1Atha 5 - ÎVUKU RÎA ÛVORO MWARO

Solomoni nîwevarîrie gûtuma hekarû

¹ Hiramu mûthamaki wa Turo nîwatûmire ndungata ciake kûrî Solomoni rîrîa eegwire atî andû nîmaathuurîte Solomoni atuîke mûthamaki vuva wa îthe Daudi. Ekire ûguo nîûndû aatûûrîte endete Solomoni.

² Solomoni nîwatûmire andû kûrî Hiramu makamwîre atîrî,

³ “Nîwicî atî vava Daudi ndangîavotire gûtumîra Ngai-Mûnene, Ngai wake hekarû nîûndû wa mbaara irîa aarûaga na nthû irîa ciamûthiûrûrûkîrîtie nginya rîrîa Ngai-Mûnene aamûvotithirie kûvoota nthû ciake.

⁴ Nwatî Ngai-Mûnene, Ngai wakwa nîatwîguithanîtie na andû onthe arîa tûvakanîte nao. Ndirî na nthû na ndirî na thîna wana ûrîkû.

⁵ Kwoguo rîu nîrenda gûtumîra Ngai-Mûnene, Ngai wakwa hekarû, wata ûrîa Ngai-Mûnene eerîre vava Daudi atî, ‘Mûvîcîguo, ûrîa ngeekarîria gîtî Kîam ûthamaki vuva waku nîke ûkandumîra hekarû.’

⁶ Kwoguo tûma ndungata ciaku ithiî Lebanoni ikandemere mîtarakwe. Ndungata ciakwa ikagwatanîra na ndungata ciaku, na ngaakûrîva mûcara wa ndungata ciaku wa ûrîa ûgaatua. We nîwicî atî gûtirî mûndû gatagatîrî getû wîcî gûtema mîtî ta andû a Sidoni.”

⁷ Rîrîa Hiramu eegwire ndûmîrîri ya Solomoni nîwakenire mûno na akiuga atîrî, “Ngai-Mûnene arogoocwa ûmûnthî nîûndû wa kûva Daudi mûvîcî ûrî na ûûgî nîguo atuîke mûthamaki wa vûrûri ûcio mûnene ûguo vuva wake!”

⁸ Nîwacokire agîtûmana kûrî Solomoni akiuga atîrî, “Nînegua ndûmîrîri yaku na nîngwîka ûguo wambîra. Nîngûgûtemera mîtarakwe wana mîvondo.

⁹ Ndungata ciakwa nîikaanyûrûrûkia mîtî îo kuuma Lebanoni nginya îriarî, na nîngaamîovania na nîmikie îriarî înyûrûrûkue nî manjî nginya varîa ûkwenda njoke nîmîovorere vo. Nawe ûcoke ûmve irio cia kûrîwa nî andû a nyomba yakwa.”

¹⁰ Kwoguo Hiramu nîwavirîre Solomoni mîtî ya mîtarakwe na ya mîvondo îrîa eendaga,

¹¹ nake Solomoni nîwavere Hiramu kilo ngiri mîrongo îîrî (20,000) cia ngano, na lita ngiri magana mana (400,000) cia maguta ma mîtamaiyû îrîa cia kûrîwa nî andû a nyomba yake. Solomoni eekaga ûguo wa mwaka wa mwaka.

¹² Ngai-Mûnene nîwavere Solomoni ûûgî wata ûrîa aamwîrîîre. Kwarî na thayû gatagatî ka Hiramu na Solomoni, nao oîrî nîmaarûthire kîrîkanîro.

¹³ Mûthamaki Solomoni nîwaûnganirie andû ngiri mîrongo îthatû (30,000) kûu Isiraeli kuonthe arîa maarutithagua wîra wa vinya,

¹⁴ na agîtua Adoniramu mûnene wao. Nîwamagaanirie ikundi ithatû cia andû ngiri îkûmi (10,000), na wa gîkundi gîekaraga kûu Lebanoni îvinda rîa mweri ûmwe na îvinda rîa mîeri îîrî mûciî kwao.

¹⁵ Solomoni wana aarî na arûme engî ngiri mîrongo mûgwanja (70,000) a gûkuua mîrigo na arûme ngiri mîrongo înana (80,000) arîa meenjaga mathiga vûrûrirî ûrîa ûrî irîma.

¹⁶ Nîwaigîte anene ngiri ithatû na magana mathatû (3,300) arîa maarûngamagîrîra andû arîa maarutaga wîra ûcio.

¹⁷ Wata ûrîa mûthamaki Solomoni aathanire, andû acio nîmeenjire mathiga manene na ma goro nîguo mavûthîrwe gûtuma mûcingi wa hekarû.

¹⁸ Kwoguo aruti wîra a Solomoni na a Hiramu marî vamwe na arûme a kuuma Gebali nîmaavarîrîrie mathiga na mîtî nîguo matume hekarû.