1Atha 7 - ÎVUKU RÎA ÛVORO MWARO

Nyomba ya Solomoni

¹ Solomoni nîwatumire nyomba yake na îvinda rîa mîaka îkûmi na îthatû na akîmîrîkia.

² Nîwatumire nyomba nene yetagwa, nyomba ya mûtitû wa Lebanoni. Nyomba îo yarî na ûraca wa mita mîrongo îna na inya, wariî wa mita mîrongo îîrî na igîrî, na ûraca na îgûrû wa mita îkûmi na ithatû na nuthu. Yarî na mîvari îthatû ya itugî cia mîtarakwe, na mbaû ndiku cia mîtarakwe cigîrîrîtwe îgûrû rîa itugî icio.

³ Nyomba îo yanyitîrîrîtwe nî itugî mîrongo îna na ithano. Yarî na mîvari îthatû, wa mûvari ûrî na itugî îkûmi na ithano. Kûu îgûrû rîa itugî icio kwanyitithanîtue na mîtî mîriku ya mîtarakwe. Îtara rîa nyomba îo rîakunîkîtwe na mbaû cia mîtarakwe.

⁴ Nthingorî igîrî cia mîena kwarî na mîvari îthatû ya ndirica. Ndirica icio ciekîrîtwe cierekanîrîte.

⁵ Mîromo yonthe na ndirica ciatumîtwe na mbaû inya ciîganene, nayo mîvari îo îthatû ya ndirica yerekanîrîte.

⁶ Nîwatumire nyomba na itugî. Nyomba îo yarî na ûraca wa mita mîrongo îrî na igîrî na wariî wa mita îkûmi na ithatû na nuthu. Nîwatumire kîthaku Kîam nyomba îo kînyitîrîrîtwe na itugî.

⁷ Nîwacokire agîtuma nyomba ya Gîtî Kîam ûthamaki kûrîa aatwithanagîria ciira. Nyomba îo yetagwa Nyomba ya kîvooto. Nyomba îo yonthe yatumîtwe na mîtî ya mîtarakwe kuuma nthî nginya îgûrû.

⁸ Nyomba yake ya gûtûûra yatumîtwe vuva wa nyomba ya gûtwithanîria ciira na yatumîtwe vuva wayo vandû varaca. Solomoni nîwacokire agîtumîra mwarî wa mûthamaki wa Misiri, ûrîa aavikîtie nyomba wata îo.

⁹ Nyomba icio cionthe ciatumîtwe na mathiga ma goro maumîtue kûringana na kîthimi na maatinîtue waro na mîcumano mwena wa mbere na wa vuva. Mathiga mau maatumîte nyomba îo kuuma mûcingi nginya îgûrû na nwamo maatumîte nja ya mûciî wa mûthamaki vamwe na hekarû.

¹⁰ Mûcingi wa nyomba îo watumîtwe na mathiga manene na ma goro. Mamwe mamo maarî na ûraca wa mita ithatû na nuthu namo mengî marî na ûraca wa mita inya na nuthu.

¹¹ Îgûrû rîa mathiga mau ma mûcingi kwarî na mathiga ma goro matinîtue meganene, vamwe na mbaû cia mîtarakwe.

¹² Kîvaro kîrîa kînene Kîam nyomba ya mûthamaki Kîamthiûrûrûkîrîtue na mîvari îthatû ya mathiga maumîtue, na mûvari ûmwe wa mbaû ndiku cia mîtarakwe. Ûguo nwaguo kîvaro Kîam ndarî ya hekarû, na kîthaku Kîam hekarû gîatumîtwe.

Wara wa Hiramu wîrarî wake

¹³ Mûthamaki Solomoni nîwatûmanire Hiramu agîrwe kuuma îtûûrarî rîa Turo.

¹⁴ Ng'ina wa Hiramu aarî mûndûmûka wa ndigwa kuuma mûvîrîgarî wa Nafutali. Nake îthe aarî wa kuuma Turo, na aarutaga wîra wa indo cia gîcango. Hiramu aarî wara mwîngî mûno na aarî na ûmenyo na wara wa kûrûtha mîthemba wa yonthe ya indo cia gîcango. Nîwathiîre kûrî mûthamaki Solomoni na akîruta wîra wake wonthe.

Itugî igîrî cia gîcango

¹⁵ Hiramu nîwatumire itugî igîrî cia gîcango. Wa gîtugî Kîamrî na ûraca na îgûrû wa mita inyanya na mûthiûrûrûko wa mita ithano na cendimita mîrongo îthatû. Ndaarî ya itugî icio kwarî na îrima rîa wariî wa mita igîrî.

¹⁶ Nîwacokire akîrûtha ikunîko igîrî cia gîcango na agîcigîrîra îgûrû rîa itugî icio. Wa kîmwe gîa ikunîko icio Kîamrî na ûraca wa mita igîrî na cendimita mîrongo îîrî.

¹⁷ Nîwacokire akîrûtha inyamû itumanîtue ta neti igemetue na tûnyamû twîkariî ta mîkanda ya nyororo yokothanîtue cia gwîkîra ikunîkorî cia itugî icio. Wa gîkunîko gîekagîrwa inyamû mûgwanja

¹⁸ na mîvari îîrî ya mîvuano ya ngûngûmanga cia gîcango.

¹⁹ Ikunîko icio ciarî îgûrû rîa itugî ciekariî ta tûmîtî tûrîa tûraaga maûa marîa mathaka. Wa kamwe ga tûmîtî tûu kaarî ka ûraca na îgûrû wa mita îmwe na cendimita mîrongo înana.

²⁰ Ikunîko icio ciarî îgûrû rîa itugî cioîrî ciarî na tûnyamû twa kîthiûrûrû tumîrîte vakuvî na inyamû icio ciatumîtwe ta neti. Kwarî na ngûngûmanga magana maîrî ithiûrûrûkîrîtie wa gîtugî.

²¹ Hiramu nîwarûngamirie itugî icio cia gîcango kîthakurî Kîam hekarû: Gîtugî kîrîa Kîamrûngamirue mwena wa îveti gîetirwe Jakini, nakîo kîrîa Kîamrûngamirue mwena wa rûgûrû gîetirwe Boazu

²² Itugî cia gîcango irîa ciekariî ta maûa mathaka ciarî îgûrû rîa itugî icio. Ûguo nîguo wîra wa gûtuma itugî wathirire.

Îtangi rîa Gîcango

²³ Hiramu nîwatumire îtangi rîa gîcango rîa kîthiûrûrû rîa ûrikîru wa mita igîrî na cendimita mîrongo îîrî, Wariî wa mita inya na cendimita mîrongo îîrî, na mûthiûrûrûko wa mita îkûmi na ithatû na cendimita mîrongo îîrî.

²⁴ Rungu rwa rûrengo rwa îtangi rîu mwena wa nja kwathiûrûrûkîrîtue na mîvari îîrî ya tûnya twa gîcango înyitanîte na îtangi.

²⁵ Îtangi rîu rîaigîrîrîtwe îgûrû rîa mîvuanano îkûmi na îîrî ya ndegwa cia gîcango îrîa yavuvatanîrîte. Ithatû ciacio ciaroretie mwena wa rûgûrû, ithatû mwena wa îthûîro, ithatû mwena wa îveti, na ithatû mwena wa îrathîro.

²⁶ Mîena ya îtangi rîu yarî na ûriku wa milimita mîrongo mûgwanja na ithano (75 mm). Rûrengo rwarîo rwekariî ta rûrengo rwa gîkombe na rwekûnjîte na mwena wa nja ta makoni ma maûa mathaka. Îtangi rîu rîeganagîra lita ngiri igîrî cia manjî.

Ikaari cia gîcango

²⁷ Hiramu nîwacokire akîrûtha ikaari îkûmi cia gîcango. Wa gîkaari Kîamrî na ûraca wa mita îmwe na cendimita mîrongo înana, wariî wa mita îmwe na cendimita mîrongo înana, na ûraca na îgûrû wa mita îmwe na cendimita mîrongo îthatû.

²⁸ Ikaari icio ciarûthîtwe na cuuma na gatagatî ga cuuma icio kwarî na mbaû.

²⁹ Cuumarî icio kwarî na mîvano ya mînyambû, ndegwa na akerubi. Vau mbaûrî icio îgûrû rîa mînyambû na ndegwa kwarî na mînyamû îkûnjîtwe ithiûrûrû îcunjurîte.

³⁰ Wa gîkaari Kîamrî na nthugû inya cia gîcango inyitithanîtue na mîcuma ya gîcango. Mîthiiarî îna ya mîcuma îo kwarî na mîcuma ya kûinyitîrîra. Wa mûthiiarî ûmwe kwarî na mînyamû îkûnjîtwe ithiûrûrû îcunjurîte.

³¹ Mûromo wa gîkaari warî na vandû vaaumîrîte na îgûrû. Ûraca wa vo warî wa nuthu mita. Naguo mwena wa nja wa mûromo wagemetue na mîvuanano. Nacio icuuma ciakîo ciarûthîtwe irî cia mîena îna îganene, nwatî itiarî cia ithiûrûrû.

³² Nthugû wa cio inya ciarî rungu rwa icuuma, nayo mîcuma îrîa yainyitithanîtie yanyitanîte na gîkaari. Ûraca na îgûrû wa nthugû icio warî wa cendimita mîrongo îtandatû na ithathatû (66).

³³ Nthugû ciarûthîtwe ta cia gîkaari Kîam mbarathi: mîcuma ya kûinyitithania, ring'i, mîcuma ya ring'i, na ikombe cia ring'i ciarûthîtwe na gîcango cionthe.

³⁴ Rungu rwa mîthiia îna wa ya gîkaari kwarî na icuuma inya cia kûnyitîrîra. Icuuma icio cianyitanîte na gîkaari.

³⁵ Îgûrû rîa wa gîkaari kwathiûrûrûkîtue nî mûcivi wî na wariî wa cendimita mîrongo îîrî na igîrî (22). Mbaû irîa cianyitîrîrîte mûcivi ûcio wa vamwe na mbaû irîa mbariî cianyitanîte vamwe.

³⁶ Mbaûrî icio njeke na icio mbariî ciagemetue na mîvuano ya akerubi, mînyambû na mîtî ya mîkîndû varîa vaavotaga kûgemekia na mîvuano ya mîkanda yokothanîtue îrî mîena yonthe.

³⁷ Ûguo nîguo ikaari cionthe ciatumîtwe. Cionthe nî cieganene, nî ciavuanene, na ciarûthîtwe na cuuma ya gîcango.

³⁸ Hiramu nîwacokire akîrûtha iraî îkûmi cia gîcango. Wa kîraî Kîamrî gîtûmîrwe nî gîkaari kîmwe. Wa kîraî Kîamrî na wariî wa mita îmwe na cendimita mîrongo înana na Kîamgîcaga mwîgana ta wa lita magana manana.

³⁹ Nîwacokire akiga ikaari ithano mwena wa îveti wa hekarû na icio ciîngî ithano agîciga mwena wa rûgûrû wa hekarû. Nîwaigire îtangi mûthiiarî wa mwena wa îrathîro kwerekera mwena wa îveti wa hekarû.

Mûtaratara wa indo irîa ciarî hekarûrî

⁴⁰ Hiramu nîwacokire akîrûtha nyûngû, iciko cia gûtava na mbakûri. Kwoguo Hiramu nîwarîkirie wîra ûcio wonthe aarutagîra Solomoni wa kûmûrûthîra hekarû. Indo icio aarûthire ciarî;

⁴¹ itugî igîrî, ikunîko igîrî cia gûkunîkîra itugî, neti igîrî cia gûkunîkîra ikunîko icio,

⁴² mîvuanano magana mana ya ngûngûmanga cia gîcango irî mîvari îîrî cia gûtumîrîrwa netirî irî cia kûgemia ikunîko cia itugî,

⁴³ ikaari îkûmi na iraî îkûmi,

⁴⁴ îtangi rigîrîrîtwe îgûrû rîa mîvuanano îkûmi na îîrî ya ndegwa,

⁴⁵ nyûngû, iciko cia gûtava na mbakûri. Indo icio cionthe cia hekarû irîa Hiramu aarûthîre Solomoni ciarî cia gîcango îrî ntherie.

⁴⁶ Mûthamaki Solomoni aarûthithîrie indo icio Jorodani kûndû kûrîa kwaraganu kwarî na mûthetu wa yûmba gatagatîrî ga Sukothu na Zarethani.

⁴⁷ Solomoni ndaathima ûrito wa indo icio cionthe cia gîcango, nîûndû ciarî nyîngî mûno. Kwoguo ûrito wacio ndwamenyekana.

⁴⁸ Solomoni nîwarûthire indo cionthe irîa ciarî hekarûrî na thaavu, nacio ciarî: metha ya kîgongoona, metha îrîa yaigagîrîrwa mîgate îrîa yarutagîrwa Ngai-Mûnene,

⁴⁹ mînyamû îkûmi ya thaavu ya kwigîrîrwa taa, îtano mwena wa îveti na îtano mwena wa rûgûrû mbere ya vandû varîa vatheru Mûno, maûa, taa na tûgwati twa ndambi,

⁵⁰ ikombe, tûnyamû twa kûnyitîrîra ndambi, mbakûri, mbakûri cia ûbani, tûraî twa gûkuua makara marî na mwaki, na irenji cia mîrango ya vandû varîa vatheru Mûno na cia mîrango ya nja ya hekarû.

⁵¹ Rîrîa Solomoni aarîkirie wîra wonthe wa hekarû, nîwekîrire kuo indo irîa îthe Daudi aamûrîrîte Ngai-Mûnene. Nacio ciarî: sîlûva, thaavu, na indo irîa ciîngî cionthe. Nîwacigire mûthithûrî wa indo cia hekarû.