1Atha 2 - ÎVUKU RÎA ÛVORO MWARO

Mataaro ma mûthiia ma Daudi kûrî Solomoni

¹ Rîrîa Daudi aarî vakuvî gûkua, nîwavere mûvîcî Solomoni mataaro ma mûthiia akîmwîra atîrî,

² “Rîu nîrî vakuvî gûkua, gîa na vinya na wîyûmîrîrie,

³ na wîkage ûrîa Ngai-Mûnene, Ngai waku akwathîte wîkage. Vingagia mawatho make monthe, maathani make, matuîro make ma ciira na kîrîra gîake, wata ûrîa kwandîkîtwe wathorî wa Musa, nîguo ûkaathatûkwa mawîrarî monthe marîa ûkaaruta kûrîa kuonthe ûkaathiî.

⁴ Ngai-Mûnene akaavingia kîîranîro gîake kîrîa aambîrîîre atî njiarwa ciakwa nîikaatha Isiraeli ethîrwa nîikaavingia mawatho marîa nîmavete na methagîrwe marî evokeku kûrî nie na ngoro ciao cionthe na mîoyo yao yonthe.

⁵ “Taririkana ûrîa Joabu mûvîcî wa Zeruia aambîkire. Ke nîwaûragire anene aîrî a athigari a Isiraeli, Abineri mûvîcî wa Neri na Amasa mûvîcî wa Jetheri. Aamaûragire vîndî îrîa kwarî na thayû nîguo erîvîrîrie nîûndû wa ûrîa maaûraganîte vîndî îrîa kwarî na mbaara. Ke aaûragire andû mataarî na mavîtia na ûndû ûcio eekire ûkînjokerera, na nîguo ûtûmîte ngîe na mathîna.

⁶ Nwanginya ûtûmîre ûûgî na ûmûrage ndûgetîkîre agaakua nî ûkûrû.

⁷ “Nwatî wîke avîcî a Barizilai Mûgileadi maûndû maro na mûrîcanagîre nao nîûndû nîmaambîkire maûndû maro rîrîa naaûraga kuuma kûrî mûrwanyûkwe Abusalomu.

⁸ “Ririkana wana Shimei mûvîcî wa Gera, wa mûvîrîga wa Benjamini kuuma îtûûrarî rîa Bahurimu mûrî nake. Nîwanumire kîrumi kînene mûno mûthenya ûrîa naathiîre Mahanaimu, nwatî rîrîa aandûngire Jorodani nînevîtire mbere yake na rîîtwa rîa Ngai-Mûnene, atî ndikaamûûraga.

⁹ Nwatî nwanginya ûmûverithie. Nwanginya ûtûmîre ûûgî na wone nama atî nîwaûragwa.”

Gûkua kwa Daudi

¹⁰ Daudi nîwakwire na akîthikwa îtûûrarî rînene rîa Daudi.

¹¹ Daudi aathanire kûu Isiraeli îvinda rîa mîaka mîrongo îna (40.) Nîwathanire arî Heburoni îvinda rîa mîaka mûgwanja (7) na akîathana arî Jerusalemu îvinda rîa mîaka mîrongo îthatû na îthatû (33.)

¹² Kwoguo Solomoni nîwatuîkire mûthamaki vuva wa îthe Daudi na ûthamaki wake ûkîîvanda waro mûno.

Gûkua kwa Adonija

¹³ Adonija, ûrîa ng'ina eetagwa Hagithi nîwacokire akîthiî kûrî Bathisheba, ng'ina wa Solomoni. Nake Bathisheba nîwamûûririe atîrî, “Waûka na thayû?” Nake Adonija nîwacokirie atîrî, “Nîrî na thayû.”

¹⁴ Nîwacokire akiuga atîrî, “Nîrî na ûndû nîrenda gûkwîra.” Bathisheba nîwamûûririe atîrî, “Nî ûndû ûrîkû?”

¹⁵ Adonija nîwacokirie atîrî, “Nîwicî atî nînie nîngîatuîkire mûthamaki na atî andû onthe a Isiraeli nîguo meeriragîria. Nwatî nîgwekarire ûndû wîngî na mûrwaiya agîtuîka mûthamaki nîûndû nîguo Ngai-Mûnene eendete.

¹⁶ Rîu nîrî na ûndû ûmwe nîrenda gûkûûria ûmvingîrie, na nakûthaitha ndûkarege.” Nake Bathisheba nîwaûririe atîrî, “Nî ûndû ûrîkû?”

¹⁷ Adonija nîwacokirie atîrî, “Nakûthaitha îra mûthamaki Solomoni amve Abishagi, ûrîa wa kuuma Shunemu atuîke mûka wakwa nîûndû nîmbîcî tîaregana nawe.”

¹⁸ Nake Bathisheba nîwaugire atîrî, “Nî waro mûno. Nîngûkwarîrîria kûrî mûthamaki.”

¹⁹ Kwoguo Bathisheba nîwathiîre kûrî mûthamaki Solomoni kwaria nake vandûrî va Adonija. Mûthamaki nîwarûngamire, agîkethia ng'ina na akînamîrîria ûthiû mbere yake. Nîwacokire agîkarîra gîtî gîake Kîam ûthamaki na akiuga gîtî kîngî kîretwe kîrîa ng'ina eekarîre mwena wake wa ûrîo.

²⁰ Ng'ina nîwamwîrire atîrî, “Nîrî na kaûndû kanini nîrenda gûkûûria ûmvingîrie, na ndûkarege.” Nake mûthamaki nîwamûûririe atîrî, “Nî ûndû ûrîkû nyanya? Ndingîrega gûkûvingîria.”

²¹ Ng'ina nîwamwîrire atîrî, “Îtîkîra Abishagi Mûshunemu anenganîrwe kûrî Adonija mûrwanyûkwe nîguo atuîke mûka.”

²² Mûthamaki Solomoni nîwacokerie ng'ina atîrî, “Ûrambûria nenganîre Abishagi, Mûshunemu kûrî Adonija nîkî? Ûguo nîta kûmbûria nîmûve ûthamaki wanaguo. Menya atî Adonija nî mûrwaiya ûrîa mûkûrû na mûthînjîri-Ngai Abiatharu, marî na Joabu mûvîcî wa Zeruia nîmamûnyitîte mbaru.”

²³ Solomoni nîwacokire akîîvîta na rîîtwa rîa Ngai-Mûnene akiuga atîrî, “Ngai arombûraga na ambîke ûndû mûcûku makîria, ethîrwa tîmbûraga Adonija nîûndû wa ûguo aûrîtie!

²⁴ Nevîta na Ngai-Mûnene ûrîa ûtûûraga mwoyo, atî Adonija nîakûragwa ûmûnthî! Ngai-Mûnene nîke ûmvete vinya na amva gîtî Kîam ûthamaki Kîam vava Daudi, na nwake ûvete njiarwa ciakwa ûthamaki wata ûrîa eeranîre.”

²⁵ Kwoguo mûthamaki Solomoni nîwathire Benaia mûvîcî wa Jehoiada athiî akaûrage Adonija. Nake nîwathiîre na akîmûraga.

Kwîngatwa kwa Abiatharu na gûkua kwa Joabu

²⁶ Mûthamaki Solomoni nîwacokire akîra mûthînjîri-Ngai Abiatharu atîrî, “Thiî vûrûrirî waku wa Anathothi. We wagîrîrwe nî gûkua, nwatî rîu tîngûûraga nîûndû nîwe wamenyagîrîra îthandûkû rîa kîrîkanîro Kîam Ngai-Mûnene rîrîa mwarî na vava Daudi, na nîwanyitanîrîte nake mathînarî make.”

²⁷ Kwoguo Solomoni nîwatigithirie Abiatharu gûtungata arî mûthînjîri-Ngai wa Ngai-Mûnene, na kwoguo Solomoni nîwavingirie ûrîa Ngai-Mûnene aaugîte arî Shilo wîgiî Eli na njiarwa ciake.

²⁸ Rîrîa Joabu eegwire ûguo, nîwaûrire na akîthiî îgemarî rîa Ngai-Mûnene na akînyita mîthiia ya metha ya kîgongoona, nîûndû Joabu aanyitîte mbaru Adonija nwatî, tî Abusalomu.

²⁹ Mûthamaki Solomoni nîwerirwe atî Joabu nîwaûrîte akathiî îgemarî rîa Ngai-Mûnene na atî aarî vakuvî na metha ya kîgongoona. Kwoguo mûthamaki Solomoni nîwatûmire Benaia athiî akaûrage Joabu.

³⁰ Benaia nîwathiîre îgemarî rîa Ngai-Mûnene na akîra Joabu atîrî, “Mûthamaki athana ume nja.” Nake Joabu nîwacokirie atîrî, “Naarî, nînguîra gûkû.” Benaia nîwathiîre kûrî mûthamaki na akîmwîra ûrîa Joabu aacokirie.

³¹ Solomoni nîwerire Benaia atîrî, “Îka ûguo Joabu akwîra. Mûrage na ûmûthike. Weka ûguo, nie wana njiarwa cia Daudi, gûtirî mûndû ûgaacokwa nî nthakame îrîa Joabu eetûrûrire rîrîa aaûragire andû matarî na mavîtia.

³² Ngai-Mûnene nîakaaverithia Joabu nîûndû wa andû acio aaûragire vava Daudi atakûmenya. Joabu aaûragire arûme aîrî matarî na mavîtia na maarî aro kûmûkîra. Nao maarî: Abineri mûvîcî wa Neri na mûtongoria wa athigari a Isiraeli, na Amasa mûvîcî wa Jetheri mûtongoria wa athigari a Juda.

³³ Kwoguo Joabu na njiarwa ciake nîmatûûra marî na kîrumi tene na tene nîûndû wa gîkuû Kîam andû acio. Nwatî Ngai-Mûnene nîatûûra avecaga Daudi, andû a mûciî wake, njiarwa ciake na ûthamaki wake thayû na ûvootani.”

³⁴ Kwoguo Benaia, mûvîcî wa Jehoiada nîwathiîre îgemarî rîa Ngai-Mûnene na akîûraga Joabu na mwîrî wa Joabu nîwathikirwe gwake mûciî kûu werûrî.

³⁵ Mûthamaki nîwatuire Benaia, mûvîcî wa Jehoiada mûnene wa athigari a mbaara vandûrî va Joabu, agîcoka agîtua Zadoku mûthînjîri-Ngai vandûrî va Abiatharu.

Gûkua gwa Shimei

³⁶ Mûthamaki nîwacokire agîtûmanîra Shimei na akîmwîra atîrî, “Îîtumîre nyomba gûkû Jerusalemu na ûtûûre kuo, na ndûkaume kuo ûthiîte kûndû kwîngî.

³⁷ Ûngîkaauma îtûûrarî rîu na ûringe karûnjî ga Kidironi, ûkaamenya nama atî nwanginya ûgaakua na nîwe ûkethîrwa wîyûragithîtie.”

³⁸ Nake Shimei nîwacokerie mûthamaki atîrî, “Nî waro mwathi wakwa, nîngwîka ûguo wambîra.” Kwoguo Shimei nîwatûûrire Jerusalemu îvinda îraca.

³⁹ Vuva wa mîaka îthatû, ndungata igîrî cia Shimei nîciaûrire ikîthiî kûrî Akishi, mûvîcî wa Maaka, na nîke warî mûthamaki wa Gathu. Rîrîa Shimei eegwire atî ndungata ciake ciarî Gathu,

⁴⁰ nîwatwîre îgûrû rîa mvunda yake na akîthiî Gathu kûrî mûthamaki Akishi gûcaria ndungata ciake. Nîwamonire na akîmacokia mûciî kuuma Gathu.

⁴¹ Rîrîa Solomoni eerirwe atî Shimei nîwaumîte Jerusalemu akathiî Gathu na agacoka,

⁴² nîwamûtûmanîre na akîmwîra atîrî, “Naakwîvîtithirie na rîîtwa rîa Ngai-Mûnene atî ndûkaume Jerusalemu. Na nînaakwîrire atî ûngîkaauma kuo, nama nîûgaakua. We nîwetîkîrire na ûkiuga atî ûkambathîkîra.

⁴³ Waregire kûvingia kîîranîro gîaku kûrî Ngai-Mûnene na ûkîrega kûvingia watho ûrîa naakwathire nîkî?

⁴⁴ Nîwîcî waro mavîtia monthe marîa wekire vava Daudi. Kwoguo Ngai-Mûnene nîagaakûverithia nîûndû wamo.

⁴⁵ Nwatî Ngai-Mûnene nîakaandathima na atûûre amenyagîrîra ûthamaki wa Daudi tene na tene.”

⁴⁶ Mûthamaki nîwacokire akîatha Benaia mûvîcî wa Jehoiada athiî akaûrage Shimei. Nake Benaia nîwathiîre na akîûraga Shimei. Naguo ûthamaki nîwevandire vîndî îrîa mûthamaki Solomoni aathanaga.