1Akor 6 - ÎVUKU RÎA ÛVORO MWARO

Nthitangano cia Akristiano magootirî

¹ Vîndî îrîa mûndû ûmwe gatagatîrî kenyu avîtîrîtue nî mûriû kana mwarî wa îthe wetû rî, nîndûî gîtûmaga mûndû ta ûcio athiî akathitange kûrî acirithania a magooti arîa matarî etîkia? Mûndû ta ûcio aregaga gwîtîkîria andû a Ngai matue ûrîa marona kwagîrîrîte nîkî?

² Anga mue mûtiîcî atî andû a Ngai nîo magaatuîra andû a nthî? Kwoguo ethîrwa mue nîmue mûgaatuîra andû a nthî, mue nîkwa mûtangîvota gûtua wana tûciira tûrîa tûnini?

³ Anga mue mûtiîcî atî tue nîtûgaacirithia araika? Na ethîrwa ûguo nîguo kûrî, nîtwagîrîrwe nî gûtua ûrîa tûngîka na maûndû ma wa mûthenya wa mûthenya.

⁴ Ethîrwa nwa mûgîe na cira ta icio, nîkwa mûngîivira kûrî acirithania acio matarî a kanitha?

⁵ Nie nîrauga ûguo nîguo nîmûconore. Na ma nwa kûvoteke atî gûtirî na mûndû mûûgî wana ûmwe gatagatîrî kenyu ûngîvota kwîgwithania Akristiano mavîtanîtie?

⁶ Vandû va ûguo, mûkristiano arathiî îgootirî kûthitanga mûkristiano ûrîa wîngî na agetîkîria andû arîa matetîkîtie Kristû mamatuîre ciira!

⁷ Kûvira nthitangano cienyu magootirî nîkwonanagia na ma atî mue nîmûremetwe viû. Wana tî kava mue mûvîtîrîtue kana mûcunîtwe?

⁸ Vandû va ûguo mue ene nîmûvîtanagîria na mûgacunana wana nginya mûgacuna Akristiano arîa engî enyu.

⁹ Mue nîmwicî atî andû arîa aganu matikaagaîrwa ûthamaki wa Ngai. Mûtikeveenie; andû arîa mavûûraga ûmaraa kana mavoyaga mîvuanano kana matharagia, kana arûme arîa mamenyanaga kîîmwîrî na arûme arîa engî,

¹⁰ kana maîaga kana arîa akoroku, kana mîrîu ya njovi, kana arumani wana kana acunani gûtirî mûndû wana ûmwe gatagatîrî ka acio ûkaagaîrwa ûthamaki wa Ngai.

¹¹ Andû amwe gatagatîrî kenyu methagîrwa mekariî ûguo, nwatî mue nîmwathambirue mûkiuma meviarî. Mûrî atherie na mûgatuwa agîrîru na njîra ya Mwathani Jesû Kristû na njîra ya Roho wa Ngai wetû.

Goocithiani Ngai na mîîrî yenyu

¹² Mûndû avota kuga atîrî, “Nie nîrîmwîtîkîrie gwîka ûndû wa wonthe.” Ûguo nîguo, nwatî maûndû monthe tî maro kûrî mue mûkîmeka. Nie nwa mbuge atî nîrîmwîtîkîrie gwîka ûndû wa wonthe, nwatî ndigûtuwa ngombo nî ûndû wana ûrîkû.

¹³ Mûndû wîngî avota kuga atîrî, “Irio irî vo nîûndû wa îvu, na îvu rîrî vo nîûndû wa irio.” Ûguo nîguo kûrî, nwatî wa cioîrî Ngai nîakaaithiria. Mwîrî ndûrî vo nîûndû wa kûvûra ûmaraa, nwatî ûrî vo nîûndû wa gûtungatîra Mwathani. Na Mwathani nîke ûtûmaga mwîrî wîthîrwe ûrî vo.

¹⁴ Na njîra ya vinya wake Ngai nîwariûkirie Mwathani, na wa natue nîagaatûriûkia.

¹⁵ Mue nî mwîcî atî mîîrî yenyu nî ciîga cia mwîrî wa Kristû. Tue nwatûvote kûthengutia ciîga cia mwîrî wa Kristû tûkînaitua ciîga cia mwîrî wa mûmaraa? Ûguo gûtingîvotekeka!

¹⁶ Mandîkorî matheru nîkwandîkîtwe atîrî, “Aîrî nîmagaatuîka mwîrî ûmwe.” Kwoguo mue mwagîrîrwe nî kûmenya atî mûndû wa wonthe ûmenyanaga kîîmwîrî na mûmaraa nîatuîkaga ûmwe nake kîîmwîrî.

¹⁷ Nwatî mûndû ûrîa wîgwatithanagia na Mwathani nîatuîkaga ûmwe nake kîîroho.

¹⁸ Ûrîrani wîvia wa kûmenyana kîîmwîrî. Wîvia wîngî wonthe ûrîa wîkagwa nî andû wîthagîrwa ûrî nja ya mwîrî, nwatî mûndû ûrîa wîvagia na njîra ya kûmenyana kîîmwîrî nîevagîria mwîrî wake ke mwene.

¹⁹ Anga mue mûtiîcî atî mîîrî yenyu nî hekarû ya Roho Mûtheru ûrîa ûrî ndaarî yenyu? Mue nîmwamûkîre Roho Mûtheru kuuma kûrî Ngai. Mûtirî enyu mue ene.

²⁰ Mwagûrirwe na thogora wa goro. Kwoguo tûmîrani mîîrî yenyu na njîra îgûtûma Ngai agoocithue.