1Atha 18 - ÎVUKU RÎA ÛVORO MWARO

Elija na arathi a Baali

¹ Vuva wa mîthenya mîîngî, mwakarî wa kathatû, Ngai-Mûnene nîwerire Elija atîrî, “Thiî wîyonithanie kûrî mûthamaki Ahabu, na nîngurithia mbura nthî.”

² Kwoguo Elija nîwathiîre kwîyonithania kûrî Ahabu. Vîndî îo yûra rîarî rînene mûno kûu Samaria.

³ Ahabu nîwetire Obadia, ûrîa warî mûmenyereri wa nyomba ya mûthamaki. (Obadia aarî mûndû mûgooci Ngai-Mûnene mûno,

⁴ na rîrîa Jezebeli aaûragaga arathi a Ngai-Mûnene, Obadia nîwocire arathi îgana rîmwe na akîmathitha ngurungarî marî ikundi igîrî cia arathi mîrongo îtano, na akîmava mîgate na manjî.)

⁵ Ahabu nîwerire Obadia atîrî, “Tiga tûthiî vûrûrirî tûkarorie ithimarî cionthe cia manjî na ndeererî cionthe cia nyûnjî twone kana nîtûkwona nyaki mbîganu ya kûva mbarathi na nyûmbû nîguo itigakue cionthe.”

⁶ Kwoguo nîmaagaanirie vûrûri maita maîrî nîguo mavote kûûthiûrûrûka wonthe. Ahabu nîwathiîre mwena ûmwe, nake Obadia akîthiî mwena ûcio wîngî.

⁷ Obadia arî njîrarî athiîte, nîwacemanirie na Elija. Nîwamenyire Elija na akînamîrîria ûthiû wake mbere yake na akîmûria atîrî, “Nama, nîwe mwathi wakwa Elija?”

⁸ Nake Elija nîwacokirie atîrî, “Îî nînie. Thiî wîre mwathi waku mûthamaki, atî ‘Elija arî gûkû.’ ”

⁹ Nwatî Obadia nîwerire Elija atîrî, “Nî wîvia ûrîkû mbîkîte, atî nîguo ûndûme kûrî mûthamaki Ahabu nîguo ambûrage?

¹⁰ Nînîvîta na Ngai-Mûnene, Ngai waku ûrîa ûtûûraga mwoyo, atî mûthamaki nîaugîte ûcarue mavûrûrirî monthe nthî ng'ima. Rîrîa mûthamaki wa vûrûri mûna auga atî ndûrî vûrûrirî wake, Ahabu nîwendaga mûthamaki ûcio evîte atî ndûrî vûrûrirî ûcio.

¹¹ Na rîu ûrenda nthiî ngamwîre atî wî gûkû.

¹² Î narîo Roho wa Ngai-Mûnene angîgwoca na akûvire kûndû ndaicî narîkia kuuma ava? Nacoka nera Ahabu, atî wî gûkû nake arege gûkwona, kinthî ndakûmbûraga? Ririkana, atî ndwîre nîrî mûgooci Ngai-Mûnene na vinya mûno kuuma nîrî kamwana.

¹³ Nîkwa ûtanerwa ûrîa nekire vîndî îrîa Jezebeli aaûragaga arathi a Ngai-Mûnene, rîrîa naathithire arathi îgana marî ikundi igîrî cia arathi mîrongo îtano na ngîmava mîgate na manjî?

¹⁴ Rîu ûrambîra nthiî ngeere mûthamaki atî wî gûkû nîkî? Ke nîakûmbûraga!”

¹⁵ Nake Elija nîwacokirie atîrî, “Nevîta na Ngai-Mûnene mwene vinya wonthe, ûrîa ndungatagîra, atî nîngûthiî kûrî mûthamaki ûmûnthî.”

¹⁶ Kwoguo Obadia nîwathiîre kûrî mûthamaki Ahabu na akîmûva ûvoro ûcio, nake Ahabu nîwacokire akîthiî kwona Elija.

¹⁷ Rîrîa Ahabu oonire Elija, nîwamwîrire atîrî, “Kwoguo wî gûkû, we mûndû ûrîa ûretaga thîna gûkû Isiraeli!”

¹⁸ Nake Elija nîwacokirie atîrî, “Nie ndianarete thîna gûkû Isiraeli; Nwatî we mûrî na andû a mûciî wa aguo nîmue mûretaga thîna gûkû Isiraeli, nîûndû nîmûregete kwathîkîra maathani ma Ngai-Mûnene na mûkagooca mîvuanano ya Baali.

¹⁹ Rîu athana andû onthe a Isiraeli magomane kîrîmarî gîa Karimeli tûcemanie nao kuo. Mûke na arathi magana mana ma mîrongo îtano (450) a Baali na arathi magana mana (400) a Ashera, ngai ya nga, arîa marîcanagîra na Jezebeli.”

²⁰ Kwoguo Ahabu nîwatûmanîre Aisiraeli onthe na agîta arathi onthe a Baali na onthe magîtûngana kûu kîrîmarî gîa Karimeli.

²¹ Nake Elija nîwathiîre kûrî andû acio na akîmaûria atîrî, “Nîmwîthîrwa mûrî na mathangania na nganja nginya rî? Ethîrwa Ngai-Mûnene nî Ngai, mûgooceni; nwatî ethîrwa Baali nîke Ngai, mûgooceni!” Nwatî andû matiamwîra wanarî ûndû.

²² Elija nîwacokire akîra andû atîrî, “Nînie tu ndigarîte nîrî mûrathi wa Ngai-Mûnene nwatî arathi a Baali nî magana mana ma mîrongo îtano (450).

²³ Twindîreni ndegwa igîrî; arathi a Baali nîmathuure îmwe, mamîûrage, mamîtinangie tûcunjî, macoke mamigîrîre îgûrû rîa ngû; nwatî matigakie mwaki. Nanie nîngwoca ndegwa îo îngî, nîmîvarîrie na nîmigîrîre îgûrû rîa ngû na tîmbakia mwaki.

²⁴ Arathi a Baali nîmacoke mete rîîtwa rîa ngai wao, nanie nîngwîta rîîtwa rîa Ngai-Mûnene. Ngai ûrîa ûgûcokia na njîra ya kûrete mwaki, ûcio nîke Ngai wa ma.” Nao andû onthe nîmeetîkirie atî ûndû ûcio nî mwaro.

²⁵ Elija nîwacokire akîra arathi a Baali atîrî, “Nîûndû mue mûrî eengî, ambani mwîthuurîre ndegwa îmwe na mûmîvarîrie. Mwîte rîîtwa rîa ngai wenyu, nwatî mûtigakie mwaki.”

²⁶ Nao arathi acio nîmoocire ndegwa îo maanengerirwe, makîmîvarîria na magîta Baali kuuma kîraûko nginya thaa thita cia mûthenya makiugaga atîrî, “We Baali, twîgue!” Nao nîmaainaga makîrûgarûgaga mathiûrûrûkîrîtie metha ya kîgongoona îrîa maatumîte, nwatî matiegua wanarî mûgambo kana macokio.

²⁷ Rîrîa thaa thita cia mûthenya ciakinyire, Elija nîwambîrîre kûmathekerera akîmeeraga atîrî, “Voyani mugîrîrîtie mûno, nîûndû ke nî ngai! Nwaethîrwe arî na maûndû areciria, kana arî na kaûndû areka, kana nîmûthiîu rûgendo! Kana nwa ethîrwe amamîte, na nwanginya mûmûramûkie!”

²⁸ Kwoguo arathi acio nîmaaugîrîrie na mîgambo mînene mûno na magîîtemanga na mviû na matumû kûringana na mûtugo wao, nginya makiura nthakame mûno.

²⁹ Wana thaa thita ciavîtûka, nîmaathiîre na mbere kugîrîria ta andû a ngoma makîvoyaga ngai wao nginya kîvwaî rîrîa matega maarutagwa; nwatî gûtirî mûgambo weguîkire, gûtirî mûndû wamacokerie na gûtirî mûndû wamathikîrîrie.

³⁰ Elija nîwacokire akîra andû onthe atîrî, “Ûkani vakuvî nanie.” Nao andû onthe nîmaathiîre vakuvî nake. Elija nîwatumire rîngî metha ya kîgongoona ya Ngai-Mûnene îrîa yamomoretwe.

³¹ Nîwocire mathiga îkûmi na maîrî kûringana na mîvîrîga ya avîcî a Jakovu. Jakovu nîke werîtwe nî Ngai-Mûnene atî nîageetwa Isiraeli.

³² Elija nîwatumîre Ngai-Mûnene rîngî metha ya kîgongoona na mathiga mau. Nîwenjire mûtaro ûmîthiûrûrûkîrîtie. Mûtaro ûcio nîûngîeganîre ndeve îmwe na nuthu ya mbeû.

³³ Nîwacokire akîvanga ngû waro îgûrû rîa metha ya kîgongoona, agîtinangia ndegwa icunjî, akîmigîrîra îgûrû rîa ngû na akîra andû atîrî, “Îcûriani manjî nyûngûrî inya na mûmetûrûre îgûrû rîa matega ma kûvîvua na îgûrû rîa ngû.” Nao nîmeekire guo.

³⁴ Nîwacokire akîmeera atîrî, “Îkani guo rîngî.” Nao nîmeekire guo riita rîa kaîrî. Elija nîwacokire akîmeera rîngî atîrî, “Îkani wa ûguo rîngî riita rîa kathatû. Nao andû nîmeekire waguo riita rîa kathatû.”

³⁵ Manjî nîmeetîkire mîenarî yonthe ya metha ya kîgongoona nginya magîcûra mûtarorî.

³⁶ Rîrîa îthaa rîa kûruta matega ma kîvwaî rîakinyire, mûrathi Elija nîwakuvîvîrie metha ya kîgongoona na akîvoya atîrî, “We Ngai-Mûnene, Ngai wa Iburahimu, Isaka, na Jakovu, onania ûmûnthî atî we nîwe Ngai wa Isiraeli na atî nie nîrî ndungata yaku na mbîkîte maûndû mama monthe na watho waku.

³⁷ Nthikîrîria we Ngai-Mûnene, nthikîrîria, nîguo andû aya mamenye, atî we Ngai-Mûnene nîwe Ngai na, atî nîwe ûragarûra ngoro ciao magûcokerere.”

³⁸ Vîndî wa îo mwaki wa Ngai-Mûnene nîwaumire îgûrû na ûkîvîvia matega, ngû, mathiga, mûthetu na ûkînyarithia manjî marîa maarî mûtarorî.

³⁹ Rîrîa andû onthe moonire ûguo, nîmegwîthirie maturumithîtie mothiû mao nthî na makîanîrîra atîrî, “Ngai-Mûnene nîke Ngai! Ngai-Mûnene nîke Ngai!”

⁴⁰ Elija nîwathire andû acio atîrî, “Nyitani arathi a Baali; na mûtikareke wanarî ûmwe wao aûra!” Nao andû nîmaanyitire arathi onthe a Baali, na Elija nîwaugire manyûrûrûkue karûnjîrî ga Kishoni na akîmaûragîra vo.

Mûthiia wa gûtura mbura

⁴¹ Vuva wa ûguo, Elija nîwerire mûthamaki Ahabu atîrî, “Rîu thiî ûkarîe na ûnyue; nîûndû nînîregua mûrurumo wa mbura yûkîte.”

⁴² Kwoguo Ahabu nîwathiîre akarîe na anyue; nake Elija nîwaunûkirie îgûrû rîa kîrîma gîa Karimeli. Nîwenamîrîrie ûthiû wake nthî, na agîkîra kîongo gatagatî ka maru make.

⁴³ Nîwacokire akîra ndungata yake atîrî, “Rîu thiî na ûrorie mwena wa îriarî.” Ndungata nîyathiîre, îkîroria na îgîcoka. Nîyamwîrire atîrî, “Ndirona kîndû.” Nake Elija nîwamwîrire maita mûgwanja “Thiî ûkarorie.”

⁴⁴ Riitarî rîa mûgwanja, ndungata îo nîyacokire na îkiuga atîrî, “Nînona gatu kanini kegana ta njara ya mûndû gakiumîra îriarî.” Elija nîwerire ndungata yake îthiî kûrî Mûthamaki Ahabu îkamwîre arûthe gîkaari gîake na acoke mûciî mbere ya mbura îmûvingîrîria.

⁴⁵ Vuva wa kavinda kanini îgûrû nîrîathimbire nîûndû wa matu mairû na rûkûngi, na mbura nene nîyaurire. Nake Ahabu nîwatwîre gîkaarirî gîake na akîthiî Jezireeli.

⁴⁶ Vinya wa Ngai-Mûnene nîwatoonyire kûrî Elija; nîwacinîkîre nguo yake ndaca kîûnûrî na akîvinyûra mbere ya Ahabu nginya kîvingorî Kîam Jezireeli.