1Atha 14 - ÎVUKU RÎA ÛVORO MWARO

Gûkua kwa mûvîcî wa Jeroboamu

¹ Vîndî îo, Abija mûvîcî wa mûthamaki Jeroboamu nîwarwarire.

² Nake Jeroboamu nîwerire mûka atîrî, “Ûkîra wîgarûre nîguo ndûkamenyeke atî wî mûka wa Jeroboamu, na ûthiî Shilo, nîûndû kûu nîkuo mûrathi Ahija arî. Mûrathi Ahija nîke waugire atî nînie ngaatuîka mûthamaki wa Isiraeli.

³ Ûthiî ûkuuîte mîgate îkûmi, tûgeki na kîthembe gîa ûûkî. Nake nîagûkwîra ûrîa gûgaatuîkîka kûrî kaana getû.”

⁴ Kwoguo mûka wa Jeroboamu nîwathiîre Shilo na agîkinya kwa Ahija mûciî. Vîndî îo Ahija ndaavotaga kwona waro, nîûndû aarî mûkûrû mûno.

⁵ Ngai-Mûnene nîwerîte Ahija atî mûka wa Jeroboamu nîathiîte kûmûria ûvoro wîgiî mûvîcî ûrîa warî mûrwaru. Na Ngai-Mûnene nîwerire Ahija ûrîa akaamwîra. Vîndî îrîa mûka wa Jeroboamu aakinyire, nîwegarûrire agîîtua ta mûndû wîngî.

⁶ Nwatî rîrîa Ahija aamwîguîrîre mûrangorî aûkîte, nîwamwîrire atîrî, “Tonya, mûka wa Jeroboamu. Ûretua mûndû wîngî nîkî? Nîrî na ndûmîrîri yaku îtarî mbaro.

⁷ Thiî wîre Jeroboamu, Ngai-Mûnene, Ngai wa Isiraeli amwîrîte atîrî, ‘Naakûthuurire kuuma kûrî andû na ngîgûtua mûtongoria wa andû akwa, Aisiraeli.

⁸ Nagaûrire ûthamaki kuuma kûrî njiarwa cia Daudi, na ngîkûnengera guo. Nwatî we ndûrethagîrwa wîkariî ta Daudi, ndungata yakwa ûrîa warûmagîrîra Watho wakwa na agekaga maûndû marîa nie noonaga magîrîrîte.

⁹ Nwatî we nîwîkîte mevia manene, gûkîra athamaki onthe arîa maarî mbere yaku. Nîûndiganîrîtie na ûkandakaria na njîra ya kwîrûthîra ngai ciîngî cia mîvuanano.

¹⁰ Kwoguo nîngaaretithîria andû a nyomba ya Jeroboamu mûthiro na mbûrage arûme a nyomba yaku arîa marî Isiraeli, arîa ngombo na arîa matarî ngombo vûrûrirî wa Isiraeli. Nîngaathiria andû a mûciî wa Jeroboamu, ta ûrîa mûndû avîvagia mai makathira monthe.

¹¹ Mûndû wa wonthe wa mûciî wa Jeroboamu ûrîa ûgaakuîra îtûûrarî, nîakaarîwa nî ngui, nake mûndû wa wonthe wa mûciî waku ûrîa ûgaakuîra mûgûndarî, nîakaarîwa nî nderi. Ûguo nîguo Ngai-Mûnene augîte.’ ”

¹² Ahija nîwathiîre mbere na akîra mûka wa Jeroboamu atîrî, “Rîu ûkîra ûcoke mûciî. Vîndî îrîa ûgaatonya îtûûrarî nîrîo mûvîcîguo agaakua.

¹³ Andû onthe a Isiraeli nîmakaamûcakaîra macoke mamûthike. Nîke wenga kuuma mûciî wa Jeroboamu ûrîa ûkaathikwa, nîûndû nîke wenga tu ûkenetie Ngai-Mûnene, Ngai wa Isiraeli.

¹⁴ Ngai-Mûnene nîakwîthuurîra mûthamaki wa Isiraeli, ûrîa ûkaathiria andû a nyomba ya Jeroboamu.

¹⁵ Ngai-Mûnene nîakaaverithia na ainainie vûrûri wa Isiraeli, ta ûrîa kamûthanje kainainaga karî rûnjîrî. Nîakengata andû a Isiraeli kuuma vûrûrirî ûyû mwaro, ûrîa aaveere methe mao ma tene na amanyagie kûraca na Rûnjî rwa Farati nîûndû nîmarakarîtie Ngai-Mûnene na njîra ya kûrûtha mûvuanano wa Ashera, ngai ya mûndûmûka.

¹⁶ Ngai-Mûnene nîagaatiganîria Isiraeli nîûndû Jeroboamu nîwîvîtie na nîatûmîte andû a Isiraeli mevie.”

¹⁷ Mûka wa Jeroboamu nîwocire magûrû na agîcoka Tiriza; na rîrîa aakinyire mûciî, mwana nîwakwire.

¹⁸ Andû onthe a Isiraeli nîmaamûcakaîre na makîmûthika wata ûrîa Ngai-Mûnene aaugîte na njîra ya mûrathi Ahija, ndungata yake.

Gûkua kwa Jeroboamu

¹⁹ Maûndû marîa mengî monthe marîa Jeroboamu eekire, mbaara irîa aarûire na ûrîa aathanire, nîmandîke Îvukuurî rîa Maûndû ma Tene ma Athamaki a Isiraeli.

²⁰ Jeroboamu aathanire îvinda rîa mîaka mîrongo îîrî na îîrî (22). Nîwacokire agîkua na akîthikwa, nake mûvîcî Nadabu nîwatuîkire mûthamaki vuva wake.

Rehoboamu, Mûthamaki wa Juda

²¹ Rehoboamu mûvîcî wa Solomoni aarî na ûkûrû wa mîaka mîrongo îna na ûmwe (41) rîrîa aatuîkire mûthamaki wa Juda, na aathanire îvinda rîa mîaka îkûmi na mûgwanja (17) arî Jerusalemu. Jerusalemu nîrîo îtûûra rînene rîrîa Ngai-Mûnene aathuurîte kuuma vûrûrirî wonthe wa Isiraeli nîguo agoocagîrwe kuo. Ng'ina wa Rehoboamu eetagwa Naama wa kuuma Aamoni.

²² Andû a Juda nîmeekire maûndû macûku mbere ya Ngai-Mûnene na makîmûrakaria makîria ya ûrîa wonthe methe mao meekîte.

²³ Nîmeerûthîrîte kûndû kûrîa kwagoocagîrwa ngai cia mîvunano, itugî na mîvuanano ya Ashera mîenarî yonthe ya irîma irîa ndaca na rungu rwa mîtî yonthe îrîa yarî na iruru.

²⁴ Wana kwarî na arûme maarutagîra wîra wa ûmaraa kûrîa kwagoocagîrwa ngai cia mîvuanano. Andû a Juda meekaga maûndû monthe ma ûûra nthoni marîa meekagwa nî andû arîa Ngai-Mûnene eengatire kuuma vûrûrirî ûcio mbere ya andû a Isiraeli matonya kuo.

²⁵ Mwakarî wa gatano Rehoboamu arî mûthamaki, mûthamaki Shishaka wa Misiri nîwatharîkîre Jerusalemu.

²⁶ Nîwathiîre na indo cionthe irîa ciarî hekarûrî, na irîa ciarî nyombarî ya mûthamaki, wa vamwe na ngo cia thaavu irîa Solomoni aarûthîte.

²⁷ Vandûrî va cio Solomoni nîwarûthire ngo cia gîcango na akîinenganîra kûrî anene a agitîri a kîvingo Kîam mûciî wa mûthamaki nîguo maimenyagîrîre.

²⁸ Vîndî cionthe rîrîa mûthamaki aatonyaga hekarûrî, agitîri a kîvingo nîmaakuuaga ngo icio na makaivira nyombarî ya agitîri.

²⁹ Maûndû marîa mengî monthe marîa mûthamaki Rehoboamu eekire nîmandîke îvukuurî rîa maûndû ma tene ma Athamaki a Juda.

³⁰ Vîndî îo yonthe Rehoboamu na Jeroboamu maatûûraga marûaga.

³¹ Rehoboamu nîwakwire na akîthikwa mbîrîrarî îrîa ciathikagwa athamaki îtûûrarî rîa Daudi. Mûvîcî Abija nîwatuîkire mûthamaki vuva wake.