1Akor 16 - ÎVUKU RÎA ÛVORO MWARO

Maruta ma gûtethia etîkia

¹ Rîu nîngwandîka ûvoro wîgiî mbeca irîa irutagwa nîûndû wa andû a Ngai arîa marî Judea. Mue îkagani wata ûrîa nerire makanitha ma Galatia.

² Wa mûthenya wa Jumaviri, wa mûndû nwa nginya aigage mbeca kûringana na ûrîa athûkûmîte. Wa mûndû nîwagîrîrwe nî kwiga mûthithû nîguo gûtikethîrwe kûrî na vata wa kûngania mbeca rîrîa ngaaûka.

³ Narîkia gûka nîngaatûma arîa onthe mûkaathuura nîguo mavire iveo cienyu Jerusalemu. Nîngaamatûma marî na maarûa cia kûmamenyithania.

⁴ Ethîrwa nîngoona kûrî na wagîrîru wa nanie nthiî, nîtûkaathiîcania vamwe nao.

Mîvango ya Paûlo

⁵ Nîmvangîte kûvîtûkîrîra Makedonia, na kwoguo nîngaaûka kûrî mue narîkia kûvîtûkîrîra kuo.

⁶ Nwa kûvoteke ngeekarania namue gwa kavinda, wana kana mbîkaranie namue îvinda rîonthe rîa mvevo. Namue nîmûkaandethereria nîguo ngaavota kûthiî na mbere na rûgendo rwakwa rwa kûrîa kuonthe ngaathiî.

⁷ Ndikwenda kûmwona rîu mvîtûkîte, nîûndû nîrevoka gûgeekarania namue kavinda karaca, ethîrwa Mwathani nîagaatwîtîkîria.

⁸ Nîmbîkara gûkû Efeso nginya mûthenya wa Pentekosto.

⁹ Nîûndû gûkû kûrî na kanya ga kûruta wîra mûnene na mwaro wana ethîrwa kûrî na andû eengî mararegana nanie.

¹⁰ Timotheo aûka kûrî mue, geriani kwona atî nîwekarania namue atarî na guoya nîûndû araruta wîra wa Mwathani wata ûrîa ndutaga.

¹¹ Kwoguo mûtigetîkîrie mûndû wana ûmwe gatagatîrî kenyu amûnyarare. Nwatî mûtethererieni avote kûthiî na mbere na rûgendo rûu arî na thayû nîguo agaacoka kûrî nie. Na nie tûrî na ariû na aarî a îthe wetû nîtûmwetererete.

¹² Na rîu ûvoro wîgiî Apolo mûrû wa îthe wetû nî atî, mavinda meengî nîmbîthîrîtwe ngîmûthaitha aûke amûcerere marî vamwe na ariû na aarî a îthe wetû arîa engî. Nwatî ndarenda wana vanini gûka rîu. Nîagaaûka kûrî mue rîrîa akaagîa na kanya.

Ciugo cia Mûthiia

¹³ Îkaragani mwîvarîrîtie na mwîkindîrîtie wîtîkiorî wenyu. Gîani na ûmîrîru. Gîani na vinya.

¹⁴ Rutagani wîra wenyu wonthe mûrî na wendani.

¹⁵ Mue ariû na aarî a îthe wetû, nîmwicî ûvoro wîgiî Stefana na andû a mûciî wake. Nîmwicî atî nîo maarî a mbere gwîtîkia îtûûrarî rîa Akaia na atî nîmevecanîte matungatîre andû a Ngai. Nie nîramûthaitha

¹⁶ mwathîkagîre andû ta acio na mûndû wîngî wa wonthe ûrîa ûrutaga wîra na agatungata vamwe nao.

¹⁷ Nîrîmûkenu mûno nîûndû Stefana, Fotunatuci na Akaiku nîmaaûkire kûrî nie vandûrî venyu.

¹⁸ Nîmatûmîte meciria makwa manogoke wa vamwe na menyu. Mue nîmwagîrîrwe nî kûthikagîrîria andû ta aya.

¹⁹ Makanitha monthe ma vûrûri wa Asia nîmamûkethia. Akuila, Pirisila na kanitha ûrîa ûcemanagia kwao mûciî, nîwamûkethia na ngethi cia Ûkristiano.

²⁰ Ariû na aarî a îthe wetû onthe arîa marî gûkû nîmamûkethia. Kethaniani na ngethi ntheru cia kûmumunyana.

²¹ Nie Paûlo nînie mwene nandîka ngethi ino na njara yakwa.

²² Mûndû wa wonthe ûtendete Mwathani arogwatwa nî kîrumi. Maranatha: Mwathani wetû, ûka!

²³ Wega wa Mwathani Jesû nîwîkarage namue.

²⁴ Wendo wakwa nîwîkarage namue muonthe mûrî ndaarî ya Kristû Jesû. Ameni.