1Akor 4 - ÎVUKU RÎA ÛVORO MWARO

Atûmwa a Kristû

¹ Andû magîrîrwe nîgûtwonaga tûrî ndungata cia Kristû, irîa ciîvokeretwe wîra wa kûvunjia maûndû ma Ngai marîa marî nthithorî.

² Makîria ya ûguo, ndungata ciagîrîrwe nîkwîthîrwa ciîvokekete kûrî Mwathi wacio.

³ Ûvororî wîgiî gûtuîrwa nîmue kana gûtuîrwa nî îgooti wana rîrîkû ndûmakanagia. Wana nginya nie mwene ndiîtucagîra.

⁴ Nie ndiîcî ûndû wana ûmwe mûcûku mbîkîte, nwatî ûguo tî kuga atî nîrî mwagîrîru. Mwathani nîke ûnducagîra.

⁵ Kwoguo mue mûtiagîrîrwe nî gûtuîra mûndû wana ûmwe kavinda karîa kagîrîru ga gûka kwa Mwathani gatarî gakinyu. Mwathani nîakaarete ûtherirî maûndû monthe marîa mathithîtwe ndumarî na aguûrie maûndû marîa mathithîtwe ngororî. Kwoguo wa mûndû nîakaamûkîra îgai rîrîa rîmwagîrîrîte kuuma kûrî Ngai.

⁶ Ariû na aarî a îthe wetû, nie nînîîtûmîrîte na ngatûmîra Apolo tûrî ta ngerekano nîguo mue mûvote kûthoma kuumana natue maûndû marîa maugîte atîrî, “Rûmagîrîrani maûndû marîa mandîke.” Gûtirî mûndû wana ûmwe gatagatîrî kenyu wagîrîrwe nî gwîtîîa na ûndû wa kwenda mûndû ûmwe na kûmenereria ûrîa wîngî?

⁷ Nû wagûtuire mûnene gûkîra arîa engî? Nîndûî ûrî nakîo ûtaavewa? Na ethîrwa nîkwa waveerwe, wîtîîaga nîkî takwa atarî kûvewa waveerwe?

⁸ Nîkwa mûreciria atî nîmûrîkîtie kûgîa na maûndû monthe marîa mûvatarîte? Mwîciragia atî mue mûrî atongu? Nîkwa mûreciria atî nîmûrîkîtie gûtuîka athamaki wana ethîrwa tue tûtirî athamaki? Naarî kethîrwa mue mûrî athamaki, nîguo wanatue tûtuîke athamaki vamwe namue.

⁹ Nwatî nîrona atî Ngai nîatuigîte tue atûmwa tûrî mûthiia viû, wata andû matuîrîrîtwe kûragwa. Twîkariî ta kîrorerwa kûrî nthî yonthe ya araika na ya andû.

¹⁰ Tûrî irimû nîûndû wa Kristû. Nwatî mue mûrî aûgî mûrî na ûrûmwe na Kristû. Tûtirî na vinya, nwatî mue mûrî na vinya! Mue mûrî atîîe nwatî tue tûrî anyarare!

¹¹ Nginya îvindarî rîîrî tue nîtûvûtaga, tûkanyonda na tûgekîra matangari. Nîtûrivagwa na tûgatura ciîkaro.

¹² Tue ene nîtwînogagia tûkîruta wîra na njara cietû. Vîndî îrîa tûkûrumwa nî andû nîtûmarathimaga na vîndî îrîa tûkûnyarirwa nî andû nîtûmagîrîria.

¹³ Vîndî îrîa andû maria maûndû macûku matwîgiî nîtwaragia maûndû maro marîa mamegiî. Tue rîu tûtuîtwe ta takataka ya gûkû nthî. Tûtuîtwe ta gîko gîa gûkû nthî.

¹⁴ Ndirandîka maûndû mama nîguo nîmûconorithie. Nwatî nîramandîka nîguo nîmûtaare takwa mûrî ciana ciakwa irîa mendete.

¹⁵ Nîûndû wana ethîrwa mûrî na arimû matangîtarîka mûtûûrîrerî wenyu wa Ûkristiano, mûrî na îthe ûmwe tu. Na nîûndû wa kwîthîrwa mûrî na ûrûmwe na Jesû Kristû, nînatuîkire îthe wenyu na njîra ya kûmûkinyîria Ûvoro Mwaro.

¹⁶ Kwoguo nînîramûthaitha mwîgerekanie nanie.

¹⁷ Na kîu nîkîo kîratûma ndûme Timotheo kûrî mue. Ke nî mwana wakwa ûrîa mendete na nîmwîvokeku mûtûûrîrerî wake wa Ûkristiano. Nîakûmûririkania maûndû marîa nûmagîrîra mûtûûrîrerî wakwa mûcerû nîrî ûrûmwe na Jesû Kristû. Maûndû mau nîmo nthomithanagia makanitharî monthe marîa marî kûndû kuonthe.

¹⁸ Andû amwe gatagatîrî kenyu nîmambîrîrîtie gwîtîîa nîûndû meciragia atî ndigaûka kûmûcerera rîngî.

¹⁹ Nwatî vuva wa kavinda kanini nîngaamûcerera ethîrwa ûcio nîguo wendi wa Mwathani. Kwoguo nîngaamenya vinya ûrîa andû acio marî naguo, nwatî tî ûrîa tu maugaga.

²⁰ Nîûndû Ûthamaki wa Ngai ndwonekaga na njîra ya ûrîa andû maugaga, nwatî nî na njîra ya ûvoti wao.

²¹ Mûrenda atîa? Mûrenda mbûke kûrî mue na rûthanju kana mbûke nîrî na roho wa wendani na ûvoreri?