1Akor 7 - ÎVUKU RÎA ÛVORO MWARO

Ciûria ciîgiî kûvikania

¹ Nie nîngwaria ûvoro wîgiî maûndû marîa mue mwamandîkîre. Nîkwagîrîrîte mûndûmûrûme ndakavikanie.

² Nwatî nîûndû ûmaraa nîguo wîngîvîte, mûndûmûrûme wa wonthe nî kava ethîrîtwe arî na mûka wake ke mwene, na mûndûmûka wa wonthe ethîrwe arî na mûthuuri wake ke mwene.

³ Mûthuuri wa wonthe nîavingagie vata wa kûmenyana kîîmwîrî na mûka. Mûka wa wonthe nake nîavingagie vata wa kûmenyana kîîmwîrî na mûthuuri wake.

⁴ Mûndûmûka ndathaga mwîrî wake ke mwene, nwatî wathagwa nî mûrûme. Na njîra wata îo mûthuuri nake ndathaga mwîrî wake ke mwene, nwatî wathagwa nî mûka.

⁵ Mûtikaaimanage mîîrî yenyu, tiga nwanga mûrîkanîrîte atî nîmûgwîkara mûtakûmenyana kîîmwîrî gwa kavinda kanini nîguo mûgîcage na kavinda ga kûvoya. Nwatî vuva wa kavinda kau cokanagîrani wa rîngî nîguo Caitani ndakamûgerie nîûndû wa gûtura ûvoti wa kwatha merirîria ma mwîrî.

⁶ Nîramwîra ûguo ngîmûtaara, nwatî tîkwa nîramwatha.

⁷ Nwa mende andû onthe mekare ta ûrîa nie mwene mbîkariî, nwatî wa mûndû wa mûndû arî na kîveo mwanya kuuma kûrî Ngai. Ûmwe arî na kîveo Kîam mûthemba ûyû, na wîngî arî na kîveo Kîam mûthemba wîngî.

⁸ Na rîu, arîa matarî avikaniu wana aka a ndigwa, nîramera atî wana nî kava mekare marî onga wata ûrîa mbîkariî.

⁹ Nwatî ethîrwa matirî na ûvoti wa kwatha mîîrî yao, nîmagîrîrwe nî kûvikania. Wana nî kava mûndû avikanîtie gûkîra kûthînua nî merirîria ma kwenda kûmenyana kîîmwîrî.

¹⁰ Nao arîa mavikanîtie nîngûmava watho ûtarî wakwa nie mwene, nwatî nî wa Mwathani: mûndûmûka ndagîrîrwe nî gûtigana na mûthuuriwe.

¹¹ Nwatî angîtiga mûthuuriwe, nî kava ekare atarî mûviku rîngî kana egucane na mûthuuriwe. Wana nginya mûthuuri ndagîrîrwe nî gûta mûka.

¹² Nao arîa engî onthe nîramera atîrî, (nie mwene, tî Mwathani): ethîrwa mûthuuri wa wonthe Mûkristiano arî na mûka ûtarî mwîtîkia na nî ekaranagia nake eganîrîte, ndagîrîrwe nî kûmûta.

¹³ Na ethîrwa mûndûmûka wa wonthe Mûkristiano nî avikîtue nî mûthuuri ûtarî mwîtîkia na nîwîkaranagia nake eganîrîte, ndagîrîrwe nî kûmûta.

¹⁴ Nîûndû mûthuuri ûrîa ûtetîkîtie nîwîtîkagîrwa nî Ngai nîûndû wa kûnyitana na mûka. Nake mûndûmûka ûrîa ûtetîkîtie nîwîtîkagîrwa nî Ngai nîûndû wa kûnyitana na mûthuuriwe. Angîthîrwa ûguo tîguo kûrî, ciana cienyu itingîrî ntheru, nwatî ûrîa kûrî nî atî ciana icio nîciîtîkagîrwa nî Ngai.

¹⁵ Nwatî ethîrwa ûrîa ûtetîkîtie nîarenda gûtigana na ûrîa wîtîkîtie, nîeke guo. Na vîndî ta îo, mûthuuri kana mûndûmûka wa wonthe Mûkristiano ethagîrwa arî na wîyathi. Ngai atwîtîte tûtûûre tûrî na thayû.

¹⁶ Mûndûmûka ûyû, wîcî atîa kana tîwe ûkaavonokia mûthuuriguo? Nawe mûthuuri ûyû, wîcî atîa kana tîwe ûkaavonokia mûkaguo?

Tûûragani wata ûrîa Ngai endaga

¹⁷ Mûndû wa wonthe gatagatîrî kenyu agîrîrwe nî gwîkara kûringana na wîra ûrîa Mwathani aamûveere na wa ûrîa Ngai aamwîtire ekariî. Ûguo nîguo mbathanîte makanitharî monthe.

¹⁸ Ethîrwa Ngai nîwetire mûndû arî mûruu, mûndû ta ûcio ndagîrîrwe nî kûthengutia irema cia ûruu wake. Ethîrwa Ngai nîwetire mûndû atarî mûruu, mûndû ta ûcio ndagîrîrwe nî kûrwithua.

¹⁹ Kûrua kana kûrega kûrua, ûcio tî ûndû ûrî na vata. Ûndû ûrîa ûrî na vata nî kwathîkîra mawatho ma Ngai.

²⁰ Mûndû wa wonthe gatagatîrî kenyu agîrîrwe nî gwîkara wata ûrîa Ngai aamwîtire ekariî.

²¹ Ethîrwa warî ngombo vîndî îrîa Ngai aagwîtire, tiga kwona ûcio ta ûndû. Nwatî ethîrwa nwa ûvote kwona kanya ga kûrekererua, gatûmîre.

²² Arîa maarî ngombo vîndî îrîa Mwathani aametire, rîu nîarekererie nîûndû wa Mwathani. Nao arîa maarî arekererie vîndî îrîa meetirwe, rîu o nî ngombo cia Kristû.

²³ Mue nîmwagûrirwe na mûkîrîvîrwa thirî. Kwoguo mûtigatuîke ngombo cia andû.

²⁴ Ariû na aarî a îthe wetû, mûndû wa wonthe nîwagîrîrwe nî gwîkara arî na ngwatanîro na Ngai na ekare wata ûrîa ekariî vîndî îrîa Ngai aamwîtire.

Ciûria ciîgiî arîa matavikanîtie na ciîgiî aka a ndigwa

²⁵ Ûvoro wîgiî arîa matavikanîtie, nie ndirî na rîathani kuuma kûrî Mwathani, nwatî nî woni wakwa nîravecana nîûndû nînduîkîte mûndû mwîvokeku nîûndû wa ntha cia Mwathani.

²⁶ Kwoguo nîûndû wa ûrîa andû maragiîka rîu, nîreciria nî waro wa mûndû ekare wa ûguo ekarîte.

²⁷ Ethîrwa mûndû arî na mûka, ndakagerie kûmûta. Ethîrwa mûndû tî mûvikaniu, ndakagerie kûvikania.

²⁸ Nwatî ethîrwa mûndû nîavikanîtie, ndavîtîtie. Ethîrwa mwîrîtu nîagûtua atî nîakûvika, ndavîtîtie. Nwatî andû arîa mavikanîtie nîmagîcaga na mathîna ma gûkû nthî, na nîmo nîramûgitîra kûrî mo.

²⁹ Ariû na aarî a îthe wetû, ûndû ûrîa nie nîrauga nî atîrî: kavinda karîa gatigarîte nî kanini mûno. Kuuma rîu, andû arîa mavikanîtie magîrîrwe nî gûtûûra takwa matarî avikaniu.

³⁰ Andû arîa marî na kîeva magîrîrwe nî gwîkara takwa matarî na kîeva. Andû arîa marakûngûîra magîrîrwe nî gwîkara takwa matarakûngûîra. Andû arîa maragûra indo magîrîrwe nî gwîkara takwa matarî na indo.

³¹ Nao andû arîa matûmagîra mavinda mao na gwîka maûndû ma gûkû nthî, magîrîrwe nî gwîkara takwa matatûmagîra mavinda mao monthe na gwîka maûndû ma gûkû nthî, nîûndû nthî îno wana mwîkarîre wayo wa rîu îthiîte kûthira.

³² Nie ndirenda mûtangîke. Mûndû mûrûme wa wonthe ûtarî mûvikaniu nîarûmbûyanagia na wîra wa Mwathani, nîûndû ke ethagîrwa akîgeria gûkenia Mwathani.

³³ Nwatî mûndû mûrûme wa wonthe ûvikanîtie nîarûmbûyanagia na maûndû ma gûkû nthî, nîûndû endaga gûkenia mûka,

³⁴ na kwoguo wendi wake wîthagîrwa ûrî mûgaûkanu. Mwanamwarî wa wonthe kana mwîrîtu nîarûmbûyanagia na wîra wa Mwathani, nîûndû ke endaga kwîyamûrîra Mwathani mwîrî na roho. Nwatî mûndûmûka wa wonthe ûvikîtue arûmbûyanagia na maûndû ma gûkû nthî nîûndû ethagîrwa akîenda gûkenia mûthuuriwe.

³⁵ Nîrauga maûndû mama nîguo mûgunîke na tîkwa nîrageria kûmûrigîrîria. Nwatî nîrenda mûtûûre na njîra îrîa yagîrîrîte na mwîvecane wîrarî wa Mwathani viû na mûtakûrûmbûyania na maûndû marîa mengî.

³⁶ Ethîrwa mûndû nîareciria atî ndareka ûrîa kwagîrîrîte kûrî mwîrîtu ûrîa meranîrîte atî nîmakûvikania, na ethîrwa merirîria make nî manene ma kwenda kûvikania nîmagîrîrwe nî kûvikania ûrîa ke arenda. Gwîka ûguo tî wîvia.

³⁷ Nwatî ethîrwa mûndû nîatuîte atî ke ndakûvikania atakûringîrîrua na nîavotete kwatha merirîria make ma mwîrî na gwîkara kûringana na wendi wake na nîatuîte ûrîa agwîka ndavîtîtie nîûndû wa kûrega kûvikania.

³⁸ Kwoguo mûndû ûrîa ûvikagia mwîrîtu ûrîa marîkanîrîte nake atî nîmakûvikania, nîekaga waro, nwatî mûndû ûrîa ûtavikanagia nîekaga waro makîria.

³⁹ Mûndûmûka ûrîa mûviku ethagîrwa ovanîtue na mûthuuriwe vîndî yonthe îrîa mûthuuriwe arî mwoyo. Nwatî mûthuuriwe angîkua, nîwîtîkîrîtue kûvikua nî mûndûmûrûme wîngî wa wonthe ûrîa angîenda, nwatî mûndû ûcio nwa nginya ethîrwe arî Mûkristiano.

⁴⁰ Nwatî mûndûmûka ta ûcio angîrega kûvika rîngî, ke nwa ethîrwe arî mûkenu makîria. Ûcio nî woni wakwa, na nie nîreciria Roho wa Ngai nîke ûrandongoria.