Yowano 19 - Kulimama Kwakupya

¹ Niho Pilato abatongwezele ngayi bashimbe Yeshu, pe bamuzipule.

² Banzita batendele munana wa mihongela, pe bamuyakile ku mutwe. Bamuvwalikile shivwalo sha wuhombo,

³ bezilenga kukwendi bamba ngayi, “Wuyoye myaka yayingi obe Mwene wa Bayunda!” Pe bamukamine zimbanda.

⁴ Pilato watutikile kami, pe wambile kukwabo ngayi, “Monenu, nikamututwishila hamunkanda kukwenu, kami mulimuke ngayi nabulu kuwana mulandu mumwendi.”

⁵ Niho Yeshu atutikile hinga avwala munana wa mihongela na shivwalo sha wuhombo. Pilato wambile kukwabo ngayi, “Monenu! Muntu owe!”

⁶ Oho bakankombela ba bakulwane na babilolo bamumonene babilikizile ngayi, “Mukoleke! Mukoleke!” Pilato wambile kukwabo ngayi, “Mushimbenu enu bamwine mukamukoleke. Ndaba nabulu kuwana mulandu mumwendi.”

⁷ Bayunda bamukumbwile ngayi, “Twekala na ndayano, kuya naneze ndayano unafwanini kufwa, ndaba walitoyele niye mwine ngayi Mwana Nyambi.”

⁸ Nohobene oho Pilato ayuvwile awa mazu watinine shikuma.

⁹ Wenginine kami mu lukena, wepwile Yeshu ngayi, “Kati wafuma kuti?” Ngoboni Yeshu kaliha wamukumbwile.

¹⁰ Nohobene Pilato wambile kukwendi ngayi, “Kati kwamba kukwami wufwako ndi? Kulimuka ngayi ami nili na ngovu za kukushobola hinge ngovu za kukukoleka wufwako ndi?”

¹¹ Yeshu wakumbwile ngayi, “Kutwesha kwikala na ngovu hahami wufwako ndele zipanikiwe kukwobe kuyilu nohobene ou nampaniki kukwobe uli na wubi waunene.”

¹² Oho Pilato ayuvwile ebye washingile nzila ya kushobola Yeshu. Ngoboni Bayunda babilikizile ngayi, “Ndi ukushobola ou muntu, pe kaliha uli muhoni wa Nkeshali. Ou nimwendi ukulitoya niye mwine ngayi mwene, ukulwisha Nkeshali!”

¹³ Oho Pilato ayuvwile awa mazu, watutwishile Yeshu hamunkanda, pe wekalile ha shipona sha kuyatishila mu mwanya ukutumbiwa ngayi “Mbanza ya Mamanya.” (Mu Shihebelu ngayi, “Ngabata.”)

¹⁴ Wengile mutena wa kuliwahishila Shimbo sha Kupitilila, oho mutena wahenyenene ku shikati sha wulikumi na bibili, Pilato wambile ku Bayunda ngayi, “Mwene yenu uno!”

¹⁵ Ngoboni babilikizile ngayi, “Muzihe! Muzihe! Mukoleke!” Pilato wabepwile ngayi, “Kati nikoleke mwene yenu ndi?” Bakankombela ba bakulwane bakumbwile ngayi, “Mwene tufwaye ndele tuhu Nkeshali!”

¹⁶ Niho Pilato abapanikile Yeshu ngayi bakamukoleke. Niho bashimbile Yeshu.

Yeshu ukukolekiwa

¹⁷ Yeshu watutikile, pe washimbile shishempakano shendi, bayile nendi ku mwanya watumbiwile ngayi “Mwanya wa Kangawe.” (Owe ukutumbiwa mu Shihebelu ngayi “Ngolongota.”)

¹⁸ Kuyo niko bakamukolekele. Bakolekele hamo nendi bantu babili umo ku liboko lya shilyo, wamina ku liboko lya shimoho.

¹⁹ Pilato watikitile mazu a shilimukisho, pe wawayakile ha shishempakano, alabiwile ngayi, “Yeshu wa ku Nazaleta, Mwene wa Bayunda.”

²⁰ Bayunda babengi balabile awa mazu, ndaba haya bakolekele Yeshu hengile hahepi na lukena. Mazu awa atikitiwile mu Shihebelu na Shingiliki na Shilatini.

²¹ Niho bakankombela ba bakulwane bambile kuli Pilato ngayi, “Hinga utikita ngayi, ‘Mwene wa Bayunda,’ ngoboni utikite ngayi, ‘Ou muntu wambile ngayi, Ami Mwene wa Bayunda.’ ”

²² Pilato wakumbwile ngayi, “Ebye natikiti, natikiti.”

²³ Oho banzita bamanishile kukoleka Yeshu, bashimbile bivwalo byendi babitapile mishiinzi inaa, mushiinzi umo ku mukanzita na mukanzita. Bashimbile kami mukanjo wendi, watungiwile ha likwiza limo kufuma kuyilu kukuma na kunceto kaliha wekalile na mingundo.

²⁴ Niho balyambashanine mukati kabo ngayi, “Hinga tuwutabula, ngoboni tutende nyela tumone ndi ukenga wayani.” Ebye byatendiwile ngayi byatikitiwa binge byakupwisha ngayi, “Balitapilile bivwalo byami mukati kabo, pe mukanjo wami baukuninine nyela.” Ebye nibyo batendele bakanzita.

²⁵ Hahepi na shishempakano sha Yeshu kwemanine mandiyendi na mukonzo wa mandiyendi na Maliya mukokwa Kilopashi na Maliya wa ku Mangandalena.

²⁶ Oho Yeshu amonene mandiyendi na ndongesha ou ahakile shikuma hinga bemana hahepi, wambile kuli mandiyendi ngayi, “Mawa, mwanobe owo.”

²⁷ Niho Yeshu ambile ku ndongesha ngayi, “Mandiyobe owo.” Kufuma ku shikati shiyo uyo ndongesha wamutwalile ku litala lyendi.

Lufu lwa Yeshu

²⁸ Ha shikati eshe, Yeshu walimukile ngayi byuma nimwabyo binamana, ngayi byatikitiwa binge byakupwisha, pe wambile ngayi, “Nili na linyontwa.”

²⁹ Kwekalile lulonga lwenzalile na waine yayishashu. Bazubikile shiponci mu waine, bashihomekele ku lutende lwa hishopa, pe bamuyakile ku kanwa.

³⁰ Oho Yeshu anwine waine yayishashu, wambile ngayi, “Kunamana!” Niho azebwile mutwe wendi, pe wafwile.

Yeshu ukuyahiwa ku lupati

³¹ Niho Bayunda banyepele Pilato ngayi abetabilishe kupokola mawulu a bayo bantu bakolekiwile na kufumisha mituntu ha bishempakano. Banyepele ebye ndaba wengile Mutena Wakuliwahishila, kami kaliha bashingile ngayi mituntu yikale ha bishempakano ha Mutena Wakukatala, ndaba uyo Mutena Wakukatala wengile waunene.

³² Bakanzita bayile na kupokola mawulu a muntu wa kutatika na wamina wa wubili, bayo bakolekiwile na Yeshu.

³³ Ngoboni oho bakumine kuli Yeshu, bamonene ngayi wafwakale, pe kaliha bapokwele mawulu wendi.

³⁴ Nohobene kanzita umo wayahile mulinga ku lupati lwa Yeshu, hohobene kwafumine mukeza na mema.

³⁵ Muntu wamoneneko wunapana wupaki, kami wupaki wendi wakupwisha. Ukulimuka ngayi ebye akwamba byakupwisha, ngayi nanenu mukulupile.

³⁶ Ndaba byuma ebye byatendiwile ngayi byatikitiwa binge byakupwisha ngayi, “Kowa shifupa shendi hinge shimo shikapokoka.”

³⁷ Kami kuli byamina byatikitiwa bikwamba ngayi, “Bantu bakatilamina kuli uya bayahile.”

Kufundiwa kwa Yeshu.

³⁸ Munyima yanebye, Yoshefwa wa ku Alamatiya ou wengile ndongesha wa Yeshu, ngoboni wengile wa kuwi ndaba ya kutina Bayunda. Wayile na kunyepa kuli Pilato ngayi akashimbe mutuntu wa Yeshu. Pilato wetabilile. Niho ayile, wakashimbile mutuntu wa Yeshu.

³⁹ Nikondema uya wezile ha kutatika kuli Yeshu wushiku, wayile hamo na Yoshefwa. Nikondema washimbile mila na aloshi wanga wa livumba lyaliwahe wakukuma ku makilo makumi ahatu.

⁴⁰ Niho bashimbile mutuntu wa Yeshu, bawuzengelele mu likwiza hamo na wanga wa livumba lyaliwahe, ngo mwaila shiheka sha Bayunda shakufunda.

⁴¹ Ha mwanya uya bakolekele Yeshu, kwekalile mfuba, muya mu mfuba mwekalile shinzimbi shashipya muya mwatanga kufundiwa muntu.

⁴² Ndaba wengile Mutena Wakuliwahishila wa Bayunda, kami ndaba shinzimbi shekalile hahepi, pe balangikilemo Yeshu.