Yowano 10 - Kulimama Kwakupya

Nguli ya mulishani

¹ Yeshu wambile ngayi, “Mwashikuma nikumitongweza ngayi, muntu ou ukubula kwingina mu mulaka na shipana, ngoboni hakukandama na nzila yashenge, nengi mwizi na mukakupukula.

² Ngoboni ou kwingina na shipana niye mulishani wa bambelele.

³ Mukakulama ukumushinkwilila ku shipana, kami bambelele bakuyuvwa lizu lyendi. Ukwihana bambelele bendi na mazina wabo, kami ukubatutwisha.

⁴ Oho watutwishakale bambelele bendi nimwabo, ukuya kumbili yabo, pe bambelele bakumukonka ndaba bakulimuka lizu lyendi.

⁵ Kukonka muyeni bafwako, ngoboni bakatina kukwendi, ndaba kulimuka lizu lya muyeni bafwako.”

⁶ Yeshu wabatongwezele eye nguli, ngoboni kaliha bayuvwishile ebye ambile kukwabo.

Yeshu niye Mulishani Wamuwahe

⁷ Niho Yeshu ambile kukwabo kami ngayi, “Mwashikuma nikwamba kukwenu ngayi, ami shipana sha bambelele.

⁸ Nimwabo baya bezile kumbili yami bengile bezi na bakakupukula, ngoboni bambelele kaliha babayuvwile.

⁹ Ami nili shipana. Muntu nimwendi ukwinginina mumwami ukapuluka. Ukengina na kututika, ukawana kwakubuyila.

¹⁰ Mwizi wezanga tuhu na kuyiba na kuziha na kunongesha. Amiboni nezi ngayi bekale na wumi, bekale nawo wawingi.

¹¹ “Ami mulishani wamuwahe. Mulishani wamuwahe ukufwa ndaba ya bambelele.

¹² Ngoboni mukamulimo wa ndando, kaliha niye mulishani mwine bambelele, nohobene ndi ukumona mbinzi heza, ukushiya bambelele na kwituka. Mbinzi ukulwisha litanga, pe ukupanzanisha bambelele.

¹³ Mukamulimo wa ndando ukwituka ndaba nengi wa ndando, kulama bambelele wufwako.

¹⁴ Ami nili mulishani wamuwahe, nikulimuka bambelele bami, kami bambelele bami bakundimuka.

¹⁵ Nehi Tate akundimuka, nami kami nikulimuka Tate, pe nikufwa ndaba ya bambelele.

¹⁶ Nili na bambelele bashenge baya babula kwinga ba nou mulaka, nanibo kami nikufwanina kubaleta, bakayuvwa lizu lyami, pe bakenga litanga limo na mulishani umo.

¹⁷ “Tate ukuhaka ndaba nikupana wumi wami ngayi niwutambule kami.

¹⁸ Kowa muntu ukunyangula wumi, ngoboni nikuwutula mu shifungo shami. Nili na ngovu za kuwutula na za kuwubwesha kami. Nizo ndayano natambulu kuli Tate.”

¹⁹ Kwekalile kami kulitapa mukati ka Bayunda, ndaba ya mazu awa.

²⁰ Babengi mukati kabo bambile ngayi, “Uli na mayimbwe, kami napempele. Shumangani mukumuyuvwilila?”

²¹ Bamina bambile ngayi, “Mazu awa akwamba kaliha mazu a muntu wa mayimbwe. Mayimbwe akutwesha kutonesha meho a tushishitwa ndi?

Yeshu ukukaniwa

²² Shengile shikati sha mupepo oho kwekalile Shimbo Shakuzilika Litala lya Nyambi mu Yelushalema.

²³ Yeshu wendelenga mu Litala lya Nyambi, mu mazezelo a Sholomoni.

²⁴ Niho Bayunda bakungulukilile kukwendi, pe bambile ngayi, “Shikati shakukuma hati ukatushiya mu wulube? Ndi obe Kilishitu tutongweze shintwantwa.”

²⁵ Yeshu wabakumbwile ngayi, “Namitongwezele, ngoboni mwabulile kukulupila. Milimo eye nikutenda mu lizina lya Tate niyo yikumpaka,

²⁶ ngoboni kukulupila mufwako, ndaba kaliha muli bambelele bami.

²⁷ Bambelele bami bakuyuvwa lizu lyami, nikubalimuka, kami bakunkonka.

²⁸ Nikubapana wumi wa mwayile myaka, pe kukanonga bafwako. Kowa muntu ukabafumisha mu liboko lyami.

²⁹ Tate ou wabampanine ukupitakana nimwabyo, kowa muntu ukutwesha kubafumisha mu liboko lya Tate.

³⁰ Ami na Tate twenga umo.”

³¹ Niho Bayunda kami batolele mamanya ngayi bamupuhe.

³² Yeshu wambile ngayi, “Namimoneshe milimo yayingi yayiwahe ya kuli Tate, haya mukumpuhila mamanya mulimo wuti?”

³³ Bayunda bamukumbwile ngayi, “Kaliha tukukupuhila mamanya ha mulimo wawuwahe unatende, ngoboni ndaba ya lihandu lyobe. Obe uli muntu tuhu, ngoboni ulinakwamba ngayi uli Nyambi!”

³⁴ Yeshu wabakumbwile ngayi, “Kwatikitiwile mu ndayano zenu ngayi Nyambi wambile ngayi, ‘Muli banyambi?’

³⁵ Tukulimuka ngayi byatikitiwa byenga byakupwisha mwayile myaka. Nyambi watumbile baya bantu apanine lizu lyendi ngayi banyambi,

³⁶ haya mukwamba nahiti kukwendi ou ahatile Tate na kumutuma mu kaye ngayi ulinakuhandula? Haya mukumpana nahiti mulandu ngayi nilinakuhandula hakwamba ngayi, ‘Nili Mwana Nyambi?’

³⁷ Hinga munkulupila ndi nikubula kutenda milimo eye akushinga Tate ngayi niyitende.

³⁸ Ngoboni ndi nikuyitenda, hinge munabulu kunkulupila, kulupilenu milimo ngayi mwanga mulimuke na kukulupila ngayi Tate uli mumwami nanami nili mumwendi.”

³⁹ Nohobene bashingile kami kumukwata, ngoboni wapohomokele mu maboko wabo.

⁴⁰ Yeshu wayile kami munciza ya Yondana kuya azubilishilenga Yowano ha kutatika, niko akekalile.

⁴¹ Bantu babengi bayile kukwendi, pe bambile ngayi, “Yowano kaliha watendele bikomokesho, ngoboni byuma nimwabyo biya ambile Yowano ha nou muntu, binengi byakupwisha.”

⁴² Pe bantu babengi kuyo bakulupilile mumwendi.