1Akor 2 - ÎVUKU RÎA ÛVORO MWARO

Ndûmîrîri îgiî Kristû ûrîa wambirwe mûtharavarî îgûrû

¹ Ariû na aarî a îthe wetû, rîrîa naûkire kûrî mue kûmûvunjîria ndûmîrîri îgiî nthitho ya Ngai ndiatûmîra ciugo ndito kana ûûgî mûnene.

² Nîûndû rîrîa naarî vamwe namue nînatuire ndikarie ûndû wîngî wa tiga tu ûvoro wîgiî Jesû Kristû na gûkua gwake mûtharavarî îgûrû.

³ Kwoguo rîrîa naûkire kûrî mue, ndiarî na vinya na nînatetemaga nîûndû wa guoya.

⁴ Ngîthomithia na ngîvunjia ndiatûmîra ciugo irî na ûûgî wa kîûmûndû irîa igucagîrîria andû, nwatî natûmîre ciugo cionanagia vinya ûrîa ûvecanagwa nî Roho wa Ngai.

⁵ Kwoguo wîtîkio wenyu ndumanîte na ûûgî wa ûmûndû nwatî umanîte na vinya wa Ngai.

Ûûgî wa Ngai

⁶ Kûnarî ûguo kûrî arîa marî na ûgima wa kîîroho, mbaragia maûndû ma ûûgî. Nwatî tî ûûgî ûrîa umîte gûkû nthî kana kûrî anene a gûkû nthî arîa marathira.

⁷ Mbaragia ûvoro wîgiî ûûgî wa Ngai ûrîa ûtwîre ûthithîtwe. Na wana mbere ya nthî yûmbwa, Ngai nîwaûthuurîte nîguo tûgîe na riiri.

⁸ Gûtirî mûnene wana ûmwe wa gûkû nthî wamenyire ûûgî ûcio. Nîûndû mangîaûmenyete matingîambire Mwathani ûrîa ûrî riiri mûtharavarî îgûrû.

⁹ Nwatî mandîkorî matheru kwandîkîtwe atîrî, “Ûndû ûrîa gûtarî mûndû wana ûmwe wanawona kana awîgue, ûrîa gûtarî mûndû wana ûmwe waneciria atî nwa wîkîke, ûndû ûcio nîguo Ngai aavarîrie nîûndû wa arîa mamwendete.”

¹⁰ Nwatî Ngai nîatûguûrîrîtie nthitho yake na njîra ya Roho wake. Roho atuîragia maûndû monthe wana nginyagia nthitho irîa ndikîru mûno cia Ngai.

¹¹ Nû ûngîvota kûmenya meciria marîa mûndû wîngî arî namo? Roho ûrîa ûrî ndaarî ya mûndû nîke ûmenyaga meciria ma mûndû ûcio. Na njîra wata îo gûtirî mûndû wanamenya meciria ma Ngai tiga Roho wa Ngai.

¹² Tue tûtiamûkîra roho wa gûkû nthî, nwatî twamûkîre Roho ûrîa umîte kûrî Ngai nîguo tûvotage kûmenya iveo cionthe irîa Ngai atûvete.

¹³ Kwoguo tûtiaragia ûvoro wîgiî maûndû mama tûgîtûmagîra ciugo irîa twathomithirue na njîra ya ûûgî wa ûmûndû, nwatî twaragia tûgîtûmagîra ciugo irîa twathomithirue nî Roho. Kwoguo andû arîa marî na roho nîtûmataaragîria ûvoro wa ma wa kîîroho.

¹⁴ Mûndû wa wonthe ûtarî na Roho ndangîvota kwamûkîra iveo irîa ciumaga kûrî Roho wa Ngai. Andû ta acio meciragia ûcio nî ûrimû nîûndû vata waguo ûngîtuîrua tu na njîra ya Kîîroho.

¹⁵ Mûndû wa wonthe ûrî na Roho nîavotaga gûtuîria maûndû monthe, nwatî gûtirî mûndû ûngîvotaga kûmûtuîria.

¹⁶ Mandîkorî matheru kwandîkîtwe atîrî: “Nû wîcî meciria ma Mwathani? Nû ûngîvota kûmûtaara?” Nwatî tue nîtwîthagîrwa tûrî na meciria ma Kristû.