Yowano 9 - Kulimama Kwakupya

Yeshu ukunyongomanisha muntu wahemuwile hinga enga kashishitwa

¹ Oho Yeshu apitilenga, wamonene muntu wengile kashishitwa kufuma kukuhemuwa kwendi.

² Bandongesha bendi bamwipwile ngayi, “Mulongeshi, kati yani watendele wubi? Ou muntu ndi bahemi bendi ngayi ahemuwe hinga enga kashishitwa?”

³ Yeshu wakumbwile ngayi, “Ou muntu kaliha watendele wubi hinge bahemi bendi, ngoboni wahemuwile hinga enga kashishitwa ngayi Nyambi amoneshe milimo yendi mumwendi.

⁴ Tukufwanina kutenda mulimo wa uya wantumine oho kushili mwaana. Ndaba wushiku ukwiza, pe kowa muntu ukatwesha kutenda milimo.

⁵ Oho nishili mu kaye, ami lumuni lwa kaye.”

⁶ Munyima yakwamba ebye, Yeshu wafwizilile hanci, washokotele limvu na mate, niho alambile ndoba ha meho a kashishitwa.

⁷ Wambile kukwendi ngayi, “Yanga ukayowele mu Liziba lya Shilome.” (Likunungulula ngayi, “Kutumiwa”). Nohobene uya muntu wayile, wayowelele, pe wabokele hamona.

⁸ Bandambo na baya bamumonenenga hanyepa, bambile ngayi, “Kati kaliha niye ou wekalilenga na kunyepa ndi?”

⁹ Bamo bambile ngayi, “Niye bene.” Ngoboni bamina bambile ngayi, “Byo, walifweka nendi tuhu.” Ngoboni niye wambile ngayi, “Ami bene.”

¹⁰ Ngoboni bambile kukwendi ngayi, “Haya meho wobe anatono nahiti?”

¹¹ Wakumbwile ngayi, “Muntu ukutumbiwa ngayi Yeshu, washokota limvu, pe niho alamba ha meho wami, niho amba kukwami ngayi, ‘Yanga ku Liziba lya Shilome ukayowele.’ Niho naya na kuyowela, oho namanisha kuyowela, niho natatika kumona.”

¹² Niho bamwipwile ngayi, “Haya niye uli kuti?” Wakumbwile ngayi, “Kulimuka nifwako.”

Bafwalishi bakwipwiziza bya kunyongomana kwa uya muntu

¹³ Niho bantu batwalile uya muntu wahemuwile hinga enga kashishitwa ku Bafwalishi.

¹⁴ Wengile Mutena Wakukatala oho Yeshu ashokotele limvu na kutonesha meho a uya muntu.

¹⁵ Niho kami Bafwalishi bamwipwile ngayi kati anatweshe kumona nahiti? Wambile ngayi, “Wayaka ndoba ha meho wami, niho nayowela ku meho, haya nilinakumona.”

¹⁶ Nohobene, Bafwalishi bamo bambile ngayi, “Ou muntu kaliha muka Nyambi ndaba kulama Mutena Wakukatala wufwako.” Ngoboni bamina bambile ngayi, “Mukawubi ukutwesha nahiti kutenda ebye bilimukisho?” Balitapile mukati kabo.

¹⁷ Bafwalishi bepwile uya muntu ngayi, “Haya obe ukwamba bishini ha nou muntu natoneshe meho wobe?” Wakumbwile ngayi, “Niye muluwe.”

¹⁸ Ngoboni Bayunda babulile kukulupila ngayi wengile kashishitwa haya ulinakumona. Niho behanine bahemi bendi,

¹⁹ pe babepwile ngayi, “Kati ou mwanenu ndi? Pe mukwamba ngayi wahemuwile hinga enga kashishitwa ndi? Haya ulinakumona nahiti?”

²⁰ Bahemi bendi bakumbwile ngayi, “Tukulimuka ngayi niye mwanetu, kami tukulimuka ngayi wahemuwile hinga enga kashishitwa.

²¹ Ngoboni kulimuka tufwako ngayi ulinakumona nahiti, kami ou natoneshe meho wendi kumulimuka tufwako. Mwipulenu wakulakale, ukulyambila niye mwine!”

²² Bahemi bendi bambile awa mazu ndaba batinine Bayunda. Bayunda baliyuvwashanine ngayi muntu nimwendi ukamba ngayi Yeshu niye Kilishitu, ukafumishiwa mu shinangonge.

²³ Niho bahemi bendi bambile ngayi, “Mwipulenu, wakulakale!”

²⁴ Niho behanine ka wubili uya muntu wengile kashishitwa, bambile kukwendi ngayi, “Kulupisha Nyambi ngayi ebye ukwamba byakupwisha. Tukulimuka ngayi uya muntu wakunyongomanisha wenga mukawubi.”

²⁵ Niye wakumbwile ngayi, “Ndi niye wenga mukawubi, ami kulimuka nifwako. Shuma shimo nikulimuka ngayi nengile kashishitwa, ngoboni hano nilinakumona.”

²⁶ Niho bambile kukwendi kami ngayi, “Unatende bishini kukwobe? Unatoneshe meho wobe nahiti?”

²⁷ Wabakumbwile ngayi, “Namitongweza mwaka, ngoboni kuyuvwishisha mufwako. Ndabangani mukushinga kuyuvwa kami? Nenu mukushinga kwinga bandongesha bendi ndi?”

²⁸ Niho bamukalihilile ngayi, “Obe ndongesha yendi, ngoboni etu tuli bandongesha ba Moshesha.

²⁹ Tukulimuka ngayi Nyambi wambile kuli Moshesha. Ngoboni ou muntu, kulimuka oku akufuma tufwako!”

³⁰ Uya muntu wakumbwile ngayi, “Eshe shuma shakukomokesha! Enu kulimuka uya muntu oku akufuma mufwako, ngoboni niye unatoneshe meho wami.

³¹ Tukulimuka ngayi Nyambi kuyuvwa bakawubi wufwako. Ngoboni Nyambi wayuvwanga mukakumulemesha, uya ukutenda shamutima wendi.

³² Kufuma ku kutatika kwa kaye, shilolo kuyuvwanike muntu watoneshele meho a muntu wamina wahemuwile hinga enga kashishitwa.

³³ Shinga ou muntu kaliha wafumine kuli Nyambi, shinga kutwesha kutenda shuma shimo wufwako.”

³⁴ Bamukumbwile ngayi, “Obe wahemuwile na kukulila mu wubi, kati ukutwesha kutulongesha ndi?” Niho bamufumishile mu shinangonge.

Wushishitwa wamu moyo

³⁵ Yeshu wayuvwile ngayi Bayunda banafumishi uya muntu mu shinangonge, oho amuwanine, wambile kukwendi ngayi, “Ukukulupila muli Mwana Muntu ndi?”

³⁶ Niye wakumbwile ngayi, “Obe hekulu, niye yani? Ntongweze mwanga nikulupile mumwendi.”

³⁷ Yeshu wambile ngayi, “Wamumonakale, kami niye ou ulinakwamba nobe.”

³⁸ Uya muntu washinkamine, pe wambile ngayi, “Mwene, ninakulupili!”

³⁹ Yeshu wambile ngayi, “Ninezi na kuyata kano kaye, ngayi baya bakubula kumona, bamone. Mwanga baya bakumona bafutuke tushishitwa.”

⁴⁰ Bafwalishi bamo baya bekalile hahepi nendi, bayuvwile awa mazu, pe bamwipwile ngayi, “Kati nanetu kami tuli tushishitwa ndi?”

⁴¹ Yeshu wambile ngayi, “Shinga muli tushishitwa, shinga mulandu wa wubi mufwawo, ngoboni ndaba mukwamba ngayi, ‘Hitumona,’ nohobene wubi wenu mushili nawo.”