1Atha 20 - ÎVUKU RÎA ÛVORO MWARO

Mbaara ya Aisiraeli na Sîria

¹ Benihadadi, mûthamaki wa Sîria nîwaûnganirie athigari ake onthe. Nîwatethererue nî athamaki engî mîrongo îthatû na aîrî (32) marî na mbarathi ciao na ikaari cia mbaara, nîwathiîre akîthiûrûrûkîria îtûûra rîa Samaria na akîrîtharîkîra.

² Nîwacokire agîtûma anjaama îtûûrarî kûrî Ahabu, mûthamaki wa Isiraeli makamwîre atîrî, “Benihadadi arauga

³ ûmûvirîre sîlûva yaku na thaavu, aka aku arîa aro mûno vamwe na ciana ciaku.”

⁴ Mûthamaki Ahabu nîwacokirie atîrî, “Thiîni mwîre mwathi wakwa mûthamaki, atî nînetîkîra; nie wana indo cionthe ciakwa nî ciaku.”

⁵ Anjaama nîmaacokire kûrî Ahabu matûmîtwe rîngî nî Benihadadi, mûthamaki makamwîre atîrî, “Naagûtûmanîre ûndetere sîlûva yaku na thaavu, aka aku arîa aro mûno vamwe na ciana ciaku.

⁶ Kwoguo, rûyû îthaa ta rîîrî nîngaatûma ndungata ciakwa ciûke icarie nyombarî yaku, vamwe na mîciî ya ndungata ciaku na ikuue indo cionthe irîa ikoona irî mbaro.”

⁷ Mûthamaki Ahabu nîwetire atongoria onthe a vûrûri na akîmeera atîrî, “Taroriani ûrîa mûndû ûyû arenda gûtûcûkangia. Aandûmanîîre nîmûnengere aka akwa na ciana ciakwa, sîlûva yakwa na thaavu yakwa na nînetîkîrire.”

⁸ Nao atongoria onthe vamwe na andû nîmaacokirie atîrî, “Ndûkamûthikîrîrie, na ndûgetîkîre.”

⁹ Kwoguo Ahabu nîwacokerie anjaama a Benihadadi atîrî, “Thiîni mwîre mwathi wakwa mûthamaki, atî nînetîkîrire ûrîa aambîrire mbere, nwatî ndingîtîkîra ûcio wa kaîrî.” Anjaama nîmaacokire kûrî Benihadadi, magîcoka magîtûmwa kûrî Ahabu na ndûmîrîri îngî

¹⁰ kuuma kûrî Benihadadi yaugaga atîrî, “ngai irombûraga ethîrwa îtûûra rîîrî rîa Samaria nî gûgaatigara wanarî mûthetu ûngîkumbatwa ngundi nî andû onthe arîa manûmîrîrîte. Ngaarîcûkangia viû!”

¹¹ Ahabu mûthamaki wa Isiraeli nîwacokirie atîrî, “Thiîni mwîre mûvîcî wa Hadadi, mûthamaki atî mûthigari njamba etîîaga vuva wa mbaara, nwatî tî mbere ya mbaara.”

¹² Benihadadi eegwire ndûmîrîri îo ya mûthamaki Ahabu vîndî îrîa ke na atongoria arîa maagwatanîrîte nake maanyunyaga marî magemarî mao. Nîwathire andû ake mevarîrie kûtharîkîra îtûûra; nao nîmeevarîrie.

¹³ Vîndî wa îo mûrathi ûmwe nîwathiîre kûrî mûthamaki Ahabu na akîmwîra atîrî, “Ngai-Mûnene araûria kana nîûrona andû aya eengî ûguo nthû ciaku! Nîngûkûvotithia kûmavoota ûmûnthî, na nîûkûmenya atî nînie Ngai-Mûnene.”

¹⁴ Nake Ahabu nîwaûririe atîrî, “Nû ûgûtongoria kûtharîkîra?” Nake mûrathi nîwacokirie atîrî, “Ngai-Mûnene arauga atî, andû ethî arîa marutaga wîra marî rungu rwa anene a icunjî cia vûrûri nîo magaatongoria.” Mûthamaki nîwaûririe atîrî, “Nû ûkaambîrîria kûrûa?” Nake mûrathi nîwacokirie atîrî, “Nîwe ûkaambîrîria.”

¹⁵ Kwoguo mûthamaki Ahabu nîwetire anake ndungata cia anene a icunjî cia vûrûri. Onthe maarî magana maîrî ma mîrongo îthatû na aîrî (232). Nîwacokire agîta athigari a Isiraeli. Nao onthe maarî ngiri mûgwanja (7,000).

¹⁶ Mûthamaki Ahabu na athigari ake maambîrîîrie kûtharîkîra thaa thita cia mûthenya. Vîndî îo Benihadadi na athamaki arîa aarî nao mîrongo îthatû na aîrî (32) maarî magemarî mao makînyua ndivei.

¹⁷ Andû ethî arîa maarutaga wîra marî rungu rwa anene a icunjî cia vûrûri nîmaatongoririe. Vîndî îo Benihadadi nîwatûmire athigani, nao nîmaamûcokerie ndûmîrîri atî kwarî na gîkundi Kîam andû gîaûkîte kiumîte Samaria.

¹⁸ Benihadadi nîwerire athigani atîrî, “Manyiteni marî mwoyo, wana ethîrwa maûkîte kûrûa kana maûkîte na thayû.”

¹⁹ Anake arîa maatungataga marî rungu rwa anene a icunjî cia vûrûri nîmaambîrîrie kûtharîkîra, marûmîrîrîtwe nî andû a Isiraeli,

²⁰ na wa Mûisiraeli nîwaûragîre nthû yake îrîa aatharîkîre. Kwoguo Asîria nîmaaûrire, nao andû a Isiraeli makîmarûmîrîria. Nwatî Benihadadi, mûthamaki wa Sîria nîwaûrire atwîte mbarathi, marî na athigari amwe arîa maathiîcaga matûîte mbarathi.

²¹ Ahabu mûthamaki wa Isiraeli nîwathiîre mîgûndarî, agîtava mbarathi na ikaari cia mbaara, na nîwaûragire andû eengî mûno a Sîria.

²² Mûrathi nîwacokire akîthiî kûrî mûthamaki wa Isiraeli na akîmwîra atîrî, “Thiî wîvarîrie waro na ûmenye ûrîa ûgwîka, nîûndû mûthamaki wa Sîria nîagaakûtharîkîra îvinda rîu rîngî rîa mvevo.”

Asîria nîmaatharîkîre Aisiraeli riita rîa kaîrî

²³ Benihadadi, mûthamaki nîwerirwe nî ndungata ciake atîrî, “ngai cia Aisiraeli nî ngai cia irîmarî na kîu nîkîo gîatûmire matûvoota. Nwatî ethîrwa tûkaarûîra nao kûndû gûkû kwaraganu, nwanginya tûkaamavoota.

²⁴ Rîu ruta athamaki arîa mîrongo îthatû na aîrî (32) kuuma varîa wa mûndû arûngamîrîrîte na vandûrî vao wîkîre anene a athigari a mbaara.

²⁵ Ûngania andû eengî wata arîa maagûtigire, mbarathi na ikaari cia mbaara wata irîa ciaûrire. Tûkaarûa na Aisiraeli tûrî Kîamndarî, na vîndî îno nwanginya tûmavoote.” Mûvîcî wa Hadadi, mûthamaki nîwathikîrîrie mataaro ma ndungata ciake na nîwekire guo.

²⁶ Îvinda rîu rîngî rîa mvevo, Benihadadi nîwaûnganirie Asîria na makîthiî îtûûrarî rîa Afeku nîguo makarûe na Aisiraeli.

²⁷ Andû a Isiraeli nîmaaûnganirue na makîvewa indo cia mbaara na makîthiî kûrûa na Asîria. Aisiraeli moonekaga ta tûkundi twîrî tûnini twa mbûri, nwatî Asîria maanyaganîte vûrûrirî wonthe.

²⁸ Mûndû wa Ngai ûmwe nîwathiîre kûrî mûthamaki Ahabu na akîmwîra atîrî, “Ngai-Mûnene arauga atî: ‘nîûndû Asîria maugîte atî nie nî ngai ya irîma na tî wa ciandarî, nîngûkûvotithia kûvoota andû acio eengî ûguo na nîmûkaamenya atî nînie Ngai-Mûnene.’ ”

²⁹ Asîria na Aisiraeli nîmeekarire na andû kûrîa maatûûraga mang'ethanîrîte îvinda rîa mîthenya mûgwanja. Mûthenyarî wa mûgwanja nîrîo maambîrîîrie kûrûa, na Aisiraeli nîmaaûragire Asîria ngiri îgana rîmwe (100,000) mûthenya ûcio.

³⁰ Arîa maatigarire nîmaaûrire makîthiî îtûûrarî rîa Afeku. Nacio nthingo cia îtûûra rîu nîciomomokire na ikîûraga andû ngiri mîrongo îîrî na mûgwanja (27,000) ao. Benihadadi wanake nîwaûrîre îtûûrarî na akîîthitha nyombarî îmwe ya ndaarî kûu îtûûrarî.

³¹ Ndungata ciake nîciamwîrire atîrî, “Nîtwîguîte atî athamaki a Isiraeli marî ntha. Twîtîkîrie twîrigice nguo cia macakaya ciûnorî cietû na twîrigice mîkanda ngingorî cietû tûthiî kûrî mûthamaki wa Isiraeli, avota kûrega gûkûûraga.”

³² Kwoguo nîmeerigicire nguo cia macakaya na makîîrigica mîkanda ngingorî ciao. Nîmaathiîre kûrî mûthamaki Ahabu na makîmwîra atîrî, “Ndungata yaku, Benihadadi arakûthaitha ndûkamûrage.” Nake Ahabu nîwaugire atîrî, “Kwoguo arî wa mwoyo? Ke nî mûrwaiya!”

³³ Ndungata cia Benihadadi meetererete megue ûndû mwaro, na rîrîa Ahabu aagwetire mûrwaiya, nîrîo maamwîrire atîrî, “Wata ûguo wauga, Benihadadi nî mûrwanyûkwe!” Ahabu nîwathanire akiuga atîrî, “Thiîni mûndetere ke.” Rîrîa Benihadadi aakinyire Ahabu nîwamwîtire mekare nake gîkaarirî gîake.

³⁴ Benihadadi nîwerire Ahabu atîrî, “Nîngaagûcokeria matûûra marîa vava aacunire aguo, na nwa wambîrîrie thoko kûu Damesiki, wata ûrîa vava eekire kûu Samaria.” Nake Ahabu nîwamûcokerie atîrî, “Nîngûrekereria nîûndû wa ûguo wauga.” Kwoguo Ahabu nîwarûthire kîrîkanîro na Benihadadi na akîmûrekereria akîthiî.

Mûrathi nîwarumire Ahabu

³⁵ Ngai-Mûnene nîwathire mûndû ûmwe kuuma gîkundirî Kîam arathi amûrithie mûrathi ûmwe amûringe. Nwatî nîwaregire.

³⁶ Kwoguo nîwamwîrire atîrî, “Nîûndû nîwaregire kwathîkîra Ngai-Mûnene, nî ûragwa nî mûnyambû twatigana nawe.” Na vîndî wa îo aamûtigire, mûnyambû nîwatûnganire nake na ûkîmûraga.

³⁷ Mûrathi wa ûcio nîwathiîre kûrî mûndû wîngî akîmûthaitha amûringe. Mûndû ûcio nîwaringire mûrathi ûcio na vinya na akîmûtivia.

³⁸ Kwoguo mûrathi nîwathiîre, akîîyova ûthiû na gîtambaa nîguo erigarie na akîrûngama rûtererî rwa njîra, etererete mûthamaki wa Isiraeli avîtûke.

³⁹ Rîrîa mûthamaki wa Isiraeli aavîtûkaga, mûrathi nîwamwîtire na akîmwîra atîrî, “Mwathi wakwa, nie ndungata yaku naarî mbaararî, rîrîa mûthigari aandeteere mûndû ûmwe na akîmbîra, atî menyerere mûndû ûcio; na angîkaaûra nîkwa ngaaûragwa, kana ndîve sîlûva ngiri ithatû (3,000).

⁴⁰ Nwatî nînaagwatirwe nî maûndû mengî na mûndû ûcio akîûra.” Nake mûthamaki wa Isiraeli nîwacokirie atîrî, “We nîwe wetuîra, na nwanginya ûvingie îtuîro rîaku.”

⁴¹ Mûrathi nîweyovorire gîtambaa ûthiûrî wake na îvenya, na wa rîmwe, mûthamaki wa Isiraeli nîwamûmenyire atî nî ûmwe wa arathi.

⁴² Mûrathi nîwacokire akîra mûthamaki atîrî, “Ngai-Mûnene arauga atî, ‘Nîûndû nîûrekereretie mûndû aûre, ûrîa naathanîte aûragwe, we nîwe ûkûûragwa vandûrî vake, nacio ndungata ciaku ciûragwe nîûndû wa kûrekereria ndungata cia mûndû ûcio ciûre.’ ”

⁴³ Mûthamaki wa Isiraeli nîwacokire gwake mûciî Samaria arî mûmaku na arî mûrakaru.