1Atha 3 - ÎVUKU RÎA ÛVORO MWARO

Solomoni nîwavoire ûûgî

¹ Solomoni nîwagîre ngwatanîro na mûthamaki wa Misiri, na nîwavikirie mwîrîtu wa mûthamaki ûcio. Solomoni nîwavirire mwîrîtu ûcio îtûûrarî rîa Daudi agekarage kuo nginya vîndî îrîa aathiririe gûtuma nyomba yake, hekarû ya Ngai-Mûnene, na rûthingo rûrîa rûthiûrûrûkîrîtie Jerusalemu.

² Andû maarutagîra magongoona kûndû kûrîa gûtûgîru, nîûndû vîndî îo hekarû ya Ngai-Mûnene ndîarî ndume.

³ Solomoni nîwendeete Ngai-Mûnene na nîwavingagia mawatho ma îthe Daudi. Nwatî nîwarutagîra magongoona na ûbani irîmarî.

⁴ Vîndî îmwe mûthamaki nîwathiîre Gibeoni kûrutîra magongoona kuo, nîûndû kûu nîkuo kwarî na îgweta mûno kwa magongoona. Mbererî, Solomoni nîwarutîrîte matega ma kûvîvua metharî îo ya kîgongoona maita meengî.

⁵ Ûtukû wa mûthenya ûcio Ngai-Mûnene nîwaumîrîre Solomoni na njîra ya kîroto na akîmwîra atîrî, “Mbîtia kîrîa ûkwenda na nîngûkûva.”

⁶ Solomoni nîwaugire atîrî, “Nîwonagia vava Daudi, ndungata yaku wendo ûtathiraga, nîûndû aagûtungataga arî na wîvokeku, ûthingu na ûtheru wa ngoro. Na nîûthiîte na mbere kûmûonia wendo ûtathiraga na Nîwamûvere mûvîcî ûrîa wîkarîrîte gîtî Kîam ûthamaki vuva wake nginya ûmûnthî.

⁷ Na rîu Ngai-Mûnene, Ngai wakwa, nîûmvotithîtie gûtuîka mûthamaki vuva wa vava Daudi, wana ethîrwa ndirî mûkûrû na ndiîcî kwathana.

⁸ Nînie ûyû ndungata yaku nîrî gatagatî ka andû aku arîa ûthuurîte matuîka aku, andû eengî mûno ûndû matangîtarîka.

⁹ Kwoguo mva ûûgî ûrîa mvatarîte nîguo mvote gûtongoria andû aku, na mvotage gûkûûranagia maûndû maro na maûndû macûku, nîûndû nîûrîkû ûngîvota gûtongoria andû aya aku eengî ûguo?”

¹⁰ Ngai-Mûnene nîwakenire egua Solomoni avoya ûûgî.

¹¹ Kwoguo Ngai nîwamwîrire atîrî, “Nîûndû wavoya ûûgî nîguo ûvote gûtongoria waro, na ndûnavoya ûvewe ûtûûro mûraca kana ûtonga, kana nthû ciaku ciûragwe,

¹² rîu nîngûkûva kîu wavoya. Nîngûva ûûgî mwîngî na ûmenyo, ûrîa ûtaanethîrwa ûrî na mûndû wîngî kana ûkeethîrwa ûrî na mûndû wîngî vuva waku.

¹³ Nîngûva wana kîrîa ûtanavoya. Nîngûkûva ûtonga na gîtîîo ûtûûrorî waku wonthe, na gûtikethîrwa kûrî na mûthamaki wîngî tawe.

¹⁴ Na ethîrwa ûkambathîkagîra na ûvingagie mawatho na maathani makwa ta ûrîa aguo Daudi eekaga, nîngaakûva ûtûûro mûraca.”

¹⁵ Solomoni nîwaramûkire na akîmenya atî nî Ngai wamwaragîria na njîra ya kîroto. Nîwacokire akîthiî Jerusalemu na akîrûngama vau mbere ya îthandûkû rîa kîrîkanîro Kîam Ngai-Mûnene. Nîwarutire matega ma kûvîvua na ma thayû na akîrûthîra ndungata ciake cionthe kîrugo.

Solomoni nîwatwire ciira na ûûgî

¹⁶ Maraa maîrî nîmaathiîre na makîrûngama mbere ya mûthamaki.

¹⁷ Ûmwe wao nîwaugire atîrî, “Mwathi wakwa, mûndûmûka ûyû nanie tûtûûraga nyombarî îmwe, na nînaaciarire kaana ga kavîcî arî nyombarî îo.

¹⁸ Mûthenya wa kathatû kuuma naciara, mûndûmûka ûyû wanake nîwaciarire kaana ga kavîcî. Gûtiarî na mûndû wîngî nyombarî îo, twarî tuoîrî tu.

¹⁹ Ûtukû ûmwe mûndûmûka ûyû nîwamaamîre kaana gake na gagîkua.

²⁰ Nîwacokire akîramûka ûtukû, agîoca kaana gakwa kuuma varîa twamamîte nako na akîthiî nako ûrîrîrî wake. Nîwacokire akîrete karîa gake karî gakuû ûrîrîrî wakwa nîrî toro.

²¹ Rîrîa naaramûkire kîraûko kîu kîngî nîguo mongie kaana gakwa, nînoonire karî gakuû. Nwatî rîrîa naakaroririe waro, nînaamenyire atî tî kaana karîa naaciarîte!”

²² Nwatî mûndû mûka ûcio wîngî nîwaugire atîrî, “Naarî! Kaana kau karî mwoyo nî gakwa, nako kau gakuû nî gaku!” Nake mûndûmûka wa mbere nîwaugire atîrî “Naarî! Kaana kau gakuû nî gaku, nako kau karî mwoyo nî gakwa!” Ûguo nîguo maakararanagia marî mbere ya mûthamaki.

²³ Mûthamaki Solomoni nîwacokire akîmeera atîrî, “Wa ûmwe wa cienyu arauga atî kaana kau karî mwoyo nî gake nako kau gakuû nî ka ûcio wîngî.”

²⁴ Mûthamaki nîwetirie rûviû. Na rîrîa rwaretirwe kûrî ke,

²⁵ nîwaugire atîrî, “Tiniani kaana kau karî mwoyo icunjî igîrî, nuthu îmwe înengerwe mûndûmûka ûmwe nayo îo îngî înengerwe ûcio wîngî.”

²⁶ Ng'ina wa kaana kau kaarî mwoyo nîwecûrirwe nî ntha cia kavîcî gake, na akîra mûthamaki atîrî, “Mwathi wakwa, nakûthaitha ndûkaûrage kaana kau! Kanenganîre kûrî mûndûmûka ûcio!” Nwatî mûndûmûka ûcio wîngî nîwaugire atîrî, “Gatikethîrwe karî gakwa kana gake; nîgatinanue maita maîrî.”

²⁷ Mûthamaki Solomoni nîwacokire akiuga atîrî, “Mûtikaûrage kaana kau! Kanenganîreni kûrî mûndûmûka wa mbere nîke ng'ina.”

²⁸ Rîrîa andû a Isiraeli meegwire ûrîa Mûthamaki Solomoni aatwire ciira ûcio, nîmaamûtîire mûno nîûndû nîmaamenyire atî Ngai nîwamûvete ûûgî wa gûtua ciira na kîvooto.