1Atha 16 - ÎVUKU RÎA ÛVORO MWARO

¹ Ngai-Mûnene nîwatûmire mûrathi Jehu mûvîcî wa Hanani kûrî Baasha akamwîre atîrî,

² “We warî mûndû ûtarî na vata, nwatî nînaagûtûgîririe na ngîgûtua mûtongoria wa andû akwa, Aisiraeli. Na rîu nîwîvîtie ta Jeroboamu na ûgatûma andû akwa, Aisiraeli mevie, namo mevia mao magatûma ndakare.

³ Kwoguo nîngûkûthiria viû wa vamwe na andû a nyomba yaku, wata ûrîa neekire andû a nyomba ya Jeroboamu mûvîcî wa Nebati.

⁴ Mûndû wa wonthe wa nyomba yaku ûrîa ûgaakuîra îtûûrarî rîrîa rînene nîakaarîwa nî ngui, nake mûndû wa wonthe wa nyomba yaku ûrîa ûgaakuîra werûrî nîakaarîwa nî nderi.”

⁵ Maûndû marîa mengî monthe marîa Baasha eekire vamwe na ciîko ciake nîmandîke îvukuurî rîa maûndû ma tene ma athamaki a Isiraeli.

⁶ Baasha nîwacokire agîkua na akîthikwa kûu Tiriza, nake mûvîcî Ela nîwatuîkire mûthamaki vuva wake.

⁷ Ndûmîrîri îo yatûmanirwe nî Ngai-Mûnene kûrî Baasha na andû a nyomba yake, yavecanirwe nî mûrathi Jehu mûvîcî wa Hanani nîûndû wa mevia marîa Baasha eekîte mbere ya Ngai-Mûnene. Baasha aarakaririe Ngai-Mûnene nîûndû wa maûndû macûku marîa eekire wata marîa mûthamaki Jeroboamu eekîte, wa vamwe na kûûraga andû onthe a nyomba ya Jeroboamu.

Ela, mûthamaki wa Isiraeli

⁸ Mwakarî wa mîrongo îîrî na îtandatû (26) Asa arî mûthamaki wa Juda, Ela mûvîcî wa Baasha nîwatuîkire mûthamaki wa Isiraeli, na nîwathanire arî kûu Tiriza îvinda rîa mîaka îîrî (2).

⁹ Ndungata yake Zimuri, ûrîa warî mûnene wa nuthu ya ikaari ciake cia mbarathi nîwavangire ûrîa akûmûraga. Mûthenya ûmwe mûthamaki Ela arî kûu Tiriza nîwanyuire ndivei arî mûciî kwa Ariza na akîrîwa. Ariza aarî mûmenyereri wa mûciî wa mûthamaki kûu Tiriza.

¹⁰ Nake Zimuri nîwatonyire kûu nyomba; akîmûringa na akîmûraga. Zimuri nîwacokire agîtuîka mûthamaki vuva wake. Ûndû ûcio wekîkire mwakarî wa mîrongo îîrî na mûgwanja (27) Asa arî mûthamaki wa Juda.

¹¹ Rîrîa Zimuri eekarîre gîtî Kîam ûthamaki wa rîo, nîwaûragire andû onthe a nyomba ya Baasha. Arûme onthe a mûciî wa Baasha na arata ake nîmaaûragirwe.

¹² Kwoguo wata ûrîa Ngai-Mûnene eerîte Baasha na njîra ya mûrathi Jehu, Zimuri nîwaûragire andû onthe a nyomba ya Baasha.

¹³ Baasha na mûvîcî Ela nîmeevirie mbere ya Ngai-Mûnene, Ngai wa Isiraeli na magîtûma andû a Isiraeli mevie nîûndû wa kûgooca mîvuanano. Nîmaarakaririe Ngai-Mûnene Ngai wa Isiraeli.

¹⁴ Maûndû marîa mengî monthe marîa Ela eekire nîmandîke Îvukuurî rîa Maûndû ma Tene ma Athamaki Isiraeli.

Zimuri, Mûthamaki wa Isiraeli

¹⁵ Mwakarî wa mîrongo îîrî na mûgwanja (27) Asa arî mûthamaki wa Juda, Zimuri nîwathanire Isiraeli arî Tiriza îvinda rîa mîthenya mûgwanja (7). Athigari a mbaara a Isiraeli nîmaathiûrûrûkîrie Gibethoni, îtûûra rînene rîa Filisiti.

¹⁶ Rîrîa meegwire atî Zimuri nîwavangîte ûrîa akûraga mûthamaki na akîmûraga, onthe nîmaacokire makîthuura Omuri, mûnene wa athigari a mbaara na agîtuîka mûthamaki wa Isiraeli mûthenya wa ûcio.

¹⁷ Omuri marî na andû onthe a Isiraeli nîmaaumire Gibethoni na makîthiî makîthiûrûrûkîria îtûûra rîa Tiriza.

¹⁸ Rîrîa Zimuri oonire atî îtûûra rîrîa rînene rîarî rîtave, nîwatonyire nyomba ya ndaarî ya mûthamaki, akîmundia nyomba ya mûthamaki mwaki, akîvîîra kuo na agîkua.

¹⁹ Ûndû ûcio wekîkire nîûndû wa mevia marîa eekîte arî mbere ya Ngai-Mûnene. Nîwarûmîrîre mîtugo ya Jeroboamu na agîtûma andû a Isiraeli mevie.

²⁰ Maûndû marîa mengî monthe marîa Zimuri eekire wa vamwe na mûvango ûrîa aavangîte wa kûûraga mûthamaki nîmandîke îvukuurî rîa maûndû ma tene ma Athamaki a Isiraeli.

Omuri, mûthamaki wa Isiraeli

²¹ Andû a Isiraeli nîmaagaûkanire ikundi igîrî. Gîkundi kîmwe kîendaga Tibuni mûvîcî wa Ginathu atuîke mûthamaki. Nakîo gîkundi kîu kîngî kîendaga Omuri atuîke mûthamaki.

²² Nwatî mûthiiarî, gîkundi kîrîa kîendaga Tibuni mûvîcî wa Ginathu atuîke mûthamaki nîkîavootirwe nî gîkundi kîrîa kîendaga Omuri atuîke mûthamaki. Kwoguo Tibuni nîwakwire na Omuri agîtuîka mûthamaki.

²³ Mwakarî wa mîrongo îthatû na ûmwe (31), Asa arî mûthamaki wa Juda, Omuri nîwatuîkire mûthamaki wa Isiraeli na nîwathanire îvinda rîa mîaka îkûmi na îîrî (12). Mîaka îtandatû aathanire arî Tiriza.

²⁴ Nîwagûrire kîrîma gîa Samaria na sîlûva ngiri ithathatû (6,000) kuuma kûrî Shemeri. Omuri nîwairigîre kîrîma kîu, agîtuma îtûûra kuo na akîrîtania na Shemeri ûrîa warî mwene kîrîma kîu. Omuri eetire îtûûra rîu Samaria.

²⁵ Omuri nîwevirie arî mbere ya Ngai-Mûnene makîria ya andû onthe arîa maarî athamaki mbere yake.

²⁶ Nîwarakaririe Ngai-Mûnene, Ngai wa Isiraeli nîûndû wa kûrûmîrîra mîtugo mîcûku ya Jeroboamu mûvîcî wa Nebati, nîûndû wa mevia make ke mwene, na gûtûma andû a Isiraeli mevie na magooce mîvuanano.

²⁷ Maûndû marîa mengî monthe marîa Omuri eekire wa vamwe na ûcamba ûrîa oonanirie nîmandîke Îvukuurî rîa Maûndû ma Tene ma Athamaki Isiraeli.

²⁸ Omuri nîwacokire agîkua na akîthikwa kûu Samaria, nake mûvîcî Ahabu agîtuîka mûthamaki vuva wake.

Ahabu, mûthamaki wa Isiraeli

²⁹ Mwakarî wa mîrongo îthatû na înana (38) Asa arî mûthamaki wa Juda, Ahabu mûvîcî wa Omuri nîwatuîkire mûthamaki wa Isiraeli na nîwathanire arî Samaria îvinda rîa mîaka mîrongo îîrî na îîrî (22).

³⁰ Ahabu, mûvîcî wa Omuri nîwevirie arî mbere ya Ngai-Mûnene makîria ya andû onthe arîa maarî athamaki mbere yake.

³¹ Makîria ya kûrûmîrîra mîtugo mîcûku îrîa yekîtwe nî mûthamaki Jeroboamu, Ahabu nîwavikirie Jezebeli mwarî wa Ethibaali, mûthamaki wa Sidoni. Nîwatungatîre Baali na akîmîgooca.

³² Nîwatumîre Baali hekarû kûu Samaria, akîmîtumîra metha ya kîgongoona na akîmiga kuo.

³³ Nîwacokire akîrûtha Ashera, mûvuanano wa ngai ya nga. Ahabu nîwarakaririe Ngai-Mûnene, Ngai wa Isiraeli makîria ya andû onthe arîa maarî athamaki a Isiraeli mbere yake.

³⁴ Vîndî ya ûthamaki wa Ahabu nîrîo Hieli wa kuuma Betheli aatumire rîngî îtûûra rîa Jeriko. Vîndî îrîa Hieli aatumire mûcingi wa îtûûra rîu, mûvîcî Abiramu, ûrîa warî îrikithathi nîwakwire. Na rîrîa aatumire ivingo ciarîo, mûvîcî Segubu, ûrîa warî kîvinga nda nîwakwire. Ûndû ûcio wekîkire kûringana na ûrîa Ngai-Mûnene aarîtie kûvîtûkîrîra kûrî Joshua mûvîcî wa Nuni.