1Akor 1 - ÎVUKU RÎA ÛVORO MWARO

¹ Nie Paûlo, ûrîa wetirwe atuîke mûtûmwa wa Jesû Kristû na njîra ya wendi wa Ngai tûrî na Sosithene mûrû wa îthe wetû,

² nîtwamwandîkîra maarûa mue kanitha wa Ngai ûrîa ûrî îtûûrarî rîa Korinitho na kûrî arîa onthe metîtwe matuîke andû a Ngai arîa matuîkîte ake marî na ûrûmwe na Jesû Kristû. Mue mwîtîtwe mûtuîke andû a Ngai mûrî vamwe na andû onthe arîa marî kûndû kuonthe na magoocaga Mwathani wetû Jesû Kristû ûrîa arîke Mwathani wao na wetû:

³ Mûrogîa na wega na thayû kuuma kûrî Ngai îthe wetû na Mwathani Jesû Kristû.

Irathimo kuuma kûrî Ngai na njîra ya Kristû

⁴ Vîndî cionthe nînjokagia ngatho kûrî Ngai wakwa nîûndû wenyu, nîûndû wa wega wa Ngai ûrîa ke amûvete na njîra ya Jesû Kristû.

⁵ Nîûndû mue mûrî ûrûmwe na Kristû nîmûtongetue na njîra cionthe, mîariorî yonthe na ûmenyorî wonthe.

⁶ Wana nginya ndûmîrîri îgiî Kristû nîgîte na mîri gatagatîrî kenyu.

⁷ Kwoguo mue nîmwamûkîrîte iveo cia mîthemba yonthe irîa Roho wa Ngai avecanaga wa mwetererete mûthenya wa kûguûrua kwa Mwathani wetû Jesû Kristû.

⁸ Nîakûmwiga amûmenyererete nginya mûthiia nîguo mûtikethîrwe mûrî na ûcuke mûthenya ûcio wa Mwathani wetû Jesû Kristû.

⁹ Ngai nî mwîvokeku. Ke nîke wamwîtire nîguo mûgîe na ngwatanîro na Mûrû wake Jesû Kristû Mwathani wetû.

Nyamûkano kanitharî

¹⁰ Ariû na aarî a îthe wetû, na rîîtwa rîa Mwathani wetû Jesû Kristû nîramûthaitha muonthe mwîtîkanagie nîguo gûtikagîcage na nyamûkano gatagatîrî kenyu. Îthagîrwani mûgwatanîrîte viû na mûrî na rîciria na îtua rîmwe.

¹¹ Ariû na aarî a îthe wetû, andû amwe a kuuma mûciî wa Kiloe nîmambîrîte cararûkû atî kûrî na ngarari gatagatîrî kenyu.

¹² Ûrîa nîrauga nî atî: wa mûndû gatagatîrî kenyu augaga atîrî, “Nie nûmagîrîra Paûlo,” wîngî akauga, “Nie nûmagîrîra Apolo,” wîngî akauga, “Nie nûmagîrîra Petero”; na wîngî akauga, “Nie nûmagîrîra Kristû.”

¹³ Anga Kristû nî agaûkanîtue? Paûlo nîke wambirwe mûtharavarî nîûndû wenyu? Mue mwavatithirue na rîîtwa rîa Paûlo?

¹⁴ Nie nîracokia ngatho kûrî Ngai nîûndû ndiavatithia mûndû wana ûmwe gatagatîrî kenyu tiga Kirisipo na Gayo.

¹⁵ Kwoguo gûtirî mûndû wana ûmwe gatagatîrî kenyu ûngiuga atî mue mwavatithirue na rîîtwa rîakwa.

¹⁶ (Îni, nie nînavatithirie Sitefana na andû a gwake mûciî. Nwatî ndiraririkana kana nînavatithirie mûndû wîngî wana ûmwe.)

¹⁷ Kristû ndaandûma nîguo mvatithanie. Nwatî aandûmire nîguo ngavunjie Ûvoro Mwaro. Aandûmire ngavunjie ûvoro ûcio ndagûtûmîra ûûgî ûrîa umanîte na ûûmûndû. Nekire ûguo nîguo gûkua gwa Kristû mûtharavarî gûtigaatuîke kwa mana.

Kristû nîke vinya na ûûgî wa Ngai

¹⁸ Nîûndû Ndûmîrîri îrîa îgiî gûkua gwa Kristû mûtharavarî nî ûrimû kûrî arîa maraûra, nwatî kûrî tue arîa tûravonokua ndûmîrîri îo nîyo vinya wa Ngai.

¹⁹ Mandîko matheru maugîte atîrî: “Nie nîngaacûkangia ûûgî wa andû arîa aûgî, na njûkangie wara wa andû arîa ara.”

²⁰ Kwoguo tûngiuga atîa îgûrû rîgiî andû arîa aûgî? Tûngiuga atîa îgûrû rîgiî arimû a watho? Na tûngiuga atîa îgûrû rîa andû arîa marî wara mwîngî wa kwarîrîria maûndû? Ngai nîwonanîtie atî ûûgî wa gûkû nthî wîthagîrwa ûrî ûrimû.

²¹ Kûringana na ûûgî wake, Ngai nîwatûmire andû matikaamûmenye na njîra ya ûûgî wao. Vandû va ûguo, na njîra ya ndûmîrîri îo îtucagwa ya “ûrimû” îrîa tue tûvunjagia, Ngai nîwatuire atî nîakaavonokia arîa mamwîtîkîtie.

²² Ayahudi mendaga maringîrwe ciama nao Angiriki macaragia ûûgî.

²³ Nwatî tue tûvunjagia ûvoro wîgiî Kristû ûrîa mwambe. Ayahudi monaga ûvoro ûcio ûrî mûvînga, nao andû a Ndûrîrî makawona ûrî ûrimû.

²⁴ Nwatî kûrî arîa Ngai etîte, Ayahudi na andû a Ndûrîrî, ndûmîrîri ya Kristû nî vinya na ûûgî wa Ngai.

²⁵ Nîûndû ûndû ûrîa wonekaga takwa ûrî ûrimû wa Ngai, wîthagîrwa ûrî na ûûgî mwîngî gûkîra ûûgî wa mûndû. Naguo ûndû ûrîa ûtûmaga Ngai onekane takwa atarî na vinya, ûndû ûcio wîthagîrwa ûrî na vinya îkîrîte vinya ya mûndû.

²⁶ Ariû na aarî a îthe wetû, taririkanani ûrîa mwekariî rîrîa Ngai aamwîtire. Kûringana na woni wa andû, tî eengî gatagatîrî kenyu maarî aûgî kana maarî na vinya wana kana maaciarîrwe mîciîrî ya vata.

²⁷ Nwatî Ngai nîwathuurire maûndû marîa andû matucaga nî ma ûrimû nîguo aconorithie arîa aûgî, na nîwathuurire arîa matucagwa nî andû atî matirî vinya nîguo aconorithie arîa methagîrwa marî na vinya.

²⁸ Ngai nîwathuurire maûndû marîa andû monaga matarî vata na makamanyarara na meciragîrua atî tî kîndû varî nîguo acûkangie kîrîa gîtucagwa nî andû atî nî Kîam vata.

²⁹ Ngai eekire ûguo nîguo gûtikagîe na mûndû wana ûmwe ûgwîtîîa arî mbere ya Ngai.

³⁰ Nwatî Ngai nîke kiumo Kîam ûûrûmwe wenyu na Jesû Kristû. Na njîra ya Kristû Ngai nîatûvecaga ûûgî na agatûtua athingu. Natue nîtûtuîkaga andû a Ngai na tûgakûrwa kuuma meviarî metû.

³¹ Kwoguo wata ûrîa mandîko matheru maugîte: “Mûndû wa wonthe ûngîenda gwîtîîa nîetîîe na maûndû marîa Mwathani ekîte.”