1Atha 6 - ÎVUKU RÎA ÛVORO MWARO

Solomoni nîwatumire hekarû

¹ Solomoni nîwambîrîrie gûtuma hekarû mweri wa Zivu, nîguo mweri wa kaîrî, mwakarî wa kana kuuma Solomoni atuîka mûthamaki wa Isiraeli. Vîndî îo yarî mîaka magana mana ma mîrongo înana (480) kuuma andû a Isiraeli mauma vûrûri wa Misiri.

² Nyomba îo mûthamaki Solomoni aatumîre Ngai-Mûnene yarî na ûraca na mwena wa mita mîrongo îîrî na mûgwanja, wariî wa mita kenda, na ûraca na îgûrû wa mita îkûmi na ithatû na nuthu.

³ Kîthaku kîrîa Kîamrî vau mbere ya vandû varîa vatheru Mûno va nyomba îo Kîamrî na ûraca na îgûrû wa mita inya na nuthu na wariî wa mita kenda, wata ûrîa wariî wa hekarû wegana.

⁴ Ndirica cia hekarû îo ciarî njeke mwena wa nja gûkîra mwena wa ndaarî.

⁵ Nîwacokire agîtuma tûnyomba tûthiûrûrûkîrîtie mîena yoîrî ya hekarû îo wana Varîa Vatheru Mûno.

⁶ Nyomba cia ngorova ya nthî ciarî na wariî wa mita igîrî na inji igîrî wa îmwe yacio; nyomba cia ngorova ya gatagatî ciarî na wariî wa mita igîrî na inji mûgwanja wa îmwe yacio; nacio nyomba cia ngorova ya îgûrû ciarî na wariî wa mita ithatû na inji îmwe wa îmwe yacio. Mwena wa nja wa rûthingo rwa hekarû îo aarûtumire agîtigaga kîthaku Kîam gûcoka kwigîrîrwa mbaû irîa ndiku cia mwako wa tûnyomba tûu nîguo itigatonye ndarî ya hekarû.

⁷ Mathiga marîa maatumaga hekarû maathondekeretwe kwarerî nîguo gûtikeguîke înegene rîa nyondo, îthanwa kana kîndû wa kîonthe gîa cuuma hekarû îgîtumwa.

⁸ Mûromo wa gûtonya tûnyombarî tûu twa nja twa ngorova ya mbere warî mwena wa îveti wa hekarû. Nakuo kwarî ngathî yathiîcaga tûnyombarî twa ngorova ya gatagatî na ya kathatû.

⁹ Kwoguo mûthamaki Solomoni nîwatumire hekarû na akîmîrîkia. Nîwacokire akîmimba na mbaû ndiku cia mîtarakwe.

¹⁰ Tûnyomba tûu twarî mîenarî yonthe ya nthingo cia hekarû twarî na ûraca na îgûrû wa mita igîrî na inji mîrongo îîrî na twanyitithanîtue kûrî hekarû na mbaû cia mîtarakwe.

¹¹ Ngai-Mûnene nîwerire Solomoni atîrî,

¹² “Ûvoro wîgiî nyomba îno ûratuma, ethîrwa ûkarûmagîrîra kîrîra gîakwa na wathîkagîre maathani makwa monthe na ûvingagie ûrîa maugîte, nîngaakûvingîria ûrîa neerîîre aguo Daudi.

¹³ Nîngaatûûrania na andû akwa Aisiraeli na ndikaamatiganîria.”

¹⁴ Kwoguo Solomoni nîwatumire hekarû na akîmîrîkia.

Ûrîa kanyomba ka ndaarî karîkirue

¹⁵ Mîena ya ndaarî ya nthingo cia hekarû nîciakunîkirwe na mbaû cia mîtarakwe kuuma nthî nginya îtara. Nakuo kûu nthî ya hekarû nîgwakunîkirwe na mbaû cia mîvondo.

¹⁶ Ndaarî ya hekarû mwena wa vuva, Solomoni nîwatumire kanyomba nîguo gatuîke vandû varîa vatheru Mûno. Kanyomba kau kaarî na ûraca wa mita kenda na kagaanîtue na mbaû cia mîtarakwe kuuma nthî nyinya îgûrû.

¹⁷ Nayo nyomba îrîa yarî mwena wa mbere wa vandû varîa vatheru Mûno yarî na ûraca wa mita îkûmi na inyanya.

¹⁸ Ndaarî ya hekarû kwathiûrûrûkîrîtue na mbaû cia mîtarakwe ciacîtwe mîvuano ya matunda ma maage na maûa marî matumûku. Ndaarî kuonthe gwakunîkîtwe na mbaû cia mîtarakwe na gûtiarî na îthiga wanarî rîmwe rîonekaga.

¹⁹ Kûu ndaarî ya hekarû vandû varîa Vatheru Mûno, Solomoni nîwarûthire vandû va kwiga îthandûkû rîa kîrîkanîro Kîam Ngai-Mûnene.

²⁰ Kanyomba kau ka ndaarî kaarî na ûraca wa mita kenda, wariî wa mita kenda, na ûraca na îgûrû wa mita kenda. Kaavakîtwe thaavu kûndû kuonthe. Nayo metha ya kîgongoona yatumîtwe na mbaû cia mîtarakwe.

²¹ Ndaarî ya hekarû kwavakîtwe thaavu, na mîkathî ya thaavu yaigîtwe îkîranîtie mbere ya kanyomba ka ndaarî. Nako kanyomba kau kaavakîtwe thaavu.

²² Ndaarî ya hekarû kuonthe kwavakîtwe thaavu wana metha ya kîgongoona îrîa yarî vandû varîa vatheru Mûno ciavakîtwe thaavu.

²³ Solomoni nîwarûthire mîvuanano îîrî ya Akerubi ya mbaû cia mîtamaiyû îrîa îciaraga matunda na akîmiga vandû varîa vatheru Mûno. Wa mûvuanano ûmwe warî na ûraca na îgûrû wa mita inya na cendimita mîrongo îîrî.

²⁴ Îthagu rîmwe rîa Kerubi wa mbere rîarî na ûraca wa mita igîrî na cendimita mîrongo îîrî, narîo rîu rîngî rîarî na ûraca wata ûcio. Kwoguo kuuma mûthiia wa îthagu rîmwe kûthiî mûthiia wa îthagu rîu rîngî vaarî na wariî wa mita inya na cendimita mîrongo îna.

²⁵ Kerubi wa kaîrî eegana wata wa mbere na meekariî ûndû ûmwe.

²⁶ Ûraca na îgûrû wa kerubi wa ûmwe warî mita igîrî na cendimita mîrongo îîrî.

²⁷ Solomoni nîwaigire mîvuanano îo ndaarî ya vandû varîa vatheru Mûno. Namo mathagu ma yo nîmaatambarûkîte. Îthagu rîmwe rîa kerubi ûmwe rîavutîtie rûthingo rwa mwena ûmwe, narîo îthagu rîmwe rîa kerubi ûcio wîngî rîavutîtie rûthingo rwa mwena ûcio wîngî. Mathagu mau mengî ma akerubi wa oîrî maavutanîrîtie gatagatî ka hekarû.

²⁸ Akerubi acio maavakîtwe thaavu.

²⁹ Nthingo cionthe cia hekarû na cia vandû varîa vatheru Mûno ciagemetue na mîvuano ya Akerubi yacîtwe, mîtî ya mîkîndû na maûa marî matumûku.

³⁰ Kûu nthî nyombarî cia ndaarî na cia nja kwavakîtwe thaavu.

³¹ Solomoni nîwacokire agîtuma mîrango îîrî ya mûtî wa mûtamaiyû na akîvinga mûromo wa vandû varîa vatheru Mûno nayo. Mbaû cia kûrûngamia mîrango îo vamwe na mîkîgo yarî na mwanya wa mîena îtano.

³² Mîrango îo îîrî yagemetue na mîvuanano ya akerubi, mîtî ya mîkîndû na maûa marî matumûku. Mîrango, akerubi, na mîtî ya mîkîndû ciavakîtwe thaavu kuonthe.

³³ Naguo mûromo wa gûtonya hekarûrî watumîtwe na mbaû cia mûtî wa mûtamaiyû na warî na mîena îna yeganene.

³⁴ Kwarî na mîrango îîrî yatumîtwe na mbaû cia mîtî ya mîvondo. Wa mûrango nîwakûnjagwa vamwe.

³⁵ Mîrango îo yagemetue na mîvuanano ya akerubi, mîtî ya mîkîndû, na maûa marî matumûku. Indo icio ciavakîtwe thaavu ûndû ûmwe.

³⁶ Nîwatumire nja ya kanyomba ka ndaarî na mathiga maumie maiganîrîrîtwe mîvari îthatû na mûvari ûmwe wa mbaû ndiku cia mîtarakwe.

³⁷ Mwakarî wa îna mweri wa kaîrî (Zivu) nîrîo mûcingi wa hekarû îo watumirwe.

³⁸ Mwakarî wa îkûmi na ûmwe mwerirî wa kanana (buli) vîndî ya wathani wa Solomoni nîrîo hekarû yarîkirie gûtumwa wata ûrîa mûvuanîre wayo wonthe wekariî. Solomoni aamîtumire na îvinda rîa mîaka mûgwanja.