1Atha 21 - ÎVUKU RÎA ÛVORO MWARO

Mûgûnda wa mîthavibu wa Nabothi

¹ Nabothi ûrîa Mûjezireeli aarî na mûgûnda wa mîthavibu kûu Jezireeli vakuvî na mûciî wa Ahabu, mûthamaki wa Samaria.

² Vîndî îmwe Ahabu nîwerire Nabothi atîrî, “Mva mûgûnda waku wa mîthavibu nîûndû ûrî vakuvî na mûciî wakwa, nîguo nîûtue mûgûnda wa matunda. Nanie nîngûgûkûrananîria na mûgûnda wîngî wa mîthavibu mwaro gûkîra ûcio, kana ûngîenda nîngûkûrîva mbeca irîa ciîganîrîte.”

³ Nwatî Nabothi nîwerire Ahabu atîrî, “Nevîta na rîîtwa rîa Ngai-Mûnene atî ûguo ûroûra nîngînenganîra mûgûnda ûyû wa mîthavibu nîûndû naaûgaire kuuma kûrî methe makwa!”

⁴ Ahabu nîwathiîre mûciî gwake arî mûrakaru na ûthû mwîngî nîûndû wa ûrîa Nabothi aamwîrîte, atî tîamûnengera mûgûnda wa mîthabivû nîûndû aaûgaire kuuma kûrî methe make. Ahabu nîwamamire ûrîrîrî wake erekerete rûthingo, na ndangîarîre irio.

⁵ Mûka Jezebeli nîwathiîre varî ke na akîmûria atîrî, “Nîndûî gîkûrakarîtie? Ûrarega kûrîa irio nîkî?”

⁶ Nake Ahabu nîwerire mûka atîrî, “Nîûndû mbîrire Nabothi ûrîa Mûjezireeli amenderie mûgûnda wake wa mîthavibu, kana angîenda nîmûkûûrananîrie guo na wîngî nwatî ambîra atî tîanengera guo!”

⁷ Mûka Jezebeli nîwamûcokerie atîrî, “Kinthî we tîwe mûthamaki wa Isiraeli? Ûkîra, ûrîe na ûkene. Nîngûgwocera mûgûnda wa mîthavibu wa Nabothi!”

⁸ Kwoguo Jezebeli nîwandîkire maarûa vandûrî va Ahabu, akîivûûra mûvûûri wa Ahabu na agîitûma kûrî ndungata na atongoria arîa matûûraga na Nabothi îtûûrarî rîake.

⁹ Maarûa icio ciandîkîtwe atîrî, “Anîrîrani mûthenya wa kwînyerekia, mwîteni andû vamwe na mwige Nabothi vandû va gîtîîo.

¹⁰ Mwige mîkora îîrî yerekanîrîte nake nîguo îmûthitange îkîmwîraga atî nîarumîte Ngai vamwe na mûthamaki. Mûcoke mûmûrute nja ya îtûûra na mûmûûrage na mathiga.”

¹¹ Kwoguo andû a îtûûra rîa Nabothi, ndungata vamwe na atongoria arîa maatûûranagia na Nabothi nîmeekire wata ûrîa Jezebeli aathanîte maarûarî irîa aamatûmîrîte.

¹² Nîmaanîrîre mûthenya wa kwînyerekia, magîta andû vamwe na makîva Nabothi vandû va gîtîîo.

¹³ Nayo mîkora îîrî nîyathiîre na îgîkara yerekanîrîte nake na nîyamûthitangire andû onthe makîgucaga atî nîarumîte Ngai vamwe na mûthamaki. Kwoguo Nabothi nîwarutirwe nja ya îtûûra na akîûragwa na mathiga.

¹⁴ Andû nîmaacokire magîtûmana kûrî Jezebeli atîrî, “Nabothi nîwaûragwa na mathiga.”

¹⁵ Vîndî wa îo Jezebeli eegwire atî Nabothi nîwaûragîtwe na mathiga, nîwerire Ahabu atîrî, “Nabothi nîmûrage na mathiga. Kwoguo thiî woce mûgûnda wake wa mîthavibu ûrîa aaregire gûkwenderia.”

¹⁶ Rîrîa Ahabu eegwire ûguo, nîwathiîre wa rîmwe mûgûndarî wa mîthavibu wa Nabothi nîguo eyocere guo ûtuîke wake.

¹⁷ Ngai-Mûnene nîwacokire akîra Elija, mûrathi wa kuuma Tishibe atîrî,

¹⁸ “Thiî kûrî Ahabu mûthamaki wa Isiraeli, ûrîa wî Samaria. Nîûkûmwîthîrîria mûgûndarî wa mîthavibu wa Nabothi kûrîa athiî kwîyocera guo ûtuîke wake.

¹⁹ Ûmwîre, nie Ngai-Mûnene namwîra atî, ‘Vuva wa kûûraga Nabothi, nîkwa ûrenda gwîyocera indo ciake wanacio?’ Ûmwîre nauga, atî ‘vandû wa varîa nthakame ya Nabothi yetîkire na îgîcûnwa nî ngui nwavo igaacûnîra nthakame yaku!’ ”

²⁰ Ahabu nîwaûririe Elija atîrî, “Anga we nthû yakwa nîwamona?” Nake Elija nîwacokirie atîrî, “Nînakwona nîûndû nîwîrutîrîte viû gwîka maûndû macûku mbere ya Ngai-Mûnene.

²¹ Kwoguo Ngai-Mûnene arakwîra, atî ‘Nîngaakûretere ûndû mûcûku. Nîngaakûthiria viû na nthirie arûme onthe aku arîa ngombo na arîa matarî ngombo vûrûrirî wa Isiraeli.

²² Nîngaatûma mûciî waku wîkare ta mûciî wa mûthamaki Jeroboamu mûvîcî wa Nebati na wîkare ta mûciî wa mûthamaki Baasha mûvîcî wa Ahija, nîûndû nîûndakarîtie nîûndû wa gûtûma andû a Isiraeli mevie.’

²³ Naguo ûvoro wîgiî Jezebeli, Ngai-Mûnene arauga atî ngui nîikaarîîra mwîrî wake îtûûrarî rîa Jezireeli.

²⁴ Mûndû wa wonthe wa mbarî ya Ahabu ûrîa ûgaakuîra îtûûrarî nîakaarîwa nî ngui, nake mûndû wa wonthe wa mbarî yake ûrîa ûgaakuîra nja ya îtûûra nîakaarîwa nî iconi cia rîerarî.”

²⁵ (Gûtirî mûndû wîngî werutîrîte viû ta Ahabu gwîka maûndû macûku mbere ya Ngai-Mûnene. Ahabu eekire maûndû mau monthe nîûndû wa kûringîrîrua nî mûka Jezebeli.

²⁶ Nîwekire mevia ma nthoni mûno na njîra ya kûgooca mîvuanano, ta ûrîa Amori meekîte. Amori meengatagwa nî Ngai-Mûnene kuuma vûrûrirî wa ûrîa andû a Isiraeli maathiîcaga na mbere.)

²⁷ Rîrîa Elija aarîkirie kwîra Ahabu ûguo, Ahabu nîwatembûrangire nguo ciake, agîkîra nguo cia macakaya na akînyerekia. Nîwamamaga ekîrîte nguo cia macakaya na akathiîcaga kûndû na kûndû arî na kîeva.

²⁸ Ngai-Mûnene nîwerire mûrathi Elija, Mûtishibi atîrî,

²⁹ “Nîwonete ûrîa Ahabu enyivîtie mbere yakwa? Nîûndû nîekîte ûguo, ndikaamûretere ûndû mûcûku ûtûûrorî wake; nwatî ngaarete ûndû mûcûku nyombarî yake vîndî ya ûtûûro wa mûvîcî.”