1Akor 10 - ÎVUKU RÎA ÛVORO MWARO

Akristiano nîmagîrîrwe matige kûvoya mîvuanano

¹ Ariû na aarî a îthe wetû nîrenda mûririkane maûndû marîa meekîkire kûrî methe metû ma tene arîa maarûmîrîre Musa. Onthe nîmaakunîkîrwe nî îtu na rîkîmagitîra na makîringa îria Îtune.

² Onthe nîmaavatithirue marî îtuurî na îriarî na magîtuîka arûmîrîri a Musa.

³ Onthe nîmaarîre irio cia kîîroho

⁴ na makînyua manjî ma kîîroho. Nîmaanyuire manjî maumîte îthigarî rîa kîîroho rîrîa rîamarûmîrîre. Narîo îthiga rîu rîarî Kristû ke mwene.

⁵ Nwatî wana vuva wa ûguo eengî gatagatîrî kao matiakenia Ngai na kwoguo nîmaakuîrîre werûrî.

⁶ Maûndû mau monthe meekîkire nîguo matuîke kîonereria kûrî tue gîa gûtûkaania atî tûtikeriragîrie maûndû macûku ta ûrîa mekire,

⁷ na tûtikavoyage mîvuanano ta ûrîa amwe meekire. Kwandîkîtwe mandîkorî matheru atîrî, “Andû nîmeekarire nthî, makîrîa na makînyua magîka ciîko cia ûmaramari.”

⁸ Nwa nginya tûtige kûvûûra ûmaraa wata ûrîa andû amwe gatagatîrî kao meekaga. Na nîûndû wa maûndû mau andû ngiri mîrongo îîrî na ithatû nîmaakwire îvinda rîa mûthenya ûmwe.

⁹ Tûtiagîrîrwe nî kûgeria Mwathani ta ûrîa amwe kuuma gatagatîrî kao meekire na makîûragwa nî njoka.

¹⁰ Tue tûtiagîrîrwe nî gûteta ta ûrîa andû amwe gatagatîrî kao meekire na makîthirua nî Mûraika wa Ngai aumîte îgûrû.

¹¹ Maûndû mama monthe meekîkire kûrî o nîguo matuîke kîonereria kûrî arîa engî. Namo maandîkirwe nîguo matuîke ûtaari kûrî tue arîa tûratûûra mavindarî mama ma mûthiia.

¹² Kwoguo mûndû wa wonthe ûreciria atî ke nîarûngamîte ekindîrîtie nîamenyerere ndakagwe.

¹³ Magerio marîa mûgeragua namo nwamo andû arîa engî mageragua namo. Ngai nîmwîvokeku na ndangîtîkîra ûgerue makîria ya vinya ûrîa ûrî naguo. Nwatî vîndî îrîa ûragerua ke agaakûvecaga vinya nîguo ûvotage kûmîrîria na kûûrîra magerio.

¹⁴ Kwoguo arata akwa arîa nie mendete tiganani na ûvoro wîgiî kûvoya mîvuanano.

¹⁵ Nie nîraria takwa nîrarîria andû agima. Kwoguo îîtuîreni mue ene ûrîa nîrenda kuga.

¹⁶ Gîkombe kîrîa tûtûmagîra vîndî îrîa tûrakûngûîra Irio cia Mwathani cia Kîvwaî nwa kîo tûtûmagîra vîndî îrîa tûracokia ngatho kûrî Ngai: vîndî îrîa tûranyuîra gîkomberî gîkî twîthagîrwa tûkînyunyanîra nthakame ya Kristû. Naguo mûgate ûrîa twenyûrangaga tûkîûrîa, twîthagîrwa tûkîrîcanîra mwîrî wa Kristû.

¹⁷ Wana ethîrwa tûrî eengî, tûrî mwîrî ûmwe nîûndû kûrî mûgate ûmwe na tuonthe nîtûrîcanagîra mûgate wa ûcio ûmwe.

¹⁸ Ta îcirieni ûvoro wîgiî andû a Isiraeli; na kinthî arîa marîcanagîra kîrîa kîrutîtwe kîgongoona matirîcanagîra metharî ya kûrutîra Ngai kîgongoona?

¹⁹ Nie nîrenda kuga atîa vi? Anga irio irîa irutîrîtwe mîvuanano nî cia vata? Anga mîvuanano nî ya vata?

²⁰ Naarî! Ûrîa nîrenda kuga nî atî andû arîa matetîkîtie marutaga magongoona mao kûrî ndaimono, nwatî tî kûrî Ngai. Na ndirenda mûtuîke a ngwatanîro na ndaimono.

²¹ Mue mûtingîvota kûnyuîra gîkomberî Kîam Mwathani na mûcoke mûnyuîre gîkomberî Kîam ndaimono; mûtingîvota kûrîîra metharî ya Mwathani na mûcoke mûrîîre metharî ya ndaimono.

²² Nîkwa tûrenda kûrakaria Mwathani kana nîkwa tûreciria atî tûrî na vinya kûmûkîra?

²³ “Tue nîtwîtîkîrîtue gwîka maûndû monthe,” ûguo nîguo o maugaga. Nwatî tî maûndû monthe maro. “Tue nîtwîtîkîrîtue gwîka maûndû monthe,” nwatî tî maûndû monthe matethagia andû arîa metîkîtie kûgîa na vinya.

²⁴ Mûndû wa wonthe gatagatîrî kenyu ndagîrîrwe nî kwîthagîrwa agîcaria ûrîa angîîguna ke mwene, nwatî agîrîrwe nî kwîthîrwa agîcaria ûrîa angîguna andû arîa engî.

²⁵ Mue nîmwîtîkîrîtue kûrîcaga nyama wa yonthe îrîa îthagîrwa îkîendua thokorî na mûtikaûrie kîûria wanarî kîmwe kiumanîte na thamiri cienyu.

²⁶ Nîûndû nîkwandîkîtwe mandîkorî matheru atîrî, “Nthî na indo cionthe irîa irî kuo nî cia Mwathani.”

²⁷ Ethîrwa mue nwa mwîtîrwe irio nî mûndû ûtetîkîtie na mwîtîkîre kûthiî kûrîcanîra nake, rîcagani wa kîrîa kîonthe mûngîvewa mûtakwamba kwîyûria ciûria ciumanîte na thamiri cienyu.

²⁸ Nwatî mûngîrwa nî mûndû atîrî, “Irio ino irutîrîtwe mîvuanano,” mue mûtikairîe. Nîrauga ûguo nîûndû wa mûndû ûrîa ûngîmwîra ûguo na nîûndû wa thamiri cienyu.

²⁹ Ngîaria ûvoro wîgiî thamiri, ndiraria ûvoro wîgiî thamiri cienyu, nwatî nîraria ûvoro wîgiî thamiri ya mûndû ûcio. Nwatî mue nwa mwîyûrie atîrî, “Wîyathi wa gwîka ûrîa nîngîenda nî wagîrîrwe nî gûtongorua nî thamiri ya mûndû wîngî?

³⁰ Ethîrwa nie nînjokagia ngatho kûrî Ngai nîûndû wa kîrîa ndîcaga, nîndûî gîtûmaga mbîguîrwe naaî nî mûndû?”

³¹ Kwoguo ûndû wa wonthe mwîkaga ethîrwa nî kûrîa kana nî kûnyua, îkagani nîguo mûgoocithie Ngai.

³² Tûûrani na njîra îtangîtûma kûgîa na thîna kûrî Ayahudi kana Angiriki kana kanitha wa Ngai.

³³ Îkagani wata ûrîa nie mbîkaga. Nîngeragia gûkenia andû onthe maûndûrî monthe marîa mbîkaga. Ngîka ûguo, ndiîthagîrwa ngîcaria ûrîa nîngîîguna nie mwene, nwatî mbîthagîrwa ngîcaria ûrîa nîngîguna andû onthe nîguo mavote kûvonoka.