1Atha 15 - ÎVUKU RÎA ÛVORO MWARO

Abija, Mûthamaki wa Juda

¹ Mwakarî wa îkûmi na înana (18) Jeroboamu, mûvîcî wa Nebati arî mûthamaki, Abija nîwatuîkire mûthamaki wa Juda,

² na akîathana îvinda rîa mîaka îthatû arî Jerusalemu. Ng'ina eetagwa Maaka mwarî wa Abusalomu.

³ Nîwekire mevia monthe ta marîa meekagwa nî îthe, na ndaarûmîrîra Ngai-Mûnene, Ngai wake na ngoro yonthe ta ûrîa îthe Daudi, îthe eekaga.

⁴ Nwatî nîûndû wa Daudi, Ngai-Mûnene, Ngai wake nîwavere Abija mwana wa kavîcî karîa gagaatuîka mûthamaki vuva wake nîguo gatuîke taa ya kûtherera Jerusalemu na kaige îtûûra rîu rîa Jerusalemu rîrî na vinya.

⁵ Ngai-Mûnene eekire ûguo nîûndû Daudi eekaga maûndû marîa maakenagia Ngai-Mûnene na ûtûûrorî wake wonthe ndaanarega kwathîkîra mawatho marîa aamwathîte, tiga ûvoro wîgiî Uria, ûrîa Mûhiti.

⁶ Ûtûûrorî wonthe wa Abija kwarî na mbaara gatagatî ka Rehoboamu na Jeroboamu.

⁷ Maûndû mau mengî monthe marîa Abija eekire nîmandîke îvukuurî rîa maûndû ma tene ma Athamaki a Juda. Kwarî na mbaara gatagatî ka Abija na Jeroboamu.

⁸ Abija nîwakwire na akîthikwa îtûûrarî rîrîa rînene rîa Daudi, nake mûvîcî Asa nîwatuîkire mûthamaki vuva wake.

Asa, Mûthamaki wa Juda

⁹ Mwakarî wa mîrongo îîrî (20) Jeroboamu arî mûthamaki wa Isiraeli, Asa nîwatuîkire mûthamaki wa Juda,

¹⁰ na akîathana îvinda rîa mîaka mîrongo îna na ûmwe (41) arî Jerusalemu. Ng'ina eetagwa Maaka, mwarî wa Abusalomu.

¹¹ Asa nîwekire maûndû marîa maakenagia Ngai-Mûnene wata ûrîa Daudi eekaga.

¹² Nîwengatire kuuma vûrûrirî arûme na aka onthe arîa maarî maraa ma ndini na akîruta mîvuanano yonthe îrîa yarûthîtwe nî methe mao.

¹³ Nîwacokire agîtigithia ng'ina kûthiî na mbere arî mûthamaki wa mûndûmûka, nîûndû nîwarûthire mûvuanano wa ngai ya mûndûmûka ya Ashera. Asa nîwatemangire mûvuanano ûcio na akîûvîvîria Kîamndarî gîa karûnjî ga Kidironi.

¹⁴ Wana ethîrwa Asa ndaacûkangia kûndû kuonthe kûrîa gûtûgîru gwa kûgoocagîrwa, nîwatûûrire arî mwîvokeku kûrî Ngai-Mûnene ûtûûrorî wake wonthe.

¹⁵ Nîwaigire hekarûrî indo cionthe irîa îthe aamûrîrîte Ngai-Mûnene, wa vamwe na indo cia thaavu na sîlûva na indo ciîngî irîa ke mwene aamûrîrîte Ngai-Mûnene.

¹⁶ Asa mûthamaki wa Juda na Baasha, mûthamaki wa Isiraeli maatûûraga marûaga îvindarî rîao rîonthe rîrîa maarî athamaki.

¹⁷ Baasha, mûthamaki wa Isiraeli nîwathiîre nîguo akarûe na Juda. Nîwatumire rûthingo rwa vinya Rama, nîguo arigîrîrie andû matikaume kana matonye Juda.

¹⁸ Asa nîwacokire akîruta sîlûva yonthe na thaavu irîa ciatigîtwe hekarûrî na nyombarî ya mûthamaki. Nîwainenganîre kûrî ndungata ciake na agîciîra ivirîre mûthamaki Benihadadi, mûvîcî wa Tabirimoni. Tabirimoni aarî mûvîcî wa Hezioni, mûthamaki wa Sîria, ûrîa watûûraga Damesiki. Nîwerire ndungata icio ciîre Benihadadi atîrî,

¹⁹ “Tiga tûgwatanîre wata ûrîa aa vava maagwatanîrîte. Kîveo gîkî gîa sîlûva na thaavu nîkîo nagûtûmanîra; rîu thiî ûthûkie ngwatanîro yenyu na Baasha, mûthamaki wa Isiraeli, nîguo atige kûntharîkîra.”

²⁰ Nake mûthamaki Benihadadi nîwetîkîre ûrîa mûthamaki Asa aamwîrire, na nîwatûmire anene a athigari ake a mbaara mathiî makatharîkîre matûûra marîa manene ma Isiraeli. Nîmaavootire Ijoni, Dani, Abeli-bethi-maaka na kûndû kûrîa kwarî vakuvî na Îria rîa Galili, vamwe na vûrûri wonthe wa Nafutali.

²¹ Rîrîa mûthamaki Baasha eegwire ûvoro ûcio, nîwatigire gûtuma rûthingo rwa Rama na akîthiî gûtûûra Tiriza.

²² Mûthamaki Asa nîwacokire akîathana Juda kuonthe na akiuga andû onthe, gûtarî wanarî mûndû ûmwe ûgûtigwa, mathiî magakuue mathiga na mbaû irîa mûthamaki Baasha aatumaga rûthingo rwa Rama nacio. Asa nîwatûmîre indo icio gûtuma Mizipa na Geba, matûûra marîa marî vûrûrirî wa Benjamini.

²³ Maûndû marîa mengî monthe marîa Asa eekire, maûndû ma vinya marîa eekire na matûûra marîa aatumire, nîmandîke îvukuurî rîa maûndû ma tene ma Athamaki a Juda. Nwatî ûkûrûrî wake, nîwarwarire magûrû.

²⁴ Asa nîwakwire na akîthikwa mbîrîrarî irîa ciathikagwa athamaki îtûûrarî rîa Daudi, nake mûvîcî Jehoshafati agîtuîka mûthamaki vuva wake.

Nadabu, mûthamaki wa Isiraeli

²⁵ Mwakarî wa kaîrî Asa arî mûthamaki wa Juda, Nadabu, mûvîcî wa mûthamaki Jeroboamu nîwatuîkire mûthamaki wa Isiraeli, na nîwathanire Isiraeli îvinda rîa mîaka îîrî (2).

²⁶ Nîwekire maûndû macûku mbere ya Ngai-Mûnene, na akîrûmîrîra mîtugo mîcûku ya îthe, na mevia make magîtûma Aisiraeli mevie.

²⁷ Baasha mûvîcî wa Ahija kuuma mûvîrîgarî wa Isakaru nîwavangire ûrîa akûraga Nadabu. Baasha nîwaûragîre Nadabu îtûûrarî rîa Gibethoni kûu Filisiti, rîrîa Nadabu na Aisiraeli onthe maathiûrûrûkîrîtie îtûûra rîu nîguo marîcunane.

²⁸ Kwoguo Baasha aaûragire Nadabu mwakarî wa kathatû Asa arî mûthamaki wa Juda. Nake Baasha nîwatuîkire mûthamaki wa Isiraeli vuva wa Nadabu.

²⁹ Vîndî wa îo Baasha aatuîkire mûthamaki, nîwambîrîrie kûûraga andû onthe a nyomba ya Jeroboamu. Andû onthe a nyomba ya Jeroboamu nîmaaûragirwe na gûtirî wanarî ûmwe watigarire wata ûrîa Ngai-Mûnene aaugîte na njîra ya ndungata yake Ahija, mûrathi ûrîa waumîte Shilo.

³⁰ Ûndû ûcio wekîkire nîûndû Jeroboamu nîwevîtie, na agîtûma andû a Isiraeli mevie, na ûndû ûcio nîwatûmire Ngai-Mûnene, Ngai wa Isiraeli arakare.

³¹ Maûndû marîa mengî monthe marîa Nadabu eekire nîmandîke îvukuurî rîa maûndû ma tene ma Athamaki a Isiraeli.

³² Asa, mûthamaki wa Juda na Baasha, mûthamaki wa Isiraeli maatûûraga marûaga îvindarî rîao rîonthe rîrîa maarî athamaki.

Baasha, mûthamaki wa Isiraeli

³³ Mwakarî wa kathatû Asa arî mûthamaki Juda, Baasha, mûvîcî wa Ahija nîwatuîkire mûthamaki wa Isiraeli kuonthe, na nîwathanire arî Tiriza îvinda rîa mîaka mîrongo îîrî na îna (24).

³⁴ Nîwevirie mbere ya Ngai-Mûnene, na akîrûmîrîra mîtugo mîcûku ya mûthamaki Jeroboamu na agîtûma andû a Isiraeli mevie.