1Akor 15 - ÎVUKU RÎA ÛVORO MWARO

Kûriûka gwa Kristû

¹ Rîu ariû na aarî a îthe wetû, nîrenda kûmûririkania Ûvoro Mwaro ûrîa naamûvunjîrie. Nîmwawamûkîre na nîmûwîtîkîtie mwîkindîrîtie.

² Ûvoro ûcio nîguo ûtûmaga mûvonokue ethîrwa nîmûkûthiî na mbere kûwîtîkia. Ethîrwa tî mwîka ûguo, gwîtîkia kwenyu kwarî kwa mana.

³ Ûvoro wa mbere na wa vata mûno ûrîa namûkinyîrie na ûrîa wa nanie naamûkîre nî atî: Kristû nîwakwire nîûndû wa mevia metû, wata ûrîa kwandîkîtwe Mandîkorî Matheru.

⁴ Nake nîwathikirwe na mûthenya wa kathatû akîriûka, wata ûrîa kwandîkîtwe Mandîkorî Matheru.

⁵ Ke nîwaumîrîre Petero na agîcoka akiumîrîra atûmwa arîa îkûmi na aîrî.

⁶ Kristû nîwacokire akiumîrîra etîkia makîria ya magana matano. Eengî gatagatîrî kao marî mwoyo, nwatî amwe nî akuû.

⁷ Nîwacokire akiumîrîra Jakuvu na vuvarî akiumîrîra atûmwa onthe.

⁸ Na mûthiiarî viû Jesû nîwanyumîrîre wa nanie wana ethîrwa mbîkariî ta mûndû waciarirwe atarî mûkinyiu vîndî ya gûciarwa.

⁹ Nie nînie mûnini viû gatagatîrî ka atûmwa arîa engî onthe. Nie wana ndirî mwagîrîru wa gwîtwa mûtûmwa nîûndû nînaanyaririre kanitha wa Ngai.

¹⁰ Nwatî wega wa Ngai nîguo ûtûmîte nduîke ûrîa nie nîrî, na wega ûrîa ke aamveere ndwarî wa mana. Vandû va ûguo nîndutîte wîra na vinya mûno gûkîra atûmwa arîa engî onthe, wana ethîrwa na ma nie tînie naûrutire, nwatî nî wega wa Ngai ûrîa wîthagîrwa ûrî vamwe nanie waûrutire.

¹¹ Kwoguo wana ethîrwa nînie namûvunjîrie kana nî atûmwa arîa engî maamûvunjîrie, tuonthe tûvunjagia ûndû ûmwe na ûguo nîguo mwîtîkîtie.

Kûriûka kwa arîa akuû

¹² Rîu ethîrwa nîtûvunjagia ûvoro wîgiî kûriûka gwa Kristû, nîndûî kîratûma amwe gatagatîrî kenyu mauge atî arîa akuû matikaariûkua?

¹³ Kwoguo ethîrwa arîa akuû matikaariûkua, wana Kristû ndaariûkua.

¹⁴ Na ethîrwa Kristû ndaariûkua, kûvunjia gwetû nî kwa mana wana gwîtîkia kwenyu nwa kwa mana.

¹⁵ Makîria ya ûguo, wana nwa gûtuîke atî tue tûrî aira a maveeni nîûndû nîtûrutaga ûira tûkauga atî Ngai nîke wariûkirie Kristû. Nwatî ethîrwa arîa akuû matiriûkagua, wana Ngai ndaariûkia Kristû.

¹⁶ Ethîrwa arîa akuû matiriûkagua wana Kristû ndaariûkua.

¹⁷ Na ethîrwa Kristû ndaariûkua, wîtîkio wenyu nî wa mana na mûtirî overe mevia menyu.

¹⁸ Wana rîngî nî kuga atî etîkia arîa maakwire metîkîtie Kristû nî kûra maaûrire.

¹⁹ Ethîrwa mwîrîgîrîro wetû varî Kristû nî wa ûtûûro ûyû tûrî naguo tu, nîtwagîrîrwe nî kwîguîrwa ntha gûkîra andû onthe arîa marî gûkû nthî.

²⁰ Nwatî ûma nî atî Kristû nîariûkîtue na agatuîka kîonereria gîa atî arîa makuîte wa nao nîmakaariûkua.

²¹ Gîkuû gîaûkire na njîra ya mûndû ûmwe, nakuo kûriûka gwaûkire na njîra ya mûndû ûmwe.

²² Wata ûrîa andû onthe makucaga nîûndû wa gûtuîka atî o marî ûrûmwe na Adamu, nwa ta guo andû onthe makaariûkua nîûndû wa kwîthîrwa marî ûrûmwe na Kristû.

²³ Wa mûndû nîakaariûkua kavinda gake gakinya. Kristû nîke warî wa mbere kûriûkua. Na rîrîa Kristû agaaûka, arîa mamwîtîkîtie nîmakaariûkua.

²⁴ Na vuva wa ûguo vingo ya mûthiia nîgaakinya. Na rîrîa îgaakinya, Kristû nîagaacûkangia moonene monthe, maavinya monthe na athani onthe na acoke anenganîre ûthamaki kûrî Ngai Îthe.

²⁵ Kristû nwa nginya akaathana nginya rîrîa Ngai akaavoota nthû cionthe ciake na aciige rungu rwa magûrû ma Mûrû wa Mûndû.

²⁶ Gîkuû nîkîo gîkethîrwa kîrî nthû ya mûthiia îrîa îkaavootwa.

²⁷ Mandîko Matheru maugîte atîrî, “Ngai nîwigîte indo cionthe rungu rwa magûrû ma mûriû wa wake.” Nwatî mandîko Matheru makiuga, “Indo cionthe” irî rungu rwa magûrû ma mûriû wake, nîmaronania waro atî Ngai ke mwene, ûrîa waigire indo cionthe rungu rwa Kristû tî mûtarîre vo.

²⁸ Ngai aiga indo cionthe rungu rwa wathani wa Kristû, Kristû ke mwene nîakeeiga rungu rwa wathani wa Ngai ûrîa waigire indo cionthe rungu rwa Mûriû, nake Ngai nîagaacoka athane maûndûrî monthe.

²⁹ Ethîrwa akuû matikaariûkua, andû arîa mavatithagua vandûrî va akuû mageeka atîa? Ethîrwa akuû matikaariûkua andû mavatithagua vandûrî vao nîkî?

³⁰ Tue natue twîikagia ûgwatirî vîndî cionthe nîkî?

³¹ Ariû na aarî a îthe wetû nîngucaga wa mûthenya wa mûthenya. Nîrauga ûguo nîûndû wenyu nîûndû tue tûtûûraga tûrî ûrûmwe na Mwathani wetû Jesû Kristû.

³² Ethîrwa naatongoretue nî merirîria ma kîûmûndû vîndî îrîa naarûaga na nyamû cia kîthaka kûu Efeso naagunîkire atîa? Nwatî ethîrwa akuû matikaariûkua, “Tigani tûrîe na tûnyue nîûndû rûyû nîtûgaakua.”

³³ Tigani kûveenua. “Nî ûndû mûcera na mûkûndû akûndûkaga wata guo.”

³⁴ Ambîrîriani gûtûmîra meciria menyu na njîra îrîa yagîrîrîte, na mûtige kwîvagia. Amwe gatagatîrî kenyu matiîcî Ngai. Nîrauga ûguo nîguo mûconoke.

Mwîrî ûrîa ûkaariûka

³⁵ Nwatî mûndû avota kûria atîrî, “Akuû mariûkaga atîa? Makeethîrwa marî na mîîrî ya mûthemba ûrîkû?”

³⁶ We kîrimû gîkî! Vîndî îrîa wavanda mbegû nwa nginya îkue mbere ya kûmera.

³⁷ Mbegû îrîa ûvandaga nwa îthîrwe îrî ya ngano kana ya kîndû wa kîonthe, nwatî ndîthagîrwa îrî mûmera ûrîa îgaatuîka yakûra.

³⁸ Nwatî Ngai nîavecaga mbegû îo mwîrî ûrîa ke angîenda kûmîva. Ngai nîavecaga wa mbegû mwîrî ûrîa ûmîagîrîrîte.

³⁹ Mîîrî ya ciûmbe irîa irî mwoyo ndîvananaga. Andû methagîrwa marî a mûthemba ûmwe, nyamû cia kîthaka ikethîrwa îrî na mûthemba wacio, iconi wa ta guo na nthamaki nacio ikethîrwa na mwîrî wa mûthemba wîngî.

⁴⁰ Nîkûrî ciûmbe irîa irî îgûrû na ciûmbe irîa irî gûkû nthî. Riiri wa ciûmbe irîa irî îgûrû nî ngûrani na riiri wa ciûmbe irîa irî gûkû nthî.

⁴¹ Riûa rîrî riiri wa mûthemba warîo, mweri riiri wa mûthemba wîngî, na njata nacio ikethîrwa na riiri wa mûthemba wîngî. Na wa njata nayo îrî riiri wa mûthemba wayo.

⁴² Ûguo nîguo gûkethîrwa gwîkariî vîndî îrîa akuû makaariûkua. Vîndî îrîa mwîrî wathikwa nthî ta mbegû nîûcokaga kwora; nwatî ûrariûkua ndûcokaga kwora.

⁴³ Mwîrî ûkîthikwa wîthagîrwa ûrî mûcong'i na ûtarî na vinya; nwatî mwîrî wariûkua ûkethîrwa ûrî na riiri na ûrî na vinya.

⁴⁴ Mwîrî ûrîa wonekaga nîguo ûthikagwa, nwatî mwîrî ûcio wariûkua wîthagîrwa ûrî wa kîîroho. Ethîrwa nîkûrî mwîrî ûrîa wonekaga, nîkûrî wana mwîrî wa kîîroho.

⁴⁵ Mandîkorî Matheru kwandîkîtwe atîrî, “Mûndû wa mbere kûmbwa na nîke Adamu, nîwatuîkire mûndû ûrî mwoyo.” Nwatî Adamu wa mûthiia nîwatuîkire Roho ûrîa ûvecanaga mwoyo.

⁴⁶ Mwîrî wa kîîroho tîguo ûkaga mbere, nwatî nî ûrîa wonekaga. Mwîrî ûcio wonekaga nîûcokaga ûkarûmîrîrwa nî wa kîîroho.

⁴⁷ Mûndû wa mbere, na nîke Adamu, aaumire rûkûngûrî rwa nthî, nwatî mûndû wa kaîrî aaumire îgûrû.

⁴⁸ Andû a gûkû nthî mekariî ta mûndû ûrîa waumire gûkû nthî. Nwatî andû a îgûrû mekariî ta mûndû wa îgûrû.

⁴⁹ Wa ta ûrîa tue twavananire na mûndû wa gûkû nthî, nwaguo tûkaavanana na Mûndû wa îgûrû.

⁵⁰ Ariû na aarî a îthe wetû, ûrîa nîrenda kuga nî atî kîrîa kîthondeketwe na mwîrî na nthakame gîtingîvota kûgaa Ûthamaki wa Ngai. Kîrîa nakîo kîoraga gîtingîvota kûgaa kîrîa gîtoraga.

⁵¹ Tathikîrîriani nîmwîre nthitho: Tuonthe tûtigaakua, nwatî tuonthe nîtûkaagarûrûa,

⁵² wa rîmwe ta kûvucia kwa riitho vîndî îrîa karumbeta gakaavuvwa. Vîndî îrîa karumbeta gakaavuvwa, akuû nîmakaariûkua ûndû matagacoka gûkua rîngî na tue tuonthe nîtûkaagarûrûka.

⁵³ Kîrîa kîoraga nwa nginya gîkaagarûrûka gîtuîke kîrîa gîtoraga. Kîrîa gîkucaga nwa nginya gîkaagarûrûka gîtuîke kîrîa gîtangîkua.

⁵⁴ Kwoguo vîndî îrîa mwîrî ûrîa woraga ûkaagarûrûka ûtuîke mwîrî ûrîa ûtoraga, na mwîrî ûrîa ûkucaga naguo ûgarûrûke ûtuîke mwîrî ûrîa ûtakucaga, mandîko matheru nîmakaavingua marîa maugîte atîrî: “Gîkuû nîgîcûkangîtue, ûvootani nî mûkinyanîru!”

⁵⁵ “We Gîkuû, ûvootani waku ûrî kû? We Gîkuû, rûvora rwaku rûrî kû?”

⁵⁶ Rûvora rwa mevia nî gîkuû, namo mevia makaavewa ûvoti nî watho.

⁵⁷ Nwatî nîtûracokia ngatho kûrî Ngai ûrîa ûtûvecaga ûvootani na njîra ya Mwathani wetû Jesû Kristû!

⁵⁸ Kwoguo, ariû na aarî a îthe wetû mue mendete mûno, îkaragani mûmîrîrîtie na mûtakwenyenya. Vîndî cionthe rutagani wîra wa Mwathani na vinya nîûndû nîmwicî atî wîra wa Mwathani tî wa mana.