1Akor 8 - ÎVUKU RÎA ÛVORO MWARO

Kîûria kîgiî irio irîa irutîrîtwe mîvuanano

¹ Rîu nînîrenda kwaria ûvoro wîgiî irio irîa irutîrîtwe mîvuanano. Îni nîtîcî na ma atî tuonthe twîthagîrwa tûrî na ûmenyo. Ûmenyo ûcio wetû nîguo ûtûmaga mûndû ecûrwe nî mwîtîîo, nwatî wendani nîwîkanagîra vinya.

² Mûndû wa wonthe ûrîa wîciragia atî nîkûrî na ûndû aicî, na ma ndethagîrwa aicî ta ûrîa agîrîrwe nî kwîthîrwa aicî.

³ Nwatî Ngai nîwîcî mûndû wa wonthe ûmwendete.

⁴ Kwoguo nie ngîcokia kîûria kîgiî irio irîa ciîthagîrwa irutîrîtwe mîvuanano nîmbuga atî: tue nîtwîcî atî mîvuanano îrûngamaga îthenyarî rîa kîndû gîtarî vo, na nîtwîcî atî Ngai nî ûmwe tu.

⁵ Nî ûvoro wa ma atî nîkûrî na indo irî îgûrû na irî gûkû nthî ciîtagwa “ngai,” na ma nîkûrî “ngai” nyîngî na “athani” eengî.

⁶ Nwatî tue twîtîkîtie atî kûrî Ngai ûmwe tu na nîke îthe wetû. Ke nîke waûmbire indo cionthe, na tûtûûraga nîûndû wake. Tue twîtîkîtie atî kûrî Mwathani ûmwe tu na ke nîke Jesû Kristû, na indo cionthe ciaûmbirwe na njîra yake na wa natue tûtûûraga nîûndû wake.

⁷ Nwatî tî andû onthe maicî ûvoro ûcio. Andû amwe nîmamenyerete mîvuanano mûno, na rîrîa makûrîa irio, monaga irio icio ta arî wa irio irîa irutîrîtwe mîvuanano. Na nîûndû thamiri ciao nî mvûthû vîndî îrîa marîa irio icio, nîmegucaga marî na ûcuke.

⁸ Irio tî cio ingîtûma twîtîkîrwe nî Ngai. Kûrîa gûtingîtûma tûrwe nî kîndû wana kîrîkû, na tî kuo kûngîtûma tûgîe na umithio wana ûrîkû.

⁹ Nwatî îîmenyerereni nîguo wîyathi ûcio ndûgatuîke mûvînga kûrî akristiano arîa marî na wîtîkio mûnini.

¹⁰ Ethîrwa mue mûrî na “ûmenyo” nîmûrîcaga irio mûrî hekarûrî ya mîvuanano, kinthî mûndû ûrîa ûrî na thamiri mvûthû angîmwona mûkîrîîra irio kuo ndakarîa irio irîa irutîrîtwe mîvuanano?

¹¹ Kwoguo mûndû ûcio ûrî na wîtîkio mûnini na wakuîrîrwe nî Kristû nîacûkangagua nîûndû wa “Ûmenyi” ûcio wenyu.

¹² Vîndî îrîa mûravîtîria Akristiano arîa engî na mûgacûkia thamiri ciao irîa ciîthagîrwa irî mvûthû, mwîthagîrwa mûkîvîtîria Kristû.

¹³ Kwoguo ethîrwa irio irîa ndîcaga nîitûmaga ariû na aarî a îthe wetû mevie, nie ndikaarîa nyama rîngî nîguo ndigatûme wana ûmwe wa ciao evie.