1Atha 4 - ÎVUKU RÎA ÛVORO MWARO

Ndungata cia Solomoni

¹ Solomoni aarî mûthamaki wa Isiraeli kuonthe.

² Ndungata ciake irîa ciarî cia vata mûno ciarî mûthînjîri-Ngai Azaria, mûvîcî wa Zadoku.

³ Elihorefu na Ahija avîcî a Shisha nîo maarî andîki. Jehoshafati mûvîcî wa Ahiludi nîke wamenyagîrîra mandîko.

⁴ Benaia mûvîcî wa Jehoiada nîke warî mûnene wa athigari a mbaara. Zadoku na Abiatharu maarî athînjîri-Ngai.

⁵ Azaria mûvîcî wa Nathani aarî mûnene wa anene arîa engî. Nake Zabudu, mûvîcî wa Nathani nîke warî mûthînjîri-Ngai na mûtaari wa mûthamaki.

⁶ Ahisharu aarî mûnene wa ndungata cia mûthamaki, nake Adoniramu mûvîcî wa Abida nîke warî mûnene wa andû arîa maarutithagua wîra na vinya.

⁷ Solomoni nîwathuurîte anene îkûmi na aîrî arîa maathanaga Isiraeli kuonthe. Anene acio nîo maavecaga mûthamaki vamwe na andû a nyomba yake irio, na wa mûnene aaviraga irio îvinda rîa mweri ûmwe wa mwaka.

⁸ Namo marîîtwa ma anene acio nîmo: Benihuri, ûrîa wathanaga vûrûrirî ûrîa ûrî irîma wa Efiraimu.

⁹ Benidekeri, ûrîa wathanaga matûûrarî ma Makazu, Shalubimu, Bethishemeshi, Eloni, na Bethi-hanani.

¹⁰ Benihesedi, ûrîa wathanaga matûûrarî marîa manene ma Arubathu, Soko na vûrûri wonthe wa Heferi.

¹¹ Benabinadabu ûrîa wavikîtie Tafathu mwarî wa Solomoni nake aathaga vûrûri wonthe wa Dori.

¹² Baana, mûvîcî wa Ahiludi aathanaga matûûra marîa manene ma Taanaki, Megido na Bethishani kuonthe kûrîa kwarî vakuvî na Zarethani, îrîa îrî mwena wa îveti wa îtûûra rîa Jezireeli, na kuuma Bethishani nginya Abeli-mehola na mwena ûcio wîngî wa Jokimeamu.

¹³ Benigeberi aathanaga îtûûrarî rîa Ramothi rîrîa rîarî Gileadi na icagi cia Gileadi cia mûvîrîga wa Jairi. Jairi aarî wa rûciaro rwa Manase. Nwa wathaga vûrûri wa Arigobu kûrîa Bashani na kûu nîkuo kwarî na matûûra mîrongo îtandatû marîa manene mairigîrîtwe na nthingo, na ivingo ciathondeketwe na cuuma cia gîcango.

¹⁴ Ahinadabu, mûvîcî wa Ido aathanaga Mahanimu.

¹⁵ Ahimaazi aathanaga vûrûrirî wa Nafutali. Ahimaazi aavikîtie Basemathi, mwarî wa Solomoni.

¹⁶ Nake Baana mûvîcî wa Hushai aathanaga vûrûrirî wa Asheri vamwe na îtûûra rîa Bealothu.

¹⁷ Jehoshafati, mûvîcî wa Parua aathanaga vûrûrirî wa Isakaru.

¹⁸ Shimei mûvîcî wa Ela aathanaga vûrûrirî wa Benjamini.

¹⁹ Geberi mûvîcî wa Uri aathanaga vûrûrirî wa Gileadi. Vûrûri wa Gileadi mbererî wathagwa nî mûthamaki Sihoni wa Amori, na Ogu mûthamaki wa Bashani. Vûrûri wonthe wa Juda wathagwa nî mûnene ûmwe.

Ûthamaki wa Solomoni nîwanenevire

²⁰ Andû a Juda na a Isiraeli maarî eengî ta mûthanga ûrîa wîthagîrwa ûrî rûtererî rwa îria. Nao maatûîre marîcaga, manyunyaga na makenaga.

²¹ Solomoni aarî mûnene wa mavûrûri monthe kuuma rûnjîrî rwa Farati nginya vûrûri wa Afilisiti gûcoka kûthiî mûvakarî wa Misiri. Andû a kuo nîmaarîvaga gooti kûrî Solomoni na nîmaamûtungatîre ûtûûrorî wake wonthe.

²² Irio irîa ciaviragwa gwa Solomoni mûthenya ûmwe ciarî kilo mîrongo îthatû (30) cia mûtu mûvinyu mûno, na kilo mîrongo îtandatû (60) cia mûtu wa ngano;

²³ ndegwa îkûmi (10) ino norithie, ndegwa mîrongo îîrî (20) irîa ciarîcaga nyaki, ng'ondu îgana rîmwe (100), vamwe na nthwariga, nthiia, ngûrûngû na ngûkû ino noru.

²⁴ Solomoni aathanaga vûrûrirî wonthe ûrîa ûrî mwena wa îthûîro wa Rûnjî rwa Farati, kuuma Tifusa nginya Gaza. Athamaki onthe a mwena wa îthûîro wa rûnjî rwa Farati maathagwa nîke, na aatûûranirie nao na thayû vamwe na mavûrûri monthe marîa maariganîtie nake.

²⁵ Vîndî îrîa yonthe Solomoni aarî mwoyo, andû a Juda na a Isiraeli kuuma Dani kûthiî nginya Beerisheba maatûûraga na thayû, wa mûndû arî na mîthavibu na mîkûyû yake.

²⁶ Solomoni aarî na inyomba ngiri mîrongo îna (40,000) cia mbarathi cia gûkururia ikaari na andû ngiri îkûmi na igîrî (12,000) arîa maathiîcaga matûîte mbarathi.

²⁷ Anene acio nîmaaviragîra mûthamaki Solomoni irio, na makavirîra andû onthe arîa maatûûraga kwa mûthamaki Solomoni. Wa mûndû aaviraga irio mweri ûmwe na nîmaaviraga indo cionthe irîa ciavataranagia.

²⁸ Wana nîmaaviraga gîcunjî gîa cairi na irio cia mbarathi cia ikaari cia mbaara na cia mbarathi irîa ciîngî wa kûrîa ciavataranagia.

²⁹ Ngai nîwavere Solomoni ûûgî na ûmenyo ûtarî kîthimi vamwe na ûtaana wa ngoro mwîngî ta mûthanga ûrîa wîthagîrwa ûrî rûtererî rwa îria.

³⁰ Solomoni aarî na ûûgî mwîngî gûkîra andû onthe a mwena wa îrathîro, na ûûgî mwîngî gûkîra andû onthe a Misiri.

³¹ Nîke warî mûûgî gûkîra arûme acio engî onthe; aarî mûûgî gûkîra Ethani, ûrîa Mûezara, na Hemani, Kalikoli na Darida, avîcî a Maholi. Nayo ngumo ya Solomoni nîyatambire mavûrûrirî monthe marîa maamûthiûrûrûkîrîtie.

³² Nîwatungire nthimo ngiri ithatû (3,000), na akina nyîmbo ngiri îmwe na ithano (1,005).

³³ Nîwagwetire ûvoro wîgiî mîtî, ambîrîrîtie na mûtarakwe ûrîa ûrî Lebanoni, nginya hisofu ûrîa ûmeraga rûthingorî. Wana nîwagwetire ûvoro wîgiî nyamû cia kîthaka, iconi, nyamû irîa ikurumaga nthî, wana nthamaki.

³⁴ Athamaki onthe a nthî nîmegwire ûvoro wîgiî ûûgî wa Solomoni na magîtûma andû mathiî makamûthikîrîrie.