1Akor 5 - ÎVUKU RÎA ÛVORO MWARO

Waganu ûrîa ûrî kanitharî

¹ Rîu kûrî na ûma atî kûrî na wîvia wa kûmenyana kîîmwîrî ûrerîkana gatagatîrî kenyu. Wîvia ûcio nî wa mûthemba mûcûku mûno wana nginya makîria ya wîvia ûrîa wîkagwa gatagatîrî ka andû arîa mataicî Ngai. Nîmbîrîtwe atî mûndû mûrûme nîaramenyana kîîmwîrî na mûka wa îthe.

² Na mue nîmwîtîîaga! Vandû va gwîtîîa mwagîrîrwe nî gwîcûrwa nî kîeva na mwîngate mûndû ûcio wîkîte gîîko kîu aume gatagatîrî kenyu.

³ Nie ndirî vamwe namue kîîmwîrî, nwatî nîrî vamwe namue kîîroho. Na nîndîkîtie gûtuîra mûndû ûrîa wîkîte ûguo wa takwa nîrî vamwe namue.

⁴ Vîndî îrîa mûcemanîtie vamwe na rîîtwa rîa Mwathani wetû Jesû, na ngethîrwa nîrî vamwe namue kîîroho, na njîra ya vinya wa Mwathani wetû Jesû,

⁵ nîmwagîrîrwe nî kûnenganagîra mûndû ta ûcio kûrî Caitani nîguo mwîrî wake ûcûkangue, naguo roho wake nîûkaavonokua mûthenya ûcio wa Mwathani.

⁶ Mwîtîîo ûcio wenyu tî mwaro! Mue nîkwa mûtaicî atî ndawa nini ya kwimbia mîgate nîimbagia mûtu wonthe ûrîa ûkandîtwe?

⁷ Kwoguo îrireni mevia menyu marîa mekariî ta ndawa îno ngûrû ya kwimbia nîguo mûtuîke andû acerû viû wata mûtu ûrîa ûkandîtwe ûtarî mwîkîre ndawa ya kwimbia. Na nîmbicî atî ûguo nîguo mwîkariî, nîûndû Kristû nîwarutirwe arî Gatûrûme ga kîgongoona îrugarî rîetû rîa pasaka.

⁸ Kwoguo tigani tûkûngûîre kîrugo gîkî tûtarî na mîgate îrî na ndawa îno ngûrû ya kwimbia na nîo wîvia na waganu, nwatî nî na mûgate ûrugîtwe na mûtu ûrarî mwîkîre ndawa ya kwimbia ûrîa arî guo ûtheru na ûma.

⁹ Maarûarî îrîa namwandîkîre, nie nînaamwîrire mûtikagîcage na ngwatanîro na andû arîa mavûraga ûmaraa.

¹⁰ Nwatî ngiuga ûguo na ma ndiaugaga andû gûkû nthî arîa matetîkîtie arîa mavûraga ûmaraa kana akoroku kana acunani wana kana avoi mîvuanano. Mue mûngîvota kwîthema andû ta aya ethîra nwa mûvote kuuma nthî îno viû.

¹¹ Ûndû ûrîa naugaga nî atî mûtiagîrîrwe nî kûgîa ngwatanîro na mûndû wa wonthe ûrîa wîîtaga mûriû kana mwarî wa îthe wetû na ethîrwe nî mûvûûri ûmaraa, kana nî mûkoroku, kana nî mûvoi mîvuanano kana nî mûrumani, kana nî mûrîu wa njovi, wana kana nî mûcunani. Mue wana nginya mûtikaarîcanagîre na mûndû ta ûcio.

¹² Wîra wakwa tî wa gûtuîra arîa marî nja ya kanitha. Nwatî mue mwagîrîrwe nî gûtucagîra andû arîa marî ndaarî ya kanitha.

¹³ Nîûndû mandîko matheru maugîte atîrî, “Îngatani andû arîa mekaga naaî maume gatagatîrî kenyu.”