Yowano 15 - Kulimama Kwakupya

Yeshu niye Mukolobozi Wakupwisha wa Shinyanca

¹ Ami mukolobozi wakupwisha wa shinyanca kami Tate niye ndimi.

² Mwahi nimwawo uli mumwami wakubula kuyima mikabo, ukauketula, pe mwahi nimwawo wakubula kuyima mikabo, ukauketula, ngayi uyime mikabo yayingi.

³ Enu mwayeleshiwakale, na lizu elye ninamba kukwenu.

⁴ Ikalenu mumwami, nanami nikekala mumwenu. Mwahi kutwesha kuyima mikabo ninkayawo wufwako, ndele wikale ku mukolobozi wa shinyanca. Nanenu kami, kutwesha kuyima mikabo ninkayenu mufwako, ndele mwikale mumwami.

⁵ “Ami nili mukolobozi wa shinyanca, enu muli myahi. Ndi muntu ukwikala mumwami, nanami nikekala mumwendi, pe ukayima mikabo yayingi. Ndaba kwakubula ami, enu kutwesha kutenda shuma shimo mufwako.

⁶ Ndi muntu kwikala mumwami wufwako, ukuyumbiwa hamunkanda ngonehe mwahi ukuyumbiwa pe hiukuyuma. Myahi ya noho bantu bayikungulanga nakuyiyumbila mu mundilo, pe yahokeshiwanga.

⁷ Ndi mukwikala mumwami, na mazu ami akwikala mumwenu, nyepenu ebye nimwabyo mukushinga, pe bikatendiwa kukwenu.

⁸ Wuwahe wa Tate ukumoneka ndi mukuyima mikabo yayingi. Hakutenda ebye mukumonesha ngayi muli bandongesha bami.

⁹ “Ngonehe Tate anahaka ami, nanami kami namihaka. Haya ikalenu mu shishemo shami.

¹⁰ Ndi mukwombatala ndayano zami, mukekala mushishemo shami. Nehe ninombatala ndayano za Tate, ninekala mushishemo shendi.

¹¹ “Byuma ebye ninamba kukwenu, ngayi kuwahilila kwami kwikale mumwenu, mwanga kuwahilila kwenu kwinzalishiwe.

¹² Eze nizo ndayano zami, lihakenu umo nawamina ngonehe ami ninamihaka.

¹³ Kuhaka kwakunene muntu anafwanini kwikala nako ku bahoni bendi, kunengi kupana wumi wendi kukwabo.

¹⁴ Enu muli bahoni bami ndi mukutenda ndayano zami.

¹⁵ Kumitoya ngayi bakamilimo nifwako, ndaba mukamilimo kulimuka ebye akutenda hekulyendi wufwako. Ngoboni nikumitoya ngayi bahoni, ndaba namitongweze byuma nimwabyo ninayuvwu kuli Tate.

¹⁶ Kaliha enu mwahatile ami, ngoboni ami namihatile. Namiyinikile ngayi muye na kuyima mikabo, mikabo iya yikekalilila. Pe nimwabyo mukunyepa kuli Tate mu lizina lyami, ukumipanikabyo.

¹⁷ Eze nizo ndayano zami, lihakenu umo nawamina.”

Nzimbo ya mu kaye

¹⁸ Ndi bakakaye bakamizimba, limukenu ngayi batatikile kuzimba ami.

¹⁹ Shinga enu muli bakakaye, shinga kaye kakumihaka ndaba ngayi muli bakakaye. Ngoboni ninamihata muno mu kaye, enu kaliha muli bakakaye, nibyo bakumizimbila bakakaye.

²⁰ Anukenu lizu nambile kukwenu ngayi, ‘Mukamulimo kupitakana hekulyendi wufwako.’ Ndi banyandishile, nanenu kami bakamiyandisha. Shinga ngayi balamine mazu wami, shinga kami bakalama mazu wenu.

²¹ Ngoboni bakatenda byuma ebye nimwabyo kukwenu ndaba muli bami, ndaba kulimuka ou wantumine bafwako.

²² Shinga nabulile kwiza nakwamba kukwabo, shinga kukekala na wubi bafwako. Ngoboni wuluno, kowa omu bakutweshela kukananganina wubi wabo.

²³ Muntu ukunzimba, ukuzimba kami na Tate.

²⁴ Shinga ami kaliha natenda milimo mukati kabo iya yabulile kutendiwa ku muntu, shinga wubi bafwawo. Ngoboni wuluno banalimonene ebye ninatende, kami banatuzimbi ami na Tate.

²⁵ Ngoboni kunatendiwi byatikitiwile mu ndayano zabo ngayi, ‘Banzimbile hakubula mulandu.’

²⁶ “Ngoboni oho Mukakubela ou nikatuma akeza kukwenu kufuma kuli Tate, niye Moyo wakupwisha ukafuma kuli Tate, niye ukapaka byami.

²⁷ Nanenu kami mukapaka byami, ndaba mwekalile nanami kufuma ku kutatika.