1Akor 11 - ÎVUKU RÎA ÛVORO MWARO

¹ Îîgerekanagieni nanie wata ûrîa nîgerekanagia na Kristû.

Gwîkunîkîra kîongo vîndî ya kûvoya

² Nînîmûgathagîrîria nîûndû nîmûndirikanaga vingo cionthe na nîmûrûmagîrîra waro kîrîra kîrîa namûkinyîrie.

³ Nwatî nîrenda mûtaûkîrwe atî Kristû nî kîongo Kîam mûndûmûrûme wa wonthe, na mûndûmûrûme nî kîongo Kîam mûka, nake Ngai nî kîongo gîa Kristû.

⁴ Mûndûmûrûme wa wonthe ûvoyaga kana wanagîrîra ndûmîrîri ya Ngai akunîkîrîte kîongo vîndî îrîa andû arîa engî maravoya nîaconorithagia Kristû.

⁵ Nake mûndûmûka wa wonthe ûvoyaga kana wanagîrîra ndûmîrîri ya Ngai atekunîkîrîte kîongo gîake vîndî îrîa andû arîa engî maravoya nîaconorithagia mûthuuriwe. Gûtirî ngûrani gatagatî ka mûndûmûka ûcio na mûndûmûka ûrîa wenjetwe kîongo.

⁶ Nîûndû ethîrwa mûndûmûka wa wonthe tî ekunîkîra kîongo gîake, nîwagîrîrwe nî kwenja njuîrî ciake. Nwatî ethîrwa mûndûmûka nîaconokaga vîndî îrîa arî mwenje kîongo kana atinîtue njuîrî, nîwagîrîrwe nî gûkunîkîra kîongo gîake.

⁷ Mûndûmûrûme ndagîrîrwe nî gûkunîkîra kîongo gîake nîûndû nîwonanagia mûvianîre na riiri wa Ngai. Nwatî mûndûmûka onanagia riiri wa mûndûmûrûme.

⁸ Mûndûmûrûme ndaaûmbwa kuuma kûrî mûndûmûka, nwatî mûndûmûka aaûmbirwe kuuma kûrî mûndûmûrûme.

⁹ Mûndûmûrûme ndaaûmbwa nîûndû wa wagîrîru wa mûndûmûka, nwatî mûndûmûka aaûmbirwe nîûndû wa wagîrîru wa mûndûmûrûme.

¹⁰ Kwoguo nîûndû wa araika, mûndûmûka nîwagîrîrwe nî gûkunîka kîongo gîake nîguo onanie atî arî rungu rwa wathani wa mûthuuriwe.

¹¹ Ûtûûrorî wetû tûrî na Mwathani, mûndûmûka ndangîthîrwa atanyitanîte na mûndûmûrûme, wana kana mûndûmûrûme ethîrwe atanyitanîte na mûndûmûka.

¹² Kwoguo wata ûrî mûndûmûka aaûmbirwe kuuma kûrî mûndûmûrûme, nwataguo mûndûmûrûme aciaragwa nî mûndûmûka; na indo cionthe ciumaga kûrî Ngai.

¹³ Mue ene tuani kana nîkwagîrîrîte mûndûmûka ekarage atekunîkîrîte kîongo rîrîa aravoya Ngai vîndî îrîa marî na andû arîa engî.

¹⁴ Na kinthî mûmbîre guo mwene ndûmwonagia waro atî mûndûmûrûme arî na njuîrî ndaca nîaconorithagua nîyo.

¹⁵ Nwatî njuîrî ndaca nîithakaragia mûndûmûka. Njuîrî ndaca îvecanîtwe kûrî mûndûmûka ta kîndû gîa gwîkunîka nakîo.

¹⁶ Nwatî ethîrwa mûndû wana ûrîkû nîarenda gûkararia ûndû ûcio, nie ûrîa nguga nî atî, tue wana kana makanitha ma Ngai tûtiîthagîrwa tûrî na mûtugo wîngî vîndî ya kûvoya.

Irio cia Mwathani cia Kîvwaî

¹⁷ Mataarorî marîa marûmîrîrîte, ndikûmûgathîrîria nîûndû mîcemaniorî yenyu ya mavoya nîmwîkaga naaî makîria ya ûrîa mwîkaga waro.

¹⁸ Ûndû wa mbere, nîmbîrîtwe atî kûrî ikundi itegucanaga mîcemaniorî yenyu. Nîmbîtîkîtie atî maûndû mamwe ma mau nîma ma.

¹⁹ (Gûtirî na nganja atî nwa nginya kûgîe na ngaûkano gatagatîrî kenyu nîguo mûndû avotage kwona cararûkû arîa evokeku gatagatîrî kenyu.)

²⁰ Vîndî îrîa mûgomanîte vamwe, tî irio cia Mwathani cia kîvwaî mwîthagîrwa mûkîrîa.

²¹ Nîûndû vîndî îrîa mûrarîa, wa mûndû arîcaga irio ciake atakwamba gweterera arîa engî. Andû amwe methagîrwa mavûtiî na arîa engî makethîrwa marî mîrîu.

²² Nîkwa mûtarî na mîciî yenyu mue ene kûrîa mûngîrîa na mûkanyua? Nîkwa mûnyararîte kanitha wa Ngai na mûconorithagia arîa methagîrwa matarî na kîndû? Nîmwîra atîa? Nîkwa ngûmûgatha nîûndû wa maûndû mama? Naarî! Nie tîmbîka guo!

²³ Kîrîra kîrîa namûveere nakîamûkîre kuuma kûrî Mwathani; atî Mwathani Jesû, ûtukû ûrîa aacukanîrîrwe nîwocire mûgate,

²⁴ agîcokia ngatho kûrî Ngai, akîwenyûranga na akiuga atîrî, “Ûyû nîguo mwîrî wakwa ûrîa ûvecanîtwe nîûndû wenyu. Îkagani ûguo nîûndû wa kûndirikanaga.”

²⁵ Na njîra wata îo, rîrîa maarîkirie kûrîa irio cia kîvwaî, nîwocire gîkombe na akiuga atîrî, “Gîkombe gîkî nî gîa kîrîkanîro gîcerû kîrîa kîonanîtue na njîra ya nthakame yakwa. Vîndî cionthe rîrîa mûkaanyunyaga ndivei kuuma gîkomberî gîkî, îkagani ûguo nîûndû wa kûndirikanaga.”

²⁶ Na ûguo nî kuga atî vîndî cionthe rîrîa mûrarîa mûgate ûcio na mûranyua ndivei kuuma gîkomberî kîu, mwîthagîrwa mûkîanîrîra gûkua kwa Mwathani nginya rîrîa agaacoka.

²⁷ Kwoguo mûndû wa wonthe ûrîcaga mwîrî wa Mwathani kana akanyuîra gîkomberî gîake na njîra îtarî mbagîrîru nîatuîkaga mwîvia kûrî mwîrî na nthakame ya Mwathani.

²⁸ Mûndû nîambage gwîtuîria ke mwene mbere ya kûrîa mûgate ûcio na kûnyuîra gîkomberî kîu.

²⁹ Nîûndû mûndû wa wonthe ûrîcaga mwîrî ûcio na akanyuîra gîkomberî kîu atakûmenya vata wa mwîrî wa Mwathani nîwîtucagîra ke mwene.

³⁰ Na kîu nîkîo gîtûmaga engî gatagatîrî kenyu methîrwe matarî na vinya na marî arwaru na amwe nî akuû.

³¹ Nwatî angîthîrwa nwa twambe gwîtuîria tue ene, Ngai ndangîtûtuîra.

³² Nwatî rîrîa Mwathani atûtuîra, nîatûverithagia nîguo mûthiiarî tûtigatuîrwe vamwe na nthî.

³³ Kwoguo ariû na aarî a îthe wetû, vîndî îrîa mûcemanîtie kûrîa Irio cia Mwathani cia Kîvwaî, etanagîrîrani.

³⁴ Mûndû wa wonthe mûvûtu, nîambage kûrîa mûciî, nîguo rîrîa tûcemanîtie vamwe Ngai ndagatûtuîre. Rîrîa ngaaûka kûrî mue nîngamwatha ûrîa mûgeeka maûndû mau mengî.