1Akor 12 - ÎVUKU RÎA ÛVORO MWARO

Iveo kuuma kûrî Roho Mûtheru

¹ Rîu ariû na aarî a îthe wetû, nîrenda mûtaûkîrwe nî ûvoro wîgiî iveo kuuma kûrî Roho Mûtheru.

² Mue nîmwîcî ûrîa mwatûûraga vîndî îrîa mûtaarî atuîku etîkia. Nîmwavîtithagua na njîra nyîngî nîguo atî mûgoocage mîvuanano îtarî mwoyo.

³ Kwoguo nîrenda mûtaûkîrwe atî gûtirî mûndû waragia atongoretue nî Roho wa Ngai ûngiuga, “Jesû arogwatwa nî kîrumi!” Na gûtirî mûndû ûngiuga, “Jesû nî Mwathani” atatongoretue nî Roho Mûtheru.

⁴ Kûrî iveo cia mîthemba mîîngî, nwatî cionthe ciumaga kûrî Roho ûmwe.

⁵ Kûrî njîra nyîngî cia gûtungata nacio, nwatî nî Mwathani wa ûcio ûmwe ûtungatagwa.

⁶ Kûrî mîthemba ngûrani ya ûtungata, nwatî Ngai ûrîa ûvecanaga vinya wa gûtungata kûrî mûndû wa mûndû nî ûmwe.

⁷ Wa mûndû nîavecagwa Roho nîûndû wa wagîrîru wa andû onthe.

⁸ Roho nîavecaga mûndû ûmwe ndûmîrîri îcûrîte ûûgî, na Roho wa ûcio akava mûndû wîngî ndûmîrîri îcûrîte ûmenyo.

⁹ Roho wa ûcio nîavecaga mûndû ûmwe wîtîkio, na kûrî mûndû wîngî Roho wa ûcio nîavecanaga ûvoti wa kûvonia.

¹⁰ Roho nîavecaga mûndû ûmwe kîveo gîa kûringa ciama; kûrî wîngî akavecana ûvoti wa kûvecana ndûmîrîri ya Ngai; na kûrî wîngî akavecana ûvoti wa kûthuurûkania nî iveo irîkû ciumanîte na Roho na nî irîkû itaumanîte na Roho. Roho nîavecaga mûndû ûmwe ûvoti wa kwaria na nthiomi cia mîthemba ngûrani, na kûrî mûndû wîngî akavecana ûvoti wa gûtaûra nthiomi icio.

¹¹ Wîra ûcio wonthe ûrutagwa nî Roho ûcio ûmwe. Kûringana na wendi wake, Roho nîavecanaga iveo ngûrani kûrî wa mûndû.

Mwîrî ûrî ciîga nyîngî

¹² Kristû ethagîrwa ekariî ta mwîrî wa mûndû ûrîa ûrî na ciîga nyîngî, nwatî nî ûmwe tu. Wana ethîrwa ciîga icio nî nyîngî cionthe ithondekete mwîrî ûmwe tu.

¹³ Amwe gatagatîrî getû nî Ayahudi, na amwe nî andû a Ndûrîrî, na engî nî ngombo, na amwe nî andû marî na wîyathi. Nwatî tuonthe twavatithirue na njîra ya Roho ûmwe tûgîtuîka mwîrî ûmwe, na tûkînyua Roho wa ûcio ûmwe.

¹⁴ Nîûndû mwîrî ndwîthagîrwa ûthondeketwe nî kîîga kîmwe tu, nwatî ûthondeketwe nî ciîga nyîngî.

¹⁵ Kûgûrû nwa kuge atîrî, “Nîûndû tînie njara, ndirî kîîga Kîam mwîrî.” Nwatî kuga ûguo gûtingîgiria kûgûrû rûtige gûtuîka kîîga Kîam mwîrî.

¹⁶ Gûtû nwa kuge atîrî, “Nîûndû tînie riitho, ndirî kîîga Kîam mwîrî.” Nwatî kuga ûguo gûtingîgiria riitho rîtige gûtuîka kîîga Kîam mwîrî.

¹⁷ Ethîrwa mwîrî wonthe nî riitho, ûngîvota kwîgua atîa? Ethîrwa mwîrî wonthe nî gûtû, ûngîvota kûnungîra atîa.

¹⁸ Nwatî wata ûrîa kûrî, Ngai eekîrire ciîga icio ngûrani cia mwîrî wata ûrîa ke eendeete.

¹⁹ Gûtingîthîrwa kûrî na mwîrî kethîrwa ciîga cionthe cia mwîrî nî kîîga kîmwe.

²⁰ Ûma nî atî nîkûrî ciîga nyîngî nwatî mwîrî nî ûmwe.

²¹ Kwoguo riitho rîtingîvota kwîra njara atîrî, “Nie ndirakûvatara!” Nakîo kîongo gîtingîvota kwîra kûgûrû atîrî, “Nie ndirakûvatara!”

²² Vandû va ûguo, ciîga irîa irî vata mûno nî irîa twonaga takwa itarî na vinya.

²³ Ciîga irîa twonaga takwa itarî na vata nîcio tûmenyagîrîra mûno. Nacio ciîga cia mwîrî irîa itagîrîrwe kûonwa nî andû nîcio tûvecaga gîtîîo Kîam mwanya,

²⁴ makîria ya ciîga irîa ciîngî mbaro. Nwatî Ngai ke mwene nîke waûmbire mwîrî na akîva ciîga irîa itarî vata gîtîîo kînene.

²⁵ Kwoguo mwîrîrî gûtirî ngaûkano, nwatî ciîga cionthe ngûrani ciaguo nîimenyanagîrîra cio mene.

²⁶ Kîîga kîmwe Kîam mwîrî gîkathînîka, ciîga icio ciîngî cionthe nîithînîkaga vamwe nakîo. Nakîo kîîga kîmwe Kîam mwîrî gîkavewa gîtîîo ciîga icio ciîngî cionthe nîikenaga vamwe nakîo.

²⁷ Mue muonthe vamwe mûrî mwîrî wa Kristû na wa ûmwe gatagatîrî kenyu nî kîîga Kîam mwîrî ûcio.

²⁸ Kanitharî Ngai nîathuurîte: amwe matuîke atûmwa, engî arathi, na kathatû akathuura arimû. Nîacokete akathuura aringi ciama; makarûmîrîrwa nî arîa mavetwe ûvoti wa kûvonania, arîa matethagia arîa engî, atongoria na arîa maragia na nthiomi.

²⁹ Tî andû onthe methagîrwa marî atûmwa, kana arathi, kana arimû, kana aringi ciama.

³⁰ Tî andû onthe methagîrwa mavetwe ûvoti wa kûvonia mîrimû, kana ûvoti wa kwaria na nthiomi ng'eni kana ûvoti wa gûtaarîria nthiomi icio.

³¹ Kwoguo îîriragîrieni na vinya kûgîa na iveo irîa irî vata mûno makîria. Nwatî rîu nie nîngûmwonia njîra îrîa mbaro gûkîra irîa ciîngî cionthe.