1Atha 19 - ÎVUKU RÎA ÛVORO MWARO

Elija nîwaûrîre Kîrîmarî kîa Horebu

¹ Mûthamaki Ahabu nîwerire Jezebeli maûndû monthe marîa Elija eekîte wana ûrîa Elija aaûragîte arathi onthe a Baali na rûviû.

² Nake Jezebeli nîwatûmire mûnjaama kûrî Elija akamwîre atîrî, “ngai irombûraga ethîrwa rûyû îthaa ta rîîrî ndikaagwîka wata ûrîa wekire arathi.”

³ Elija nîwamakire na akîûra akîthiî Beerisheba, îtûûra rîa Juda nîguo athare mwoyo wake. Kûu nîkuo Elija aatigire ndungata yake,

⁴ na akîthiî werûrî rûgendo rwa mûthenya mûgima. Nîwakinyire vandû vaarî na mûtî na agîkara nthî kîrururî Kîamguo, nîwerirîrie gûkua na akîvoya atîrî, “Rîu Ngai-Mûnene maûndû mau monete nîmeganu, wana nî kava nguîte ta methe makwa ma tene!”

⁵ Nîwamamire nthî rungu rwa mûtî na akîgwatwa nî toro. Wa rîmwe mûraika nîwamûvutirie na akîmwîra atîrî, “Ûkîra ûrîe.”

⁶ Elija nîwaroririe na akîona mûgate wî mûruge ûrî îgûrû rîa makara ma mwaki vakuvî na kîongo gîake. Nîwacokire akîona nyûngû îrî na manjî. Nîwarîre na akînyua, agîcoka akîmama rîngî.

⁷ Mûraika wa Ngai-Mûnene nîwacokire rîngî na akîmûvutia riita rîa kaîrî. Nîwamwîrire atîrî, “Ûkîra ûrîe, nîûndû rûgendo rûrîa ûkûthiî nî rûraca mûno.”

⁸ Kwoguo Elija nîwaûkîrire, akîrîa na akînyua na irio icio nîciamwîkîrire vinya na akîthiî rûgendo rwa mîthenya mîrongo îna, ûtukû na mûthenya akîthiî Horebu, kîrîmarî Kîam Ngai.

⁹ Arî kûu, nîwatoonyire ngurungarî na akîraara kuo. Wa rîmwe Ngai-Mûnene nîwamumîrîre na akîmûria atîrî, “Elija, ûreka atîa ava?”

¹⁰ Nake Elija nîwacokirie atîrî, “Ngai-Mûnene, mwene vinya wonthe, ndwîre ngûtungatagîra wa we wenga. Nwatî andû a Isiraeli nîmareganîte na kîrîkanîro gîaku. Nîmomorete metha ciaku cia magongoona, na makaûraga arathi aku onthe na rûviû. Nînie nienga tu ndigarîte, na nîkwa marenda kûmbûraga!”

¹¹ Ngai-Mûnene nîwamwîrire atîrî, “Uma ûthiî ûrûngame mbere ya Ngai-Mûnene îgûrû rîa kîrîma.” Vîndî wa îo Ngai-Mûnene nîwavîtûkîrîre vau. Naruo rûkûngi rûnene mûno nîrwainainirie irîma na rûgîatûranga mathiga tûcunjî mbere ya Ngai-Mûnene, nwatî Ngai-Mûnene ndaarî rûkûngirî. Vuva wa rûkûngi nîgwacokire gûkîgîa kîthingithia, nwatî Ngai-Mûnene ndaarî kîthingithiarî.

¹² Vuva wa kîthingithia nîgwacokire gûkîgîa mwaki, nwatî Ngai-Mûnene ndaarî mwakirî. Vuva wa mwaki nîgwacokire gûkîgîa kamûgambo gaceke kaaragia na kîvûe.

¹³ Rîrîa Elija eegwire kamûgambo kau, nîwekunîkire ûthiû wake na nguo yake na akiuma akîrûngama mûromorî wa ngurunga. Na wa rîmwe nîwegwire mûgambo ûkîmûria atîrî, “Elija, ûreka atîa ava?”

¹⁴ Nake Elija nîwacokirie atîrî, “Ngai-Mûnene, mwene vinya wonthe, ndwîre ngûtungatagîra wa we wenga. Nwatî andû a Isiraeli nîmareganîte na kîrîkanîro gîaku. Nîmomorete metha ciaku cia magongoona, na makaûraga arathi aku onthe na rûviû. Nînie nienga tu ndigarîte, na nîkwa marenda kûmbûraga.”

¹⁵ Ngai-Mûnene nîwerire Elija atîrî, “Coka werûrî wa Damesiki, na wakinya îtûûrarî rîa Damesiki, wîtîrîrie Hazaeli maguta nîguo atuîke mûthamaki wa Sîria;

¹⁶ wîtîrîrie Jehu mûvîcî wa Nimushi maguta nîguo atuîke mûthamaki wa Isiraeli, na wîtîrîrie Elisha mûvîcî wa Shafati kuuma Abeli Mehola maguta nîguo atuîke mûrathi vuva waku.

¹⁷ Mûndû ûrîa ûkaavonoka kûûragwa nî Hazaeli nîakaaûragwa nî Jehu, na mûndû ûrîa ûkaavonoka kûûragwa nî Jehu nîakaaûragwa nî Elisha.

¹⁸ Kûnarî ûguo, nîndigarîtie andû ngiri mûgwanja (7,000) marî mwoyo kûu Isiraeli. Andû acio nî arîa onthe maambathîkagîra na mataanenamîrîria mothiû mao kûrî Baali kana mamumunya mûvuanano wake.”

Gwîtwa kwa Elisha

¹⁹ Elija nîwaumire vau, akîthiî na akîthîrîria Elisha mûvîcî wa Shefati akîrîma na ikundi îkûmi na igîrî cia ndegwa; ikundi îkûmi na kîmwe ciarî mbere yake, nwatî ke mwene aarîmaga na gîkundi gîa îkûmi na igîrî. Elija nîwavîtûkîrîre vakuvî na Elisha, akîruta nguo yake na agikîria Elisha yo.

²⁰ Elisha nîwacokire agîtiga ndegwa ciake, akîvinyûra kûrî Elija na akîmwîra atîrî, “Tiga nyambe mbugîre vava na nyanya ûvoro, njoke ngûrûmîrîre.” Elija nîwamwîrire atîrî, “Îî coka; nie ndirakûgiria.”

²¹ Kwoguo Elisha nîwacokire gîkundirî Kîam ndegwa ciake, akîithînja na akîruga nyama, agîtûmagîra îcoki rîrî ngû. Nîwavecanire nyama kûrî andû, na makîrîa. Nîwacokire akîrûmîrîra Elija na agîtuîka ndungata yake.