Yowano 16 - Kulimama Kwakupya

¹ “Ninamba byuma ebye nimwabyo kukwenu ngayi mubule kupukazala.

² Bakamifumisha mu mashinangonge. Mwashikuma shikati shikeza oho nimwendi ukamiziha ukahanganika ngayi ukutenda milimo ya Nyambi.

³ Bakatenda ebye kukwenu, ndaba kulimuka Tate hinge ami bafwako.

⁴ Ngoboni ninamba ebye kukwenu, ngayi oho shikati shakakuma ku nibo hakutenda byuma ebye, mukanuka ngayi namitongwezelebyo. “Ha kutatika kaliha nambile ebye kukwenu, ndaba nekalile nenu.

Mulimo wa Moyo Wakuyela

⁵ Ngoboni wuluno nikaya kuli uya wantumine, haya kowa muntu kukwenu ukunyipula ngayi, ‘Ukuya kuti?’

⁶ Ngoboni ndaba namba ebye kukwenu, mitima yenu yinenzala na winga.

⁷ Nohobene nikumitongweza kupwisha ngayi, shashiwahe kukwenu ngayi niye, ndaba ndi kuya nifwako, Mukakubela kukeza kukwenu wufwako, ngoboni ndi nikaya, nikamutuma kukwenu.

⁸ Niye oho akeza, ukamonesha ku bakakaye ngayi bali na mulandu ndaba ya wubi na byakwoloka na bya kuyata.

⁹ Bali na mulandu wa wubi, ndaba nibo kukulupila mumwami bafwako.

¹⁰ Bali na mulandu ha byakwoloka, ndaba nikuya kuli Tate, pe kukamona kami mufwako.

¹¹ Bali na mulandu ha bya kuyata, ndaba mwene wa kano kaye unayatiwi mwaka.

¹² “Nili na mazu amengi akwamba kukwenu, ngoboni kutwesha kuwayuvwishisha ha shikati shino mufwako.

¹³ Oho Moyo wakupwisha akeza, ukamitwaminina mukupwisha nimwako. Kukamba byendi niye mwine wufwako, ngoboni nimwasho akayuvwa, nisho akamba, kami ukamitongweza byuma bikeza.

¹⁴ Ukampana wuwahe, ndaba ukamitongweza ebye akashimba kukwami.

¹⁵ Byuma nimwabyo bya Tate byenga byami, niho ninamba ngayi Moyo ukamitongweza ebye akashimba kukwami, pe ukabyamba kukwenu.

Winga na kuwahilila

¹⁶ “Shikati shashishe kukamona mufwako, kami munyima ya shikati shashishe mukamona.”

¹⁷ Bandongesha bendi bamo balyambishanine umo na wamina ngayi, “Ebye bikutontolola bishini? Akututongweza ngayi shikati shashishe kukamumona tufwako, kami munyima ya shikati shashishe tukamumona. Kami namba ngayi, ‘Ndaba nikaya kuli Tate.’

¹⁸ Kati ‘shikati shashishe’ shikutontolola bishini? Kulimuka ebye akwamba tufwako!”

¹⁹ Yeshu walimukile ngayi bakushinga kumwipula, pe wambile kukwabo ngayi, “Ninamba ngayi, ‘Shikati shashishe kukamona mufwako, kami munyima ya shikati shashishe mukamona.’ Kati eshe nisho mukuliyipula mukati kenu ndi?

²⁰ Mwashikuma nikwamba kukwenu ngayi, enu mukalila na kutuwa mbingo, ngoboni bakakaye bakawahilila. Mukekala na winga, ngoboni winga wenu ukafutuka kuwahilila.

²¹ Mbuyama oho uli hahepi na kubeleka, wekalanga na shikeku ndaba shikati shendi sha makando shinakumu. Ngoboni oho wabelekakale mwana, kaliha wanukanga aya makando, ndaba wawahililanga ngayi mwana unahemuwu mu kaye.

²² Nohobene, enu wuluno muli na winga ngoboni nikamimona kami, pe mitima yenu ikawahilila, kami kowa muntu ukatwesha kufumisha kuya kuwahilila mumwenu.

²³ “Ha mutena uyo, enu kukalomba shuma kukwami mufwako. Mwashikuma nikwamba kukwenu ngayi, shuma nimwasho mukalomba kuli Tate mu lizina lyami, ukamipanikasho.

²⁴ Hinga mwatanga shilolo mulombe shuma mu lizina lyami, lombelenu, pe mukatambula ngayi mwanga muwahilile shikuma.

Yeshu ukukoma kaye

²⁵ “Ninamba ebye kukwenu mu zinguli. Shikati shikeza oho nikabula kwamba kukwenu mu zinguli, ngoboni nikamitongweza bya Tate shintwantwa.

²⁶ Ha mutena uyo, mukalomba kukwendi mu lizina lyami, kaliha ngayi ami nikamilombela kuli Tate,

²⁷ ndaba Tate niye mwine wamihaka. Unamihaka ndaba enu munahaka ami, kami mwakulupili ngayi nafuma kuli Nyambi.

²⁸ Nafumine kuli Tate, pe nezile mu kaye, kami nikushiya kaye, pe nikaboka kuli Tate.”

²⁹ Bandongesha bendi bambile kukwendi ngayi, “Wuluno ulinakwamba shintwantwa, kwamba na zinguli wufwako.

³⁰ Wuluno tunalimuku ngayi obe ukulimuka byuma nimwabyo, pe kaliha shinafwanini ngayi muntu akwipule mayipu, ndaba yanebye, tukukulupila ngayi wafuma kuli Nyambi.”

³¹ Yeshu wabakumbwile ngayi, “Wuluno munakulupili ndi?

³² Shikati shikeza, kami shakumakale oho mukapanzana, muntu na muntu ukaya kukwabo, pe mukanciya ninkayami. Ngoboni kukekala ninkayami nifwako, ndaba Tate uli nanami.

³³ Ninamba kukwenu ebye ngayi mwikale mu kumwena hakwikala mumwami. Mu kaye mukekala na makalikiza, ngoboni kancenu, ndaba nakomakale kaye!”