1Ath 3 - ÎVUKU RÎA ÛVORO MWARO

¹ Kwoguo rîrîa twaremirwe nî kûmîrîria makîria, twatwire twîkare Athene tûrî tuenga,

² na tûtûme kûrî mue mûrû wa îthe wetû Timotheo ndungata ya Ngai îrîa tûrutithanagia wîra ûyû wa kûvunjia ûvoro mwaro wîgiî Kristû nayo. Twamûtûmire nîguo amwîkîre vinya na amûûmîrîrie wîtîkiorî wenyu,

³ nîguo gûtikagîe mûndû wana ûmwe wa cienyu ûgûcoka na vuva nîûndû wa mînyamaaro îno. Mue ene nîmwîcî atî mînyamaaro ta îo nî gîcunjî kîmwe Kîam wendi wa Ngai kûrî tue.

⁴ Nîûndû rîrîa twarî namue nîtwekaraga tûkîmwîraga atî tuonthe nwanginya tûnyamarue wa ta ûrîa mwîcî atî nîguo gwekîkire.

⁵ Nîûndû wa ûguo rîrîa naaremirwe nî kûmîrîria makîria nînaatûmire Timotheo nîguo amenye ûvoro wîgiî wîtîkio wenyu. Nînetigagîra Ngoma ndakethîrwe nîwamûgeririe na wîra wetû wonthe wîthîrwe warî wa mana.

⁶ Nwatî rîu Timotheo nîacokete aumîte kûrî mue na nîaratûveere ndeto mbaro ciîgiî wîtîkio na wendo wenyu. Nîatwîrîte atî vingo cionthe nîmûtûririkanaga na njîra mbaro na atî nîmwendaga mûno gûtwona wata ûrîa wa natue twendaga mûno kûmwona.

⁷ Kwoguo ariû na aarî a îthe wetû, wîtîkio wenyu nîwatûmîrîrie rîrîa twethîrîtwe tûkîgiîka na tûkîthînîka.

⁸ Nîrî nama atî rîu nîtûgûtûûra mwoyo ethîrwa nîmûgûtûûra mwîkindîrîtie waro ndaarî ya Mwathani.

⁹ Rîu nîtûgûcokeria Ngai wetû ngatho nîûndû wenyu. Tûramûcokeria ngatho nîûndû wa gîkeno kîrîa tûrî nakîo tûrî mbere yake nîûndû wenyu.

¹⁰ Mûthenya na ûtukû nîtûvoyaga na ngoro yetû yonthe nîguo atûvotithie twonane namue rîngî nîguo tûvote kûmûva kîrîa mûvatarîte wîtîkiorî wenyu.

¹¹ Ngai îthe wetû ke mwene, na Mwathani wetû Jesû arotûthondekera njîra nîguo tûke kûrî mue.

¹² Mwathani arotûma wendani gatagatîrî kenyu wongerereke, na mwendage andû onthe ta ûrîa tûmwendete.

¹³ Na njîra îo Mwathani akamûva vinya namue nîmûkethîrwa mûrî atheru na mûtarî na ûcuke mbere ya Ngai îthe wetû rîrîa Mwathani wetû Jesû agaaûka na andû ake onthe.