagie maathani make na irîra ciake na watho wake ûrîa aathire methe metû.

⁵⁹ Ngai-Mûnene, Ngai wetû aroririkanaga vîndî cionthe ivoya rîîrî na mathaithana mama namûthaitha namo, nîguo amenyagîrîre ndungata yake vamwe na andû ake a Isiraeli, kûringana na mavataro mao ma wa mûthenya.

⁶⁰ Kwoguo andû onthe a gûkû nthî nîmakaamenya atî Ngai-Mûnene wenga nîke Ngai; na gûtirî wîngî take.

⁶¹ Mue andû ake mûrotuîka evokeku kûrî Ngai-Mûnene, Ngai wetû vîndî cionthe, mûkîathîkagîra mawatho make na kûrûmîrîra irîra cia watho wake wata ûrîa mwîkaga nginya rîu.”

Kwamûrwa gwa hekarû

⁶² Mûthamaki Solomoni na andû onthe a Isiraeli arîa maarî vau nîmaacokire makîrutîra Ngai-Mûnene kîgongoona.

⁶³ Solomoni nîwarutire ndegwa ngiri mîrongo îîrî na igîrî na ng'ondu ngiri îgana rîmwe rîa mîrongo îîrî irî matega ma thayû. Ûguo nîguo mûthamaki vamwe na andû onthe a Isiraeli maamûrire hekarû.

⁶⁴ Mûthenya wa ûcio mûthamaki nîwamûrire gatagatî ga kîvaro kîrîa Kîamrî mbere ya hekarû, agîcoka akîrutîra matega ma kûvîvua, matega ma irio na maguta ma matega ma thayû vo. Eekire ûguo nîûndû metha ya kîgongoona ya gîcango îrîa yatumîrîtwe Ngai-Mûnene yarî nini mûno ya kûvîvîrua matega mau monthe.

⁶⁵ Solomoni na andû onthe a Isiraeli nîmaakûngûîre kîrugo îvinda rîa mîthenya mûgwanja. Kwarî na andû eengî arîa maaûkîte kuuma mwanyarî wa Hamathi mwena wa rûgûrû nginya karûnjîrî ka Misiri mwena wa îveti.

⁶⁶ Mûthenyarî wa kanana, Solomoni nîwerire andû menûke. Nao nîmaaugîre mûthamaki ûvoro na makînûka kwao mîciî makenete na makîgucaga waro ngororî ciao nîûndû wa maûndû monthe maro marîa Ngai-Mûnene eekîte Daudi ndungata yake, vamwe na andû ake a Isiraeli.