1Ath 4 - ÎVUKU RÎA ÛVORO MWARO

Mûtûûrîre ûrîa ûkenagia Ngai

¹ Na mûthiiarî, ariû na aarî a îthe wetû, nîmwathomire kuumana natue ûrîa mwagîrîrwe nî gûtûûra nîguo mûkenie Ngai na nwa guo mûratûûra. Rîu tûramûria na tûkamûthaitha na rîîtwa rîa Mwathani Jesû mûtûûre waro makîria.

² Nîûndû nîmwîcî maûndû marîa twamûtaarire mwîkage twathîtwe nî Mwathani Jesû.

³ Ngai endaga mwîthagîrwe mûrî atheru na mûtagwîka ûmaramari.

⁴ Mûndû mûrûme wa wonthe nîwagîrîrwe nî kûmenya ûrîa agîrîrwe nî gûtûûrania na mûka na njîra ya ûthingu na gîtîîo,

⁵ na ndagîrîrwe nî kwîthîrwa na merirîria macûku ta andû arîa matecî Ngai.

⁶ Mûndû ndakaavîtîrie Mûkristiano ûrîa wîngî kana amûvûthîre na njîra njûku maûndûrî mama. Wata ûrîa twamwîrire mbererî na tûkîmûkaania, Mwathani nîakaaverithia andû arîa marûthaga maûndû mau.

⁷ Ngai aatwîtire tûtûûre tûrî atheru, nwatî tî tûtûûre tûkîvagia.

⁸ Kwoguo mûndû ûrîa ûregaga kwathîkîra kîrîra gîkî tî mûndû aregaga kwathîkîra, nwatî aregaga kwathîkîra Ngai ûrîa ûmûvecaga Roho wake Mûtheru.

⁹ Gûtirî na vata ya kûmwandîkîra ûvoro wîgiî kwenda ariû na aarî a îthe wetû, nîûndû Ngai nîamûthomithîtie ûrîa mwagîrîrwe nî kwendana.

¹⁰ Na nîmwîthîrîtwe mwendete ariû na aarî a îthe wetû onthe arîa marî Makedonia kuonthe. Kwoguo twamûthaitha mûthiî na mbere na kûmenda makîria.

¹¹ Îkaragani mûtarî na înegene, mûkîmenyagîrîra maûndû menyu na mûkîrutaga wîra na njara cienyu nîguo mwîyonagîre kîndû gîa kûrîa wata ûrîa twamwîrire.

¹² Mweka ûguo, mûkaavecagwa gîtîîo nî andû arîa matetîkîtie na mûtikeevokaga mûndû wana ûrîkû amûve kîrîa mûvatarîte.

Gûka kwa Mwathani

¹³ Ariû na aarî a îthe wetû, nîtûkwenda mûmenye ûma wîgiî andû arîa makuîte, nîguo mûtikagîe na kîeva ta andû arîa matarî na kîîrîgîrîro.

¹⁴ Nîtwîtîkîtie atî Jesû nîwakwire na akîriûka. Kwoguo nîtwîtîkîtie atî Ngai nî akaarete vamwe na Jesû andû arîa makuîte mamwîtîkîtie.

¹⁵ Maûndû mama tûramûthomithia nî ndûmîrîri ya Mwathani, nîûndû tue arîa tûkethîrwa tûrî mwoyo rîrîa Mwathani agaaûka, tûtikaathiî mbere ya arîa maakuire.

¹⁶ Nîûndû Mwathani nîakaanyûrûka kuuma îgûrû Kîamthanaga augîrîrîtie na mûgambo wa mûraika ûrîa mûnene na karumbeta ka Ngai. Vîndî îo, arîa makeethîrwa maakuire metîkîtie Kristû nîo makamba kûriûka.

¹⁷ Vuva wa ûguo, tue arîa tûkethîrwa tûrî mwoyo nîtûgaacokanîrîra vamwe nao matuurî nîguo tûtûnge Mwathani rîerarî. Kwoguo tûgatûûraga na Mwathani tene na tene.

¹⁸ Kwoguo ûmanagîrîriani na ciugo ino.