1Akor 3 - ÎVUKU RÎA ÛVORO MWARO

Ndungata cia Ngai

¹ Ariû na aarî a îthe wetû, nie ndingîavotire kûmwarîria ta ûrîa mbaragîria andû arîa marî na Roho. Vandû va ûguo namwarîrie ta mûrî andû a nthî wata ûrîa nîngîarîria andû arîa methagîrwa mekariî ta tûkenge wîtîkiorî wa Kristû.

² Kîrîra kîrîa nie namûveere gîekariî ta îria nwatî tî ta irio ino nyûmû, nîûndû mue mûtingîavotire kûrîa irio ino nyûmû. Wana rîu mue mûtingîvota kûirîa,

³ nîûndû wana rîu mûtûûraga wata ûrîa andû a gûkû nthî matûûraga. Rîrîa kûrî na wîru na ngarari gatagatîrî kenyu-rî, na kinthî ûndû ûcio ndwonanagia atî mue mûrî a gûkû nthî na mûtûûraga ta andû a gûkû nthî.

⁴ Rîrîa mûndû ûmwe gatagatîrî kenyu akuga, “Nie nûmagîrîra Paûlo,” na wîngî akauga, “Nie nûmagîrîra Apolo,” na kinthî mue mûtiîthagîrwa mûgîka wata andû a gûkû nthî?

⁵ Apolo nîkwa arî û? Nake Paûlo nû? Tue tûrî ndungata cia Ngai irîa ke aatûmîre nîguo mwîtîkie. Na wa mûndû wa ûmwe wa cietû arutaga wîra ûrîa Mwathani aamûveere arute:

⁶ Nie nînavandire mbegû, Apolo nîwetîrîrie mîmera manjî, nwatî Ngai nîke wamîvotithirie gûkûra.

⁷ Kwoguo mûndû ûrîa ûvandaga wana ûrîa wîtagîrîria manjî ndarî vata. Ngai tu nîke ûrî vata nîûndû nîke ûtumaga indo ikûre.

⁸ Vatirî ngûrani gatagatî ka mûndû ûrîa ûvandaga na ûrîa wîtagîrîria manjî, na Ngai akaarîva mûndû mûcara kûringana na wîra ûrîa ke mwene arutîte.

⁹ Tue tûrî aruti a wîra wa Ngai tûkîrutithania vamwe, namue nîmue mûgûnda wa Ngai na nwa mue nyomba ya Ngai.

¹⁰ Na ngîtûmagîra kîveo kîrîa naveerwe nî Ngai, nie nînatumire mûcingi wa nyomba îo nîrî ta mûtumi ûrî na wara mwîngî. Nake mûndû wîngî nîaratuma îgûrû rîaguo. Nwatî wa mûndû nwanginya amenyerere ûrîa atumaga îgûrû rîaguo.

¹¹ Gûtirî mûcingi wîngî mûndû angîvota gûtuma tiga ûrîa ûtumîtwe nî Ngai na nîguo Jesû Kristû.

¹² Andû amwe magaatuma îgûrû rîa mûcingi ûcio na thaavu kana sîlûva kana mathiga ma goro; engî nao magaatuma na mbaû kana nyaki kana mîvavîa.

¹³ Na wîra wa mûndû wa mûndû nîûkoonekana vîndî îrîa ûkaaguûrua mûthenya wa Kristû. Wîra wa mûndû nîûkaamenyekana nîûndû nîûkaagerua na mwaki nîguo kûmenyekane waro ûrîa wîra ûcio wîkariî.

¹⁴ Ethîrwa kîrîa gîatumirwe îgûrû rîa mûcingi ûcio gîtikaavîa, mûtumi wakîo nîakaamûkîra kîveo.

¹⁵ Nwatî ethîrwa wîra wa mûndû nîûkaavîa mûndû ûcio nîakaaûrwa nîguo, nwatî ke mwene nîakaavonoka wata mûndû ûvîtûkîrîrîte mwakirî.

¹⁶ Mue nîmwicî atî mûrî hekarû ya Ngai na Roho wa Ngai atûûraga ndaarî yenyu.

¹⁷ Kwoguo mûndû wa wonthe angîcûkangia hekarû ya Ngai, Ngai nîakaamûcûkangia. Hekarû ya Ngai nî ntheru na mue ene nîmue hekarû yake.

¹⁸ Mûndû wana ûrîkû ndakeveenie. Ethîrwa nîkûrî na mûndû wana ûmwe gatagatîrî kenyu wîciragia atî ke nî mûûgî arî gûkû nthî îno, nîwagîrîrwe nîgwîtua kîrimû nîguo atuîke mûûgî na ma.

¹⁹ Nîûndû kîrîa andû a gûkû nthî metaga ûûgî, Ngai agîtaga ûrimû. Kwandîkîtwe mandîkorî matheru atîrî, “Ngai atûmagîra wara wa andû arîa aûgî ûrî ta mûtego wa kûmatega.”

²⁰ Wana gîcunjîrî kîngî Kîam mandîko matheru nîkwandîkîtwe atîrî, “Mwathani nîaicî atî meciria ma andû arîa aûgî nî ma mana.”

²¹ Kwoguo mûtigetîîe nîûndû wa andû. Maûndû monthe nî menyu.

²² Paûlo, Apolo, na Petero wana nthî îno, mwoyo, gîkuû, maûndû marîa marî kuo rîu na marîa magaaûka, mau monthe nî menyu.

²³ Mue mûrî a Kristû, na Kristû nî wa Ngai.