1Akor 14 - ÎVUKU RÎA ÛVORO MWARO

Maûndû mengî megiî iveo kuuma kûrî Roho

¹ Geragiani na vinya mûno kûgîa na wendani. Îîriragîrieni na vinya mûno kûgîa na iveo cia kîîroho, na mûno makîria kîveo gîa kûvota kwanîrîra ndûmîrîri ya Ngai.

² Andû arîa maragia na nthiomi matiîthagîrwa makîarîria andû nwatî methagîrwa makîarîria Ngai, nîûndû gûtirî mûndû wîthagîrwa agîtaûkîrwa nî maûndû marîa maragia. Matongoragua nî Roho makîaria ûma ûrîa ûrî nthithorî.

³ Nwatî arîa managîrîra ndûmîrîri ya Ngai kûrî andû methagîrwa makîarîria andû acio makîmekîra vinya, makîmaûmîrîria na makîmavoreria.

⁴ Andû arîa maragia na nthiomi metethagia o ene, nwatî arîa managîrîra ndûmîrîri ya Ngai matethagia kanitha yonthe.

⁵ Nie nwa mende muonthe mwîthagîrwe mûkîaria na nthiomi, nwatî nwa mende mûno makîria mûgîe na kîveo gîa kwanîrîra ndûmîrîri ya Ngai. Andû arîa managîrîra ndûmîrîri ya Ngai methagîrwa marî vata gûkîra arîa maaragia na nthiomi; tiga nwanga vethîrîtwe varî na andû engî mangîvota gûtaûra ûrîa marauga nîguo kanitha yonthe îkîrwe vinya.

⁶ Kwoguo ariû na aarî a îthe wetû, ngaûka kûrî mue ngîaragia na nthiomi, nîngîthîrwa nîrî wa vata ûrîkû kûrî mue? Ndingîthîrwa nîrî na vata kûrî mue wana vanini, tiga nwanga mbûkîte kûmûretere ûguûrio, ûmenyo, ûrathi kana kîthomo.

⁷ Na njîra wata îo, indo irîa itarî mwoyo na itûmagîrwa nî mûndû akina, ta mîtûrirû na ngita, kethîrwa itingîgamba ûndû mîgambo yacio îngîkûrûkanîka, mûndû ndangîmenya mûgambo ûrîa ûrainwa.

⁸ Ethîrwa karumbeta nwa kavuvwe ûndû gatangîguîka waro, nû ûngîîvarîria kûthiî mbaararî?

⁹ Ûguo nwa guo mwîkariî. Ethîrwa mûtikaaragia na nthiomi ûndû mûndû wa wonthe angîtaûkîrwa, gûtirî mûndû ûkethagîrwa akîmenya ûrîa mûrauga.

¹⁰ Gûtirî na nganja atî gûkû nthî kûrî nthiomi nyîngî na ngûrani, nwatî gûtirî wana rûmwe rwa cio rûtarî na ûrîa rugîte.

¹¹ Nwatî ethîrwa ndiramenya rûthiomi rûrîa rûrarua, nîngîthîrwa nîrî mûgeni kûrî arîa mararia, nao arîa mararia mangîthîrwa marî ageni kûrî nie.

¹² Ûguo nwa guo mwîkariî. Ethîrwa nîmwîriragîria mûno kûgîa na iveo irîa Roho avecanaga, nwa nginya mûgeragie mûno makîria ûrîa mûngîvota gûtûmîra iveo irîa ciîkîraga kanitha vinya.

¹³ Mûndû wa wonthe waragia na nthiomi nwa nginya, avoe nîguo avewe ûvoti wa gûitaûra.

¹⁴ Ethîrwa mvoyaga na nthiomi, roho wakwa nîke wîthagîrwa akîvoya, nwatî meciria makwa matiîthagîrwa makîgunîka.

¹⁵ Nie mbagîrîrwe nî gwîka atîa vi? Mbagîrîrwe nî kûvoya na roho wakwa na meciria makwa. Na rîrîa ngwina mbagîrîrwe nî kwina na roho wakwa na meciria makwa.

¹⁶ Nwatî ethîrwa mue mûkumagia Ngai na roho wenyu, mûndû ûrîa ûtarî mûtaûkîre na mûrî nake mavoyarî menyu angîvota atîa kuga “Ameni”? Ke ndangîvota kûmenya ûrîa ûrauga.

¹⁷ Wana ethîrwa nîmûcokagia ngatho kûrî Ngai na njîra mbaro, nwatî mûndû ûrîa mûrî nake ndethagîrwa akîgunîka wana vanini.

¹⁸ Nie nînjokagia ngatho kûrî Ngai nîûndû nîmbaragia na nthiomi makîria yenyu muonthe.

¹⁹ Nwatî mîcemaniorî ya kanitha nî kava mbarie ciugo ta ithano tu irîa andû mangîvota gûtaûkîrwa nîcio nîguo nthomithie andû arîa engî, gûkîra kwaria ciugo ngiri îkûmi na nthiomi.

²⁰ Ariû na aarî a îthe wetû, tigani gwîciiragia ta ciana. Maûndûrî marîa macûku tuîkani ta twana twa tûkenge, nwatî meciriarî menyu tuîkani ta andû agima.

²¹ Mandîkorî Matheru nîkwandîkîtwe atîrî: “Mwathani augîte atîrî, ‘Na njîra ya andû arîa maragia nthiomi, na ya tûnyua twa ageni, nîngaarîria andû aya, nwatî matikaanthikîrîria.’ ”

²² Kwoguo kîveo gîa kwaria na nthiomi ngûrani nî kîonereria kûrî andû arîa matetîkîtie, nwatî tî kûrî andû arîa metîkîtie. Nakîo kîveo Kîam ûrathi nî kîonereria kûrî andû arîa metîkîtie, nwatî tî kîonereria kûrî andû arîa matetîkîtie.

²³ Î narîo ethîrwa kanitha yonthe nwa îcemanie vamwe na andû onthe mambîrîrie kwaria na nthiomi, na andû amwe matarî ataûkîre na matetîkîtie matonye kuo, na kinthî matingîciria atî mûrî agûrûki?

²⁴ Nwatî ethîrwa muonthe nîmûranîrîra ndûmîrîri ya Ngai vîndî îrîa andû arîa matarî ataûkîre kana matetîkîtie maratonya kûrîa mûrî, maûndû monthe marîa maregua nîmo makûmacirithia na matûme mamenye mevia mao.

²⁵ Namo maûndû ma nthitho marîa marî ngororî ciao nîmakûguûrua. Kwoguo nîmakwînamîrîra na magooce Ngai makiugaga atîrî, “Na ma Ngai arî ava gatagatîrî kenyu!”

Mûvango wa kûrûmîrîrwa kanitharî

²⁶ Kwoguo ariû na aarî a îthe wetû, vîndî îrîa mûcemanîtie vamwe nîûndû wa kûgooca, mûndû ûmwe nîethagîrwe arî na rwîmbo, wîngî ethagîrwe arî na kîthomo, wîngî ethagîrwe arî na ûguûrio kuuma kûrî Ngai, wîngî ethagîrwe akîaria na nthiomi na wîngî ethagîrwe nîaravota gûtaûra ûrîa nthiomi icio ciugîte. Mworoto wa maûndû mama monthe wagîrîrwe nî kwîthîrwa ûrî wa gwîkîra kanitha vinya.

²⁷ Ethîrwa nî kûrî na mûndû ûkaaria na nthiomi, kûngîvoteka andû aîrî kana athatû nîo magîrîrwe nî kwaria, ûmwe vuva ya ûrîa wîngî. Mûndû wîngî nake nwa nginya ataûre maûndû marîa mararua.

²⁸ Nwatî ethîrwa gûtirî na mûndû wa gûtaûra maûndû mau, mûndû ûrîa ûraria na nthiomi nîwagîrîrwe nî gûkira vîndî îrîa arî kûrîa kanitha îcemanîtie. Ke nîwagîrîrwe nî kwîyarîria na ngoro na arîrie Ngai.

²⁹ Andû aîrî kana athatû arîa mavetwe ndûmîrîri ya Ngai nîmagîrîrwe nî kwaria nao acio engî metaûrîre.

³⁰ Nwatî ethîrwa mûndû wîngî wîkarîte nthî vakuvî nîwagîa na ûguûrio, mwaria wa mbere agîrîrwe nî gûkira.

³¹ Muonthe nwa mûvote kwanîrîra ndûmîrîri ya Ngai, wa mûndû vuva ya ûrîa wîngî. Na njîra îo andû onthe nîmakaathoma na maûmîrîrue.

³² Kîveo gîa kûvunjia ndûmîrîri ya Ngai Kîamgîrîrwe nî gûtongorua nî ûrîa wî nakîo.

³³ Nîûndû Ngai tî Ngai wa kûvîngîcithania maûndû nwatî nî Ngai wa thayû. Wa ta ûrîa gwîkariî makanitharî monthe ma andû a Ngai,

³⁴ aka marî kanitharî magîrîrwe nî gûkira. Matiîtîkîrîtue kwaria, nwatî nîmagîrîrwe nî kwathîka wata ûrîa watho wa Ayahudi ugîte.

³⁵ Ethîrwa nîkûrî ûndû wana ûmwe mangîenda kûmenya, magîrîrwe nî kûria athuuri ao ûndû ûcio marî mûciî. Nî ûndû ûrî na nthoni mûndûmûka akîaria arî kanitharî.

³⁶ Nîkwa arî mue kiumo gîa kiugo Kîam Ngai? Nîkwa mûreciria atî nwa mue muonga mûkinyîrîtwe nî kiugo kîu?

³⁷ Mûndû wa wonthe wîciragia atî ke nî mûrathi, kana atî ke arî na kîveo gîa kîîroho, nîwagîrîrwe nî kûmenya atî nie nîramwandîkîra maûndû marîa mbathîtwe nî Mwathani.

³⁸ Nwatî ethîrwa nî kûrî mûndû wana ûmwe ûtaramenya ûguo wa nake ndakamenyekane.

³⁹ Kwoguo ariû na aarî a îthe wetû, nîmwagîrîrwe nî kwîrirîria ûvoro wîgiî kwanîrîra ndûmîrîri ya Ngai. Nwatî mûtikarigîrîrie etîkia kwaria na nthiomi.

⁴⁰ Maûndû monthe magîrîrwe marûthagwe na njîra mbaro na îrî na mûvango.