Yowano 3 - Kulimama Kwakupya

Yeshu na Nikondema

¹ Kwekalile mulume umo wa bakulwane ba Bayunda, lizina lyendi Nikondema, ou wengile wa kazunga ka Bafwalishi.

² Wayile kuli Yeshu wushiku, pe wakambile ngayi, “Labi, tukulimuka ngayi uli mulongeshi wakufuma kuli Nyambi, ndaba kowa muntu ukutwesha kutenda bilimukisho ebye ukutenda ndele Nyambi ekale nendi hamo.”

³ Yeshu wamukumbwile ngayi, “Mwashikuma nikwamba kukwobe ngayi, kowa muntu ukutwesha kumona Wene wa Nyambi ndele ahemuwe kaubili.”

⁴ Nikondema wamwipwile ngayi, “Kati muntu ukutwesha nahiti kuhemuwa kabili ndi niye wakulakale? Kati ukutwesha kwingina ka wubili mu livumo lya mandiyendi ngayi ahemuwe kami ndi?”

⁵ Yeshu wakumbwile ngayi, “Mwashikuma nikwamba kukwobe ngayi, ndele muntu ahemuwe ku mema na Moyo, kutwesha kwingina mu Wene wa Nyambi wufwako.

⁶ Eshe shikuhemuwa ku wuntu shenga wuntu, kami eshe shikuhemuwa ku Moyo shenga Moyo.

⁷ Hinga ukomoka oho namba kukwobe ngayi, ‘Mukufwanina kuhemuwa kabili.’

⁸ Mpepo yikupepokela oku yikushinga, kami ukuyuvwa mungunina wayo, ngoboni kutwesha kulimuka oku yikufuma noku yikuya wufwako. Pe nisho shili ku muntu nimwendi ukuhemuwa ku Moyo.”

⁹ Nikondema wamwipwile ngayi, “Kati eshe shikenga nahiti?”

¹⁰ Yeshu wamukumbwile ngayi, “Nka obe uli mulongeshi wamunene wa Ishalela, kati kami kulimuka eshe wufwako ndi?

¹¹ Mwashikuma nikwamba kukwobe ngayi, tukwamba ebye tukulimuka na kupaka ebye tunamono, ngoboni enu kutambula wupaki wetu mufwako.

¹² Ndi kukulupila oho nikukutongweza byuma bya hano hanci wufwako, pe ukakulupila nahiti oho nikakutongweza byuma bya muyilu?

¹³ Kowa muntu waya kuyilu, ndele niye wafumine kuyilu, niye Mwana Muntu.

¹⁴ Nehi Moshesha apatikile liyoka lya kutendiwa ha lubemba mu libelelengwa, nahiyo Mwana Muntu ukufwanina kupatikiwa,

¹⁵ ngayi muntu nimwendi ukukulupila mumwendi ekale na wumi wa mwayile myaka.”

¹⁶ Ndaba Nyambi wahakile bakakaye shikuma niho apanikile Mwanendi umo pele ngayi nimwendi ou ukukulupila mumwendi kukanonga wufwako, ngoboni ekale na wumi wa mwayile myaka.

¹⁷ Ndaba Nyambi watumine mwanendi mu kaye kaliha mukuyata bakakaye, ngoboni ngayi abapulwishe mumwendi.

¹⁸ Nimwendi ukukulupila muli Mwana, kuyatiwa wufwako, ngoboni ou ukubula kukulupila, wayatiwakale, ndaba unabulu kukulupila mu lizina lya Mwana Nyambi umo pele.

¹⁹ Oku nikwo kuyata, ngayi lumuni lunezi mu kaye, ngoboni bantu bahakile mincimpwe kupitakana lumuni, ndaba milimo yabo yengile yayibi.

²⁰ Nimwendi mukakutenda wubi wazimba lumuni, kami kwiza ku lumuni wufwako, kutina milimo yendi yikumoneka.

²¹ Ngoboni nimwendi ukutenda byakupwisha ukwiza ku lumuni, ngayi milimo yendi ya kwombatala Nyambi yimoneke.

Yeshu na Yowano

²² Munyima yanebye, Yeshu na bandongesha bendi bayile ku litunga lya Yundeya, wekalile hamo nabo kuyo na kuzubilisha.

²³ Na Yowano kami wazubilishilenga mu Anoni hahepi na Shalimi, ndaba kwekalile mema amengi. Bantu bezilenga na kuzubilishiwa.

²⁴ Eshe shatendiwile oho Yowano shilolo ayakiwe mu tolongo.

²⁵ Niho kwekalile nkani mukati ka bandongesha ba Yowano na Kayunda ha biheka bya kuyowela.

²⁶ Bezile kuli Yowano, pe bambile kukwendi ngayi, “Mulongeshi, uya muntu wekalile nendi munciza ya Yondana, ou obe wapakile, ulinakuzubilisha, kami bantu nimwabo balinakuya kukwendi!”

²⁷ Yowano wakumbwile ngayi, “Kowa muntu ukutwesha kutambula shuma ndele apanikiwesho kuyilu.

²⁸ Enu muli bapaki bami ngonehe nambile ngayi, ‘Ami kaliha nili Kilishitu, ngoboni ami natumiwile kumbili yendi.’

²⁹ Mukakuyeka niye mwine mwenga. Ngoboni muhoni wa mukakuyeka ukwimana na kuyuvwilila, ukuwahilila shikuma oho akuyuvwa lizu lya mukakuyeka. Nohobene oku nikwo kuwahilila kwami kwakunene.

³⁰ Nohobene niye nafwanini kutumbalala, ngoboni ami nikufwanina kushepa.”

Ou ukufuma kuyilu

³¹ Ou ukufuma kuyilu, unapitakana nimwabo. Ou ukufuma hanci, wenga wa hanci, kami ukwamba bya hanci. Ngoboni ou ukufumu kuyilu uli hayilu ya nimwabo.

³² Ukupaka ebye anamono na kuyuvwa, ngoboni kowa muntu ukutambula wupaki wendi.

³³ Muntu ukutambula wupaki wendi ukupaka ngayi Nyambi wakupwisha.

³⁴ Ou anatumu Nyambi ukwamba mazu a Nyambi, ndaba Nyambi ukumupanika Moyo wendi wakwinzala.

³⁵ Tate ukuhaka Mwanendi, kami unapana byuma nimwabyo mu maboko wendi.

³⁶ Nimwendi ukukulupila muli Mwana uli na wumi wa mwayile myaka, ngoboni nimwendi ukubula kukulupila muli Mwana, kukamona wumi wufwako, ndaba wukali wa Nyambi uli hahendi.”