1Atha 22 - ÎVUKU RÎA ÛVORO MWARO

Mûrathi Mikaia Nîwakaanirie Ahabu

¹ Îvinda rîa mîaka îthatû, kwarî na thayû gatagatîrî ka Isiraeli na Sîria,

² nwatî mwakarî wa kathatû Jehoshafati, mûthamaki wa Juda nîwathiîre kûrî Ahabu, mûthamaki wa Isiraeli.

³ Ahabu nîwaûririe ndungata ciake atîrî, “Nîmwicî atî Ramothi-gileadi nî gwetû? Nîndûî kîratûma tûrega kûthiî gûtava îtûûra rîu kuuma kûrî mûthamaki wa Sîria?”

⁴ Ahabu nîwaûririe Jehoshafati atîrî, “Nîtûkûthiî nawe mbaararî kûu Ramothi-gileadi?” Nake Jehoshafati nîwacokirie atîrî, “Îî, nie nawe tûrî kîndû kîmwe, andû akwa nî andû aku, mbarathi ciakwa nî mbarathi ciaku.”

⁵ Jehoshafati nîwacokire akîra mûthamaki wa Isiraeli atîrî, “Tiga twambe tûrie Ngai-Mûnene ûvoro.”

⁶ Ahabu, mûthamaki wa Isiraeli nîwaûnganirie arathi ta magana mana (400) vamwe na akîmaûria atîrî, “Nthiî ngatharîkîre îtûûra rîa Ramothi-gileadi, kana mbîkare?” Nao nîmaamûcokerie atîrî, “Thiî ûkarîtharîkîre, Ngai-Mûnene nîagûkûvotithia kûvootana.”

⁷ Nwatî Jehoshafati nîwaûririe atîrî, “Nîkwa gûkû gûtarî mûrathi wa Ngai-Mûnene wîngî tûngîûria ûvoro?”

⁸ Ahabu, mûthamaki wa Isiraeli nîwacokirie atîrî, “Kûrî na mûrathi wa Ngai-Mûnene ûmwe ûtigarîte, Mikaia, mûvîcî wa Imula. Nwatî ndimwendete nîûndû ndaanaratha wanarî ûndû mwaro ûmbîgiî; vîndî cionthe andathagîra maûndû mama macûku.” Jehoshafati nîwamûcokerie atîrî, “Mûthamaki, ndwagîrîrwe nî kuga ûguo!”

⁹ Ahabu nîwetire ndungata îmwe yake na akîmîatha îthiî îkagîîre Mikaia mûvîcî wa Imula na îvenya.

¹⁰ Vîndî îo, Ahabu na Jehoshafati meekîrîte nguo ciao cia ûthamaki makînekarîra itîrî ciao cia ûthamaki vau îtîrirî kîvingorî Kîam gûtonya Samaria, nao arathi onthe maarathaga marî mbere yao.

¹¹ Ûmwe wa arathi acio, Zedekia mûvîcî wa Kenaana nîwarûthire mvîa cia cuuma na akîra Ahabu atîrî, “Ngai-Mûnene arauga atî; ‘Ûgaatûmîra ino ûkîrûa na Asîria nginya rîrîa ûkaamavoota viû.’ ”

¹² Nao arathi acio engî nîmaarathire wa ûguo na makiuga atîrî, “Thiî ûkatharîkîre îtûûra rîa Ramothi-gileadii na nîûkûvootana; Ngai-Mûnene nîagûkûvotithia kûmavoota.”

¹³ Vîndî wa îo, ndungata îrîa yatûmîtwe kûrî Mikaia nîyamwîrire atîrî, “Arathi acio engî onthe nîmaratha atî mûthamaki nîakûvootana. Wanawe ratha maûndû maro wa tao.”

¹⁴ Nwatî Mikaia nîwaugire atîrî, “Nevîta na Ngai-Mûnene ûrîa ûtûûraga mwoyo atî nie nîmbuga ûrîa Ngai-Mûnene akûmbîra mbuge!”

¹⁵ Rîrîa Mikaia aakinyire kûrî mûthamaki Ahabu, Mûthamaki nîwamûririe atîrî, “Mikaia, nie na mûthamaki Jehoshafati tûthiî mbaararî kûu Ramothi-gileadi kana twîkare?” Nake Mikaia nîwamûcokerie atîrî, “Thiî kuo na ûtharîkîre na nîûkûvootana! Ngai-Mûnene nîagûkûvotithia kûvootana.”

¹⁶ Nwatî Ahabu nîwamwîrire atîrî, “Nîngwîra maita megana, atî vîndî îrîa ûkûmbîra ûndû na rîîtwa rîa Ngai-Mûnene nwanginya ûmbîrage ûvoro wa ma?”

¹⁷ Mikaia nîwacokirie atîrî, “Nînoonire andû onthe a Isiraeli manyaganîte irîma ta ng'ondu itarî na mûrîthi. Nake Ngai-Mûnene nîwaugire atîrî, ‘Andû aya matirî na mûtongoria; nîmacoke wa mûndû gwake mûciî na thayû.’ ”

¹⁸ Ahabu, mûthamaki wa Isiraeli nîwerire Jehoshafati atîrî, “Kinthî ndikwîrire, atî ndandathagîra wanarî ûndû mwaro? Arathaga ûndû ûyû mûcûku tu vîndî cionthe!”

¹⁹ Mikaia nîwathiîre mbere na akiuga atîrî, “Rîu thikîrîria ûrîa Ngai-Mûnene augîte! Nînoonire Ngai-Mûnene ekarîrîte gîtî gîake Kîam ûthamaki kûu îgûrû, nao araika ake onthe maarûngamîte mamûthiûrûrûkîrîtie.

²⁰ Ngai-Mûnene nîwaûririe atîrî, ‘Nîûrîkû ûkûthiî aveenererie Ahabu nîguo etîkîre kûthiî nîguo akaûragîrwe Ramothi-gileadi?’ Wa mûraika nîwacokirie wa ûrîa eeciragia.

²¹ Mûthiiarî kûrî roho waumîre, ûkîrûngama mbere ya Ngai-Mûnene na ûkiuga atîrî, ‘Nîngûthiî kûmûvenereria.’

²² Nake Ngai-Mûnene nîwamûririe atîrî, ‘ûkaamûveenereria atîa?’ Naguo roho nîwacokirie atîrî, ‘Nînthiî na ndûme arathi a Ahabu onthe maveenanie.’ Ngai-Mûnene nîwamwîrire atîrî, ‘Thiî na ûmûveenererie. Nîûkûvootana!’ ”

²³ Kwoguo Mikaia nîwathiririe na kuga atîrî, “Ngai-Mûnene nîatûmîte arathi aya aku onthe maveenanie. Nwatî Ngai-Mûnene ke mwene nîaugîte atî nîûkaagîa na ûndû mûcûku!”

²⁴ Mûrathi Zedekia, mûvîcî wa Kenaana nîwacokire akîthiî kûrî Mikaia, akîmûcamûra rûvî ûthiû na akîmûria atîrî, “Roho wa Ngai-Mûnene anandiganîria na agîûka kwaria nawe?”

²⁵ Nake Mikaia nîwaugire atîrî, “Ûkaamenya ûguo rîrîa ûgaatonya nyombarî ya ndaarî kwîthitha.”

²⁶ Mûthamaki Ahabu nîwathire ûmwe wa ndungata ciake akîmwîra atîrî, “Nyita Mikaia na ûmûvire kûrî Amoni, mûnene wa îtûûra na kûrî Joashi, mûvîcî wa mûthamaki.

²⁷ Ûmere mamûvingîre njeera na mamûrûmagie tûirio tûnini na manjî, nginya rîrîa ngaacoka nîrî na thayû.”

²⁸ Mikaia nîwerire Ahabu atîrî, “Wona wacoka wîna thayû, Ngai-Mûnene ndanaria na njîra yakwa.” Nîwacokire akiuga atîrî, “Mue andû aya muonthe mûtikariganîrwe nî ûguo nauga!”

Gûkua kwa Ahabu

²⁹ Kwoguo Ahabu, mûthamaki wa Isiraeli na Jehoshafati, mûthamaki wa Juda nîmaathiîre kûtharîkîra îtûûra rîa Ramothi-gileadi.

³⁰ Ahabu nîwerire Jehoshafati atîrî, “Nie nînthiî mbaararî ndekîrîte nguo ciakwa cia ûthamaki, nwatî we ûthiî wîkîrîte nguo ciaku cia ûthamaki.” Kwoguo mûthamaki wa Isiraeli nîwathiîre mbaararî atekîrîte nguo ciake cia ûthamaki.

³¹ Mûthamaki wa Sîria nîwathîte anene ake mîrongo îthatû na aîrî (32) a ikaari ciake cia mbaara matikarûe na andû acio engî tiga mûthamaki wa Isiraeli.

³² Kwoguo rîrîa anene acio a ikaari cia mbaara moonire Jehoshafati, onthe nîmoonire takwa aarî ke mûthamaki wa Isiraeli, na nîmaathiîre kûmûtharîkîra. Nwatî rîrîa Jehoshafati aaugire mbu,

³³ anene acio nîmaamenyire atî ûcio ndaarî mûthamaki wa Isiraeli, na nîmaatigire kûvinyûrania nake.

³⁴ Nwatî mûndû ûmwe wa Sîria nîwagucirie ûta wake aterîgîrîrîte na akîrathîra mûthamaki wa Isiraeli gatagatî ka ngo yake ya cuuma ya kûgitîra kîthûri na varîa indo icio ciîngî cia mbaara inyitithanîrîtue. Nake mûthamaki wa Isiraeli nîwerire mûndû ûrîa warugutaga gîkaari gîake Kîam mbaara augîrîrîtie atîrî, “Nînagurarua! Garûrûka na ûndute mbaararî!”

³⁵ Mbaara nîyanenevire mûno mûthenya ûcio, nake mûthamaki Ahabu eekarîte atirîtwe gîkaarirî Kîam mbarathi erekerete andû a Sîria. Nthakame nîyauraga kuuma kîrondarî îgîtîkaga kûu ndaarî ya gîkaari na rîrîa kîvwaî gîakinyire Ahabu nîwakwire.

³⁶ Riûa rîthiîte kûthûa, nîkwanîrîrwe kûrî athigari onthe a mbaara na mûgambo mûnene kûu Isiraeli atîrî, “Andû onthe, wa mûndû nîacoke vûrûrirî wake na wa mûndû acoke îtûûrarî rîake!”

³⁷ Rîrîa mûthamaki Ahabu aakwire, mwîrî wake nîwavirirwe Samaria na makîûthika kuo.

³⁸ Gîkaari gîake Kîam mbarathi nîkîathambîrue kariarî ga kûu Samaria. Ngui nîciacûnire nthakame yake namo maraa makîîthambia na manjî ma karia kau wata ûrîa Ngai-Mûnene aaugîte.

³⁹ Maûndû marîa mengî monthe marîa mûthamaki Ahabu eekire, wa vamwe na nyomba yake îrîa aatumîte na mîguongo na matûûra monthe marîa aatumire nîmandîke Îvukuurî rîa Maûndû ma Tene ma Athamaki Isiraeli.

⁴⁰ Rîrîa Ahabu aakwire, mûvîcî Ahazia nîwatuîkire mûthamaki vuva wake.

Jehoshafati mûthamaki wa Juda

⁴¹ Mwakarî wa kana kuuma Ahabu atuîka mûthamaki wa Isiraeli, Jehoshafati mûvîcî wa Asa, nîwatuîkire mûthamaki wa Juda.

⁴² Jehoshafati aatuîkire mûthamaki arî na ûkûrû wa mîaka mîrongo îthatû na îtano (35), na nîwathanire Juda îvinda rîa mîaka mîrongo îîrî na îtano (25) arî Jerusalemu. Ng'ina eetagwa Azuba, mwarî wa Shilihi.

⁴³ Jehoshafati nîwekire maûndû maro mbere ya Ngai-Mûnene wata ûrîa îthe Asa eekire; nwatî ndaacûkangia kûndû kûrîa kwagoocagîrwa, nao andû nwa maarutagîra magongoona kuo na makavîvagîria ûbani kuo.

⁴⁴ Jehoshafati nîmeekarire marî na thayû na mûthamaki wa Isiraeli.

⁴⁵ Maûndû marîa mengî monthe marîa Jehoshafati eekire, ûmîrîru wake wonthe, na mbaara ciake, nîmandîke Îvukuurî rîa Maûndû ma Tene ma Athamaki Juda.

⁴⁶ Nîwathiririe arûme onthe arîa maarî maraa na aatungataga metharî cia magongoona na maatigarîte vîndî îrîa îthe Asa aathanaga.

⁴⁷ Vûrûri wa Edomu ndwarî na mûthamaki. Vûrûri ûcio wathagwa nî mûnini wa mûthamaki.

⁴⁸ Mûthamaki Jehoshafati nîwatumire meri cia Tarishishi cia kûgîra thaavu vûrûrirî wa Ofiri; nwatî meri icio itiathiî nîûndû nîciaunîkangîre Ezioni-geberi.

⁴⁹ Ahazia mûvîcî wa Ahabu nîwacokire akîra Jehoshafati atîrî, “Tiga ndungata ciakwa ithiîcanie na ndungata ciaku merirî.” Nwatî Jehoshafati nîwaregire ûguo.

⁵⁰ Jehoshafati nîwakwire na akîthikwa mbîrîrarî irîa ciathikagwa athamaki îtûûrarî rîa Daudi. Mûvîcî Jehoramu nîwatuîkire mûthamaki vuva wake.

Ahazia mûthamaki wa Isiraeli

⁵¹ Mwakarî wa îkûmi na mûgwanja (17) Jehoshafati arî mûthamaki wa Juda nîrîo Ahazia mûvîcî wa Ahabu aatuîkire mûthamaki wa Isiraeli. Aathanire kûu Isiraeli arî Samaria îvinda rîa mîaka îîrî (2).

⁵² Nîwekire maûndû macûku mbere ya Ngai-Mûnene na njîra ya kûrûmîrîra maûndû marîa îthe Ahabu, ng'ina Jezebeli, na mûthamaki Jeroboamu meekaga. Andû acio nîo maatûmîte Aisiraeli mevie.

⁵³ Nîwatungatîre Baali na akîmîgooca na akîrakaria Ngai-Mûnene, Ngai wa Isiraeli na maûndû ta marîa îthe eekîte.