1Ath 2 - ÎVUKU RÎA ÛVORO MWARO

Wîra ûrîa Paûlo aarutire Thesalonike

¹ Ariû na Aarî a îthe wetû, mue nîmwîcî atî gûka gwetû kûrî mue gûtiarî kwa mana.

² Mbere ya gûka nîmwîcî ûrîa twanyaririrwe na tûkîrumwa tûrî Filipi. Nwatî wana gûtuîka nîtwakararirue mûno, Ngai wetû nîwatûvere ûmîrîru wa kûmûvunjîria ûvoro wake mwaro.

³ Kûmûthaitha gwetû gûtiumanîte na mavîtia, ngoro njûku kana wara.

⁴ Vingo cionthe twaragia ûrîa Ngai endaga, nîûndû ke nîwonete tûrî agîrîru na a kwîvokerwa Ûvoro Mwaro. Tûtiaragia nîguo tûkenie andû, nwatî twaragia nîguo tûkenie Ngai ûrîa ûthimaga wendi wa ngoro cietû.

⁵ Mue nîmwîcî atî tîkwa twîyendithagia na njîra ya kûmûva ndeto cia maveeni wana tûtitûmagîra ciugo cia gûkunîkîra ûkoroku. Ngai nî mûira wetû!

⁶ Tue tûtiacaria ûrîa tûngîkumua nîmue kana nî andû engî.

⁷ Wana ethîrwa nîtûngîekire ûguo na wathani wetû ta atûmwa a Kristû. Nwatî twekaranirie namue tûrî na ûvoreri wata ûrîa ng'ina wa ciana amenyagîrîra ciana ciake.

⁸ Nîûndû wa ûrîa twamwendete, twa ûvoro mwaro wa Ngai wonga twevarîrîtie kûgaana namue, nwatî twevarîrîtie kûgaana namue nginya mîoyo yetû. Twekire ûguo nîûndû wa kûmwenda.

⁹ Ariû na aarî a îthe wetû, nîmûraririkana ûrîa twarutaga wîra na tûkîthînîka. Twarutaga wîra ûtukû na mûthenya nîguo tûtigatuîke mûrigo kûrî mûndû wana ûmwe wa cienyu vîndî îrîa twamûvunjagîria ûvoro mwaro wa Ngai.

¹⁰ Mue mûrî aira wana Ngai nî mûira wetû atî rîrîa twarî namue, mue arîa mwîtîkîtie twarî na mîtugo mîaro na îtaarî na ûcuke.

¹¹ Nîmwîcî atî twekaga mûndû wa wonthe wata ûrîa îthe wa mûndû ekaga ciana ciake.

¹² Tue, nîtwamûûmagîrîria, nîtwamûthaithaga na nîtwekaraga tûkîmûringagîrîria mûtûûrage na mûtûûrîre ûrîa ûkenagia Ngai ûrîa ûmwîtaga ûthamakirî wake ûrîa ûrî na riiri.

¹³ Na kûrî ûndû wîngî ûtûmaga tûcokie ngatho kûrî Ngai tûtagûtigithîrîria. Vîndî îrîa twamûretere ndûmîrîri ya Ngai, nîmwamîgwire na mûkîmîtîkîra. Mûtiamîtîkîra ta ndûmîrîri ya andû nwatî mwamîtîkîre ta ndûmîrîri ya Ngai na nî ma nî ya Ngai na nîyo îraruta wîra ndaarî yenyu mue arîa mwîtîkîtie.

¹⁴ Ariû na aarî a îthe wetû, mathîna marîa mwonire nwa ta marîa moonirwe nî etîkia a Jesû Kristû a makanitha ma Ngai ma Judea. Mwanyaririrwe nî andû enyu wata ûrîa maanyaririrwe nî Ayahudi,

¹⁵ arîa maaûragire Mwathani Jesû na arathi na magîtûnyarira. Matiakenia Ngai na nîmaareganaga na andû onthe.

¹⁶ Wana nîmaageragia gûtûgiria tûtikavunjîrie andû a ndûrîrî ndûmîrîri îrîa îngîtûma mavonoke. Na njîra îno nîmarîkîtie gûkinya mûthiia wa mevia marîa matwîre mekaga. Namo marakara ma Ngai nîmakinyîte kûrî o.

Paûlo nîwerirîrie kûmacerera rîngî

¹⁷ Ariû na aarî a îthe wetû, wana ethîrwa gwa kavinda kanini nîtwatiganire namue mîîrî nwatî tî ngoro, nîtwendaga na tûkerirîria mûno kûmwona rîngî.

¹⁸ Nîtwendaga gûka kûrî mue rîngî. Nie Paûlo nînaageririe gûka kûrî mue makîria ya rita rîmwe, nwatî Caitani nîwatûgiririe.

¹⁹ Mue nî mue mwîrîgîrîro wetû, gîkeno gîetû na nthûmbî îrîa tûgetîîa nayo rîrîa Mwathani wetû Jesû Kristû agaaûka.

²⁰ Nîma mue nîmue riiri wetû na gîkeno gîetû.