1Atha 13 - ÎVUKU RÎA ÛVORO MWARO

¹ Ngai-Mûnene nîwathire mûndû wa Ngai kuuma Juda athiî Betheli. Nake rîrîa aakinyire nîwethîrîrie Jeroboamu arûngamîte vau metharî ya kîgongoona akîenda kûruta îgongoona.

² Mûndû ûcio nîwarumire metha ya kîgongoona, wata ûrîa Ngai-Mûnene aamwathîte akiugaga atîrî, “We metha ya kîgongoona, metha ya kîgongoona, Ngai-Mûnene augîte atî: Taroria kavîcî nîgagaaciarwa nyombarî ya Daudi; Nako gageetwa Josia. Nako nîgagaagûtegera athînjîri-Ngai arîa marutagîra magongoona kûndû kûrîa gûtûgîru, arîa marutagîra ngai cia mîvuanano magongoona îgûrû rîaku, na nîakaavîvîria mavîndî ma andû îgûrû rîaku.”

³ Vîndî wa îo Mûndû ûcio wa Ngai nwa waugire atîrî, “Metha îno ya kîgongoona nîîkomomorwa, naguo mûu ûyû ûrî îgûrû rîayo ûnyague. Gîkî nîkîo kîmenyithia gîa kwonania atî nî Ngai-Mûnene warîtie.”

⁴ Rîrîa mûthamaki Jeroboamu eegwire ûguo, nîworotire mûndû ûcio na njara arûngamîte vau metharî ya kîgongoona na akîathana atîrî, “Nyitani mûndû ûcio!” Wa rîmwe, njara îo mûthamaki oorotete mûrathi nayo nîyaûmagarire na akîremwa nî kûmîthunithia rîngî.

⁵ Metha ya kîgongoona nîyomomokire wa rîmwe naguo mûu ûgîtîka nthî, wata ûrîa Ngai-Mûnene aaugîte na njîra ya mûrathi.

⁶ Mûthamaki Jeroboamu nîwerire mûndû ûcio wa Ngai atîrî, “Nakûthaitha nthaithîra Ngai-Mûnene, Ngai waku ûmwîre amvonie njara yakwa!” Mûndû ûcio wa Ngai nîwathaithire Ngai-Mûnene na njara ya mûthamaki nîyavonirue, na îgîkara wata mbere.

⁷ Nake mûthamaki nîwerire mûrathi atîrî, “Ûka tûthiî gwakwa mûciî tûkarîcanîre irio nawe, na nîngûkûva kîveo.”

⁸ Nake mûrathi ûcio nîwerire mûthamaki atîrî, “Wana ûkamva nuthu ya ûtonga waku, tûtingîthiî nawe kûrîcanîra kana kûnyunyanîra vamwe.

⁹ Ngai-Mûnene ambathîte ndikarîe kana nyue manjî, na ndigacoke mûciî nthiîrîrîte njîrarî îrîa mbûkîrîre.”

¹⁰ Kwoguo mûrathi ndaacoka mûciî na njîra îrîa aathiîrîrîte akîthiî Betheli, aacokire na njîra îngî.

Mûrathi ûrîa mûkûrû kûu Betheli

¹¹ Vîndî îo kwarî na mûrathi mûkûrû watûûraga kûu Betheli. Anake ake nîmaathiîre kûrî ke na makîmwîra ûrîa mûndû wa Ngai kuuma Juda eekîte kûu Betheli mûthenya ûcio na ûrîa eerîte mûthamaki Jeroboamu.

¹² Nake îthe nîwamaûririe atîrî, “Athiîre njîra îrîkû?” Nao anake acio nîmaamwonirie njîra îrîa mûrathi ûcio waumîte Juda aathirîrîte.

¹³ Nake nîwerire anake acio ake atîrî, “Ndandîkîra mvunda yakwa.” Nao nîmaamûtandîkîre mvunda na agîtua îgûrû rîayo.

¹⁴ Nîwarûmîrîîrie mûndû ûcio na akîmwîthîra ekarîte nthî rungu rwa mûtî wa mûvuru. Mûrathi ûcio mûkûrû nîwamûûririe atîrî, “We nîwe mûrathi ûrîa waumîte Juda?” Nake mûndû mûrûme ûcio nîwacokirie atîrî, “Îî nînie.”

¹⁵ Nake mûrathi ûcio mûkûrû nîwacokire akîmwîra atîrî, “Ûka twînûke tûkarîcanîre irio nawe.”

¹⁶ Nwatî mûrathi ûcio waumîte Juda nîwacokirie atîrî, “Nie tûtingîcoka kana tûthiî mûciî nawe. Na ndingîrîa kana nyunyanîra kîndû nawe gûkû,

¹⁷ nîûndû Ngai-Mûnene ambathîte ndikarîe kana nyue manjî gûkû, na ndigacoke mûciî na njîra îrîa mbûkîrîre.”

¹⁸ Mûrathi ûcio mûkûrû waumîte Betheli nîwamwîrire atîrî, “Nie nîrî mûrathi wa tawe, na Ngai-Mûnene ambathîte na njîra ya mûraika, ambîra ngwoce tûcoke nawe mûciî gwakwa nîguo ûrîe na ûnyue.” Nwatî mûrathi ûcio mûkûrû nîkwa aavenanagia.

¹⁹ Kwoguo mûndû ûcio wa Ngai nîmaacokire mûciî marî na mûrathi ûcio mûkûrû na makîrîa na makînyunyanîra nake.

²⁰ Vîndî wa îo maarîcaga Ngai-Mûnene nîwarîrie mûrathi ûcio mûkûrû,

²¹ na akîra mûndû ûcio wa Ngai augîrîrîtie atîrî, “Ngai-Mûnene arauga atî, we nîûregete kûmwathîkîra na nîwaregire kûvingia kîrîkanîro kîrîa Ngai-Mûnene, Ngai waku aakwathire.

²² Vandû va ûguo, we nîûcokire na warîa irio na wanyua manjî kûndû kûrîa werîtwe ndûkarîe irio kana ûnyua manjî. Na nîûndû wa ûguo, we nîûkûragwa na kimba gîaku gîtikaathikwa mbîrîrarî ya mûciî wenyu.”

²³ Marîkia kûrîa na kûnyua, mûrathi ûcio watûûraga Betheli nîwatandîkîre mûndû ûcio wa Ngai mvunda yake, nake mûndû ûcio wa Ngai

²⁴ nîwamîtwîre na akîthiî. Arî njîrarî, nîwatûnganire na mûnyambû na ûkîmûraga. Kimba gîake nîkîamamire njîrarî, nayo mvunda na mûnyambû ikîrûngama mîenarî yakîo.

²⁵ Andû amwe nîmaavîtîkîrîre vo na makîona kimba kîu kîmamîte njîrarî naguo mûnyambû ûrûngamîte vakuvî nakîo. Nîmaathiîre îtûûrarî rîa Betheli kûrîa mûrathi ûcio mûkûrû aatûûraga na makiuga ûrîa moonete.

²⁶ Rîrîa mûrathi ûcio mûkûrû eegwire ûguo nîwaugire atîrî, “Ûcio nî mûndû wa Ngai ûrîa waregire kwathîkîra ûrîa Ngai-Mûnene aamwathîte! Kwoguo Ngai-Mûnene nîwatûmire mûnyambû ûthiî ûmûtharîkîre na ûmûrage, wata ûrîa Ngai-Mûnene aamwîrîte.”

²⁷ Nîwacokire akîra anake ake mamûtandîkîre mvunda. Nake nîwekire guo.

²⁸ Nîwatwîre îgûrû rîayo na akîthiî. Nîwethîre kimba kîu kîmamîte njîrarî, nayo mvunda na mûnyambû irûngamîte vakuvî nakîo. Mûnyambû ndwarî mûrîu kimba kîu kana ûtharîkîra mvunda.

²⁹ Mûrathi ûcio watûûraga Betheli nîwocire kimba Kîam mûndû ûcio wa Ngai, agîkigîrîra îgûrû rîa mvunda na agîcoka nakîo Betheli nîguo agîcakaîre na akîthike.

³⁰ Nîwakîthikire mbîrîrarî ya mûciî wake, na ke marî na avîcî ake nîmaagîcakaîre makiugaga atîrî, “Ûûi mûrwaiya!”

³¹ Marîkia gûkîthika, mûrathi ûcio nîwerire avîcî ake atîrî, “Rîrîa ngaakua, mûkaanthika mbîrîrarî îno twathika mwîrî wa mûndû ûyû wa Ngai, na mûkaaiga mavîndî makwa mwenarî wa mavîndî make.

³² Mûgeeka guo nîûndû, ciugo irîa mûndû ûyû aathirwe nî Ngai-Mûnene auge cia kûruma metha ya kîgongoona îrîa îrî Betheli, vamwe na kûndû kuonthe gwa kûgoocerwa kûu matûûrarî marîa manene ma Samaria nwanginya ikaavinga.”

Wîvia ûrîa mûnene wa Jeroboamu

³³ Vuva wa maûndû mau Jeroboamu, mûthamaki wa Isiraeli ndaatiga gwîka maûndû macûku. Nwatî nîwathiîre mbere kûthuura athînjîri-Ngai kuuma kûrî andû a mîthemba yonthe nîguo matungatage metharî cia magongoona irîa aatumîte. Aamûraga mûthînjîri-Ngai wa wonthe wendaga kwamûrwa.

³⁴ Ûndû ûyû nîwatuîkire wîvia kûrî nyomba ya Jeroboamu na nîwatûmire nyomba îo îcûkangue na îthirue viû.