1Akor 9 - ÎVUKU RÎA ÛVORO MWARO

Ivooto na mawîra ma mûtûmwa

¹ Na kinthî nie ndirî na wîyathi? Na kinthî nie ndirî mûtûmwa? Na kinthî nie ndionire Jesû Mwathani wetû? Na kinthî mue mûtirî maciaro ma wîra ûrîa Mwathani arutîte na njîra yakwa?

² Wana ethîrwa arîa engî matiîtîkagia atî nie nîrî mûtûmwa, mue na ma nîmwîtîkagia. Kîrîa kîonanagia atî nie nîrî mûtûmwa nî atî mue nîmûtûûraga mûrî ûûrûmwe na Mwathani.

³ Vîndî îrîa andû maranjirithia nîîtetagîra ngiugaga atîrî:

⁴ Anga tue tûtirî na kîvooto gîa kwîthîrwa tûkîrîa na tûkînyua nîûndû wa wîra ûrîa tûrutaga?

⁵ Na kinthî tue tûtiagîrîrwe nî kûthiîcanagia na mûndûmûka mwîtîkia wata atûmwa arîa engî na ta aa mûrwang'ina na Mwathani kana ta Petero?

⁶ Nie na Baranaba, nwatue tu twagîrîrwe nî kûruta wîra nîguo twîyonere gîa gwîtûûria?

⁷ Nî mûthigari ûrîkû ûrîvaga matûmîri make ke mwene vîndî îrîa arî mbaararî? Nî mûrîmi ûrîkû ûtarîcaga matunda marîa maumaga mûgûndarî wake wa mîthavibu? Nî mûrîthi ûrîkû ûtanyunyaga îriia kuuma ndîthiarî yake?

⁸ Nie ndirauga ûguo ndongoretue nî ûmûndû, nîûndû ûguo nîguo Watho ugîte?

⁹ Wathorî wa Musa kwandîkîtwe atîrî, “Ndûkanove ndegwa kanyua vîndî îrîa iravûra ngano.” Vîndî îrîa Ngai aaugire ûguo, nîkwa ke aaugaga tu ûvoro wîgiî ndegwa?

¹⁰ Ke na ma akiuga ûguo aaugaga nîûndû wetû nîûndû mûndû ûrîa ûrîmaga na mûndû ûrîa ûkethaga nîmagîrîrwe nî kûruta wîra marî na mwîvoko wa kûnyita gîcunjî Kîam maketha.

¹¹ Ethîrwa nîtûvandîte mbegû ya kîîroho gatagatîrî kenyu, nîkwa arî ûndû mûnene tûngîketha kuuma kûrî indo cienyu cia gûkû nthî?

¹² Ethîrwa andû arîa engî marî na kîvooto gîa kûvewa nîmue indo cienyu cia gûkû nthî, na kinthî tue tûtirî na kîvooto kînene makîria? Nwatî tûtianatûmîra kîvooto gîkî. Vandû va ûguo, nîtûûmagîrîria maûndû monthe nîguo tûtigeke ûndû wana ûmwe ûngîgiria andû mavunjie Ûvoro Mwaro wîgiî Kristû.

¹³ Na ma mue nîmwicî atî arîa marutaga wîra hekarûrî marîcaga kîrîa kiumanîte na hekarû nao arîa marutaga magongoona metharî ya kîgongoona, marîcaga kîrîa kiumanîte na magongoona mau?

¹⁴ Na njîra wata îo, Mwathani nîwathanire akiuga arîa mavunjagia ûvoro mwaro metethagie ûtûûrorî wao na kîrîa kiumanîte na wîra ûcio marutaga.

¹⁵ Nwatî ndianatûmîra wana kîmwe Kîam ivooto ino na ndirandîka ûguo rîu nîguo atî ngîe na kîmwe gîa cio. Wana nî kava ngue gûkîra mûndû anjune kîrîa gîtûmaga nîtîîe.

¹⁶ Gûtuîka atî nîmvunjagia ûvoro mwaro tîkuo gûtûmaga nîtîîe, nîûndû ûguo nîguo mbathîtwe mbîke na nîûndû mûcûku mûno nîngîrega kûvunjia Ûvoro mwaro.

¹⁷ Nîngîvunjagia nîûndû wa kwenda gwakwa nînîngîrîvagwa nwatî, ndiîkaga ûguo nîûndû wa kwenda gwakwa, mvunjagia nîûndû ûcio nîguo wîra ûrîa naveerwe.

¹⁸ Mûcara wakwa nî ûrîkû vi? Mûcara wakwa nî ûyû: atî vîndî îrîa nîravunjia Ûvoro Mwaro, mbîkage guo ndakûrîvia na ndagûtûmîra ivooto ciakwa wîrarî wakwa wa kûvunjia ûvoro mwaro.

¹⁹ Nie ndirî ngombo ya mûndû wana ûmwe; nwatî nînîtuîte ngombo ya andû onthe nîguo ngucîrîrie andû eengî wa ûrîa nîngîvota.

²⁰ Rîrîa nîrarutithania wîra na Ayahudi ndûûraga ta Ayahudi nîguo nîmagucîrîrie. Nie mwene ndirî rungu rwa Watho wa Musa, nwatî rîrîa nîrarutithania wîra na arîa marî rungu rwa Watho ûcio, ndûûraga takwa nîrî rungu rwaguo nîguo nîmagucîrîrie.

²¹ Na njîra wata îo vîndî îrîa nîrarutithania wîra na andû a Ndûrîrî, ndûûraga ta mûndû wa Ndûrîrî ûrîa ûrî nja ya Watho wa Ayahudi. Mbîkaga ûguo nîguo ngucîrîrie andû a Ndûrîrî. Nwatî ûguo tî kuga atî ndiathîkagîra Watho wa Ngai; vandû va ûguo na ma nîrî rungu rwa watho wa Kristû.

²² Vîndî îrîa nîrî gatagatîrî ka arîa matarî na vinya wîtîkiorî nduîkaga wa tao nîguo nîmagucîrîrie. Kwoguo nînduîkaga maûndû monthe kûrî andû onthe, nîguo mvonokie amwe gatagatîrî kao na njîra cionthe irîa nîngîvota.

²³ Mbîkaga maûndû mama monthe nîûndû wa ûvoro mwaro, nîguo wa nanie ngaagaîrwa irathimo irîa ciumanaga naguo.

²⁴ Nie nîrî na ma nîmwîcî atî avinyûri eengî marî îvenyarî makîvinyûra nî ûmwe tu gatagatîrî kao wamûkagîra kîveo. Kwoguo vinyûrani nîguo wa namue mûkaamûkîra kîveo.

²⁵ Mûvinyûri wa wonthe akîîmenyeria ûrîa akaavinyûra mîthakorî nîwîathaga maûndûrî monthe. Ekaga ûguo nîguo akaavewa nthûmbî îrîa îthiraga, nwatî tue twîkaga ûguo nîguo tûkaavewa nthûmbî îrîa îtathiraga.

²⁶ Kwoguo mvinyûraga nîrî na mworoto. Nie mbîthagîrwa mbîkariî ta mûrûi na ngundi ûrîa wikagia ngundi atakûvîtia.

²⁷ Ndukaga mwîrî wakwa ngaûtua ngombo yakwa nîguo nie mwene ndigatuîke wa kûregwa vuva wa kwîthîrwa mvunjîrîtie andû arîa engî.