1Atha 12 - ÎVUKU RÎA ÛVORO MWARO

Mîvîrîga ya mwena wa rûgûrû nîyareganire na Rehoboamu

¹ Rehoboamu nîwathiîre Shekemu, nîûndû andû onthe a Isiraeli nîmaathiîte kuo makamûtue mûthamaki.

² Rîrîa Jeroboamu, mûvîcî wa Nebati eegwire ûguo, nîwacokire Shekemu kuuma Misiri. (Jeroboamu aarî Misiri kûrîa aaûrîrîte nîûndû wa mûthamaki Solomoni.)

³ Andû a Isiraeli nîmaatûmanîre Jeroboamu, na onthe nîmaaûnganire vamwe nake na makîmwîra atîrî,

⁴ “Aguo Solomoni nîwarutithagia mawîra marito. Kwoguo tûvûthîrie mawîra mau marito na ûtûnyivanyivîrie gooti, natue tûkaagûtungatagîra.”

⁵ Nake Rehoboamu nîwamerire atîrî, “Thiîni na mûgaaûka vuva wa mîthenya îthatû.” Kwoguo andû nîmaathiîre.

⁶ Mûthamaki Rehoboamu nîwaûririe ûtaaro kûrî arûme arîa akûrû, arîa maataaraga îthe rîrîa aarî mwoyo. Nîwamaûririe atîrî, “Mûngîenda ngaacokeria andû aya atîa?”

⁷ Nao nîmaamûcokerie atîrî, “Ûmûnthî ethîrwa nîûkwenda gûtungatîra andû aya waro, macokerie waro ûndû ûrîa makûûria, na makaagûtungatagîra vîndî cionthe marî na wîvokeku.”

⁸ Nwatî nîwaregire kûrûmîrîra mataaro ma arûme acio akûrû, na vandû va ûguo akîthiî kûria ûtaaro kûrî anake a riika rîake arîa maamûtungatagîra.

⁹ Nîwamaûririe atîrî, “Mûngîenda mbîre andû aya mambûririe nîmavûthîrie mîrigo yao atîa?”

¹⁰ Nao anake acio a riika rîake nîmaamûcokerie atîrî, “Ûkeera andû acio maakwîraga atî, ‘aguo Solomoni nîwatûrutithagia mawîra marito, kwoguo tûvûthîrie mawîra mau’ atî; ‘Kaara gakwa karîa kanini nî kariku gûkîra kîûnû Kîam vava!

¹¹ Vava aamwigagîrîra mîrigo mîrito; nie ngaamwigîrîra îngî mîrito makîria. Vava aamûrivaga na mûragi; nie ngaamûrivaga na kîvoko Kîam munyi!’ ”

¹² Vuva wa mîthenya îthatû, Jeroboamu na andû onthe nîmaacokire kûrî mûthamaki Rehoboamu wata ûrîa aamerîte.

¹³ Mûthamaki nîwaregire kûrûmîrîra mataaro marîa aaveetwe nî arûme arîa akûrû, na nîwarîrie andû na marûrû.

¹⁴ Wata ûrîa mûthamaki aataarîtwe nî anake a riika rîake, nîwerire andû atîrî, “Vava aamwigagîrîra mîrigo mîrito; nie ngaamwigîrîra îngî mîrito makîria. Vava aamûrivaga na mûragi; nie ngaamûrivaga na kîvoko Kîam munyi!”

¹⁵ Kwoguo mûthamaki nîwaregire kûthikîrîria andû; nîûndû wendi wa Ngai-Mûnene warî wa kûvingia ûrîa eerîte Jeroboamu, mûvîcî wa Nebati na njîra ya mûrathi Ahija wa Shilo.

¹⁶ Rîrîa andû onthe a Isiraeli moonire atî mûthamaki ndaramathikîrîria, nîmaaugîrîrie atîrî, “Gûtirî kîndû tûrenda kuuma kûrî Daudi? Tûtirî na îgai kuuma kûrî mûvîcî wa Jesse. Andû a Isiraeli, twînûkeni! Daudi gitîra nyomba yaku we mwene!” Kwoguo Aisiraeli nîmeenûkire magemarî mao.

¹⁷ Nwatî nîmaatigire Rehoboamu arî mûthamaki wa andû a Isiraeli, arîa tu maatûûraga matûûrarî ma Juda.

¹⁸ Mûthamaki Rehoboamu nîwacokire agîtûma Adoniramu ûrîa warî mûnene wa andû arîa maarutithagua wîra na vinya, athiî kûrî andû a Isiraeli, nwatî nîmaamûrivire na mathiga nginya agîkua. Vuva wa ûguo, Rehoboamu nîwatwîre gîkaari gîake Kîam mbaara na îvenya na akîûra akîthiî Jerusalemu.

¹⁹ Kwoguo kuuma vîndî îo, andû a Isiraeli matwîre mareganaga na andû a nyomba ya Daudi nginya ûmûnthî.

²⁰ Rîrîa andû a Isiraeli meegwire atî Jeroboamu aarî mûcoku kuuma Misiri, nîmaamûtûmanîre na makîmwîta varîa maaûnganîte na makîmûtua mûthamaki wa Isiraeli kuonthe. Gûtirî andû engî maarûmîrîre andû a nyomba ya Daudi tiga andû a mûvîrîga wa Juda.

Ûrathi wa Shemaia

²¹ Rîrîa Rehoboamu aakinyire Jerusalemu, nîwaûnganirie vamwe athigari ngiri îgana rîmwe rîa mîrongo înana (180,000) kuuma mîvîrîgarî ya Juda na Benjamini, arîa maarî aro mûno makarûe na andû a Isiraeli, nîguo moce rîngî ûthamaki wa Rehoboamu mûvîcî wa Solomoni.

²² Nwatî Ngai nîwerire mûrathi Shamaia

²³ avecane ndûmîrîri îo kûrî Rehoboamu na kûrî andû onthe a mîvîrîga ya Juda na Benjamini ameere atîrî,

²⁴ “Mûtikathiî kûtharîkîra aa mûrwanyûkwe, andû a Isiraeli. Cokani muonthe wa mûndû gwake mûciî, nîûndû ûndû ûyû wîkîkîte na wendi wakwa.” Kwoguo nîmaathîkîre Ngai-Mûnene na magîcoka kwao mîciî wata ûrîa Ngai-Mûnene amaathîte.

Jeroboamu nîwatigire kûrûmîrîra Ngai-Mûnene

²⁵ Mûthamaki Jeroboamu wa Isiraeli nîwatumire îtûûra rîa Shekemu rîrîa rîrî vûrûrirî ûrîa ûrî irîma wa Efiraimu na agîtûûra kuo. Nîwacokire akiuma kûu na agîtuma îtûûra rîa Penueli.

²⁶ Ke nîweîrire na ngoro atîrî, “Rîu ûthamaki nîûgûcoka nyombarî ya Daudi;

²⁷ Andû aya mangîthiî Jerusalemu na marutîre Ngai-Mûnene magongoona hekarûrî kuo, nîmakaarûmîrîra Rehoboamu, mûthamaki wa Juda na macoke mambûrage.”

²⁸ Kwoguo mûthamaki nîwaûririe ûtaaro na akîrûtha mîvuanano îîrî ya tûcaû twa thaavu na akîra andû ake atîrî, “Nîmûthiîte Jerusalemu kûgoocera kuo îvinda îraca. Mue andû a Isiraeli, ino nîcio ngai cienyu irîa ciamûrutire Misiri!”

²⁹ Nîwaigire gacaû kamwe ka thaavu kûu Betheli, nako kau kengî agîkaiga kûu Dani.

³⁰ Nao andû nîmeevirie nîûndû wa kûthiî kûgooca ngai îrîa yarî Betheli na îrîa yarî Dani.

³¹ Jeroboamu nîwacokire agîtuma kûndû gwa kûgoocagîrwa kûndû kûrîa gûtûgîru, na akîthuura athînjîri-Ngai kuuma kûrî andû arîa onthe mataarî a mûvîrîga wa Lawi.

Kûgoocera Betheli nî kwarumirwe

³² Jeroboamu nîwatuire andû makûngûagîre kîrugo mûthenya wa îkûmi na îtano mwerirî wa kanana, ta kîrugo kîrîa kîethagîrwa Juda. Metharî ya kîgongoona kûu Betheli nîwarutîre tûcaû twa thaavu tûrîa aarûthîte magongoona, na akiga athînjîri-Ngai kûu Betheli matungatage marî kûndû kûrîa gûtûgîru gwa kûgoocera kûrîa aatumîte.

³³ Naguo mûthenya wa îkûmi na îtano mwerirî wa kanana, ûrîa aatuîte ke mwene, nîwathiîre Betheli kûrîa aatumîte metha ya kîgongoona na akîvîvîria ûbani kuo, agîcoka agîtua Aisiraeli makûngûagîre mûthenya ûcio.