Yowano 1 - Kulimama Kwakupya

Lizu lya wumi

¹ Ha kutatika kwekalile Lizu, Lizu lyekalile hamo na Nyambi na Lizu lyengile Nyambi.

² Lizu lyekalile na Nyambi ha kutatika.

³ Nyambi walengele byuma nimwabyo kupitila mumwendi, kowa shuma shimo shalengiwile kwakubula niye.

⁴ Mumwendi mwekalile wumi kami uya wumi wengile lumuni lwa bantu.

⁵ Lumuni lwamunikanga mu mincimpwe, kami mincimpwe kutwesha kuluzima yifwako.

⁶ Nyambi watumine ntumwana wendi, lizina lyendi Yowano.

⁷ Niye wezile mukwinga paki, kupaka bya lumuni, ngayi bantu nimwabo bakulupile ndaba ya wupaki wendi.

⁸ Kaliha wengile lumuni, ngoboni wezile mukupaka bya lumuni.

⁹ Olwe nilwo lumuni lwakupwisha, luya lukeza mu kaye na kumunika ku bantu nimwabo.

¹⁰ Lizu lyekalile mu kaye, hinge ndi Nyambi walengele byuma nimwabyo kupitila mumwendi, ngoboni bakakaye kaliha bamulimukile.

¹¹ Wezile ku litunga lyendi, ngoboni bawushinda wendi kaliha bamutambwile.

¹² Ngoboni kunimwabo bamutambwile, baya bakulupilile mu lizina lyendi, wabapanikile ngovu ngayi benge bana ba Nyambi.

¹³ Kaliha bengile bana ba Nyambi na kuhemuwa ku mukeza, hinge na shifungo sha lutu, hinge na shifungo sha muntu, ngoboni na shifungo sha Nyambi.

¹⁴ Lizu lyafutukile muntu, wekalile mukatiketu, wenzalile na nceshe na kupwisha. Twamonene wuwahe wendi, wuwahe ou atambwile hakwinga Mwana umo tuhu wa Tate.

¹⁵ Yowano wapakile byendi. Wabilikizile ngayi, “Niye uya natoyele oho nambile ngayi, ‘Ou ukwiza munyima yami unampitakana, ndaba niye wekalileko oho ami shilolo nihemuwe.’ ”

¹⁶ Ku nceshe zendi zakwinzala, nimwetu tunatambulu mfuywezi za kulishiyashiya.

¹⁷ Nyambi wapanikile Ndayano kupitila muli Moshesha, ngoboni nceshe na kupwisha binezi na Yeshu Kilishitu.

¹⁸ Kowa muntu wamona Nyambi, ngoboni Mwanendi umo pele ou walifweka na Nyambi, ou uli mu kapumpo ka Tatiyendi, niye wunamutontololo.

Wupaki wa Yowano Mukakuzubilisha

¹⁹ Ebye nibyo apakile Yowano oho bakulwane ba Bayunda ba mu Yelushalema batumine bakankombela na Balevi* na kwipula Yowano ngayi, “Kati obe yani?”

²⁰ Yowano kaliha wakanine kukumbula, ngoboni wambile shiwahe ngayi, “Kaliha ami Kilishitu.”

²¹ Bamwipwile kami ngayi, “Pe obe yani? Kati obe Eliya ndi?” Yowano wakumbwile ngayi, “Kaliha ami Eliya.” Bamwipile kami ngayi, “Kati obe Muluwe ndi?” Yowano wakumbwile ngayi, “Byo.”

²² Niho bambile kukwendi ngayi, “Obe yani? Tutongweze ngayi netu tukatongweze aba banatutumu. Kati ukulitoya ngayi obe yani?”

²³ Yowano wakumbwile ngonehe ambile muluwe Ishaya ngayi, “Ami lizu lya mukakubilika mulibelelengwa ngayi, ‘Ololenu nzila ya Mwene.’ ”

²⁴ Baya bantumwana bafumine ku Bafwalishi,

²⁵ niho bepwile Yowano ngayi, “Ndabangani ukuzubilisha, ndi obe kaliha uli Kilishitu hinge Eliya hinge muluwe?”

²⁶ Yowano wakumbwile ngayi, “Nikuzubilisha na mema, ngoboni mukatikenu muli ou mukubula kulimuka.

²⁷ Niye ou ukwiza munyima yami, ami kufwanina kushobola mishulo ya makatulo wendi nifwako.”

²⁸ Nimwabyo ebye byatendiwile mu Mbetani munciza ya Yondana, oku Yowano azubilishilenga.

Mwana Mbelele wa Nyambi

²⁹ Mutena wakulundamina, Yowano wamonene Yeshu heza kukwendi, pe wambile ngayi, “Monenu, Mwana Mbelele wa Nyambi ou ukufumisha wubi wa bakakaye!

³⁰ Niye ou natoyele ngayi, ‘Munyima yami mukwiza muntu wamunene kumpitakana, ndaba wekalileko oho shilolo nihemuwe.’

³¹ Nanami kaliha namulimukile, ngoboni ninezi na kuzubilisha na mema, ngayi Baishalela bamulimuke.”

³² Yowano wapakile ngayi, “Namonene Moyo wa Nyambi hiwushulumuka hahendi ngonehe litela kufuma kuyilu.

³³ Hinge noho kaliha namulimukile, ngoboni ou wantumine mukuzubilisha na mema, wambile kukwami ngayi, ‘Ukamona Moyo Wakuyela hiwushulumuka na kwikala ha muntu, niye uya ukazubilisha na Moyo Wakuyela.’

³⁴ Ninamono, niho nikumitongweza ngayi niye Mwana Nyambi.”

Bandongesha ba Yeshu ba muntanzi

³⁵ Ha mutena wakulundamina, Yowano kami wemanine kuyo na bandongesha bendi babili.

³⁶ Oho amonene Yeshu henda, wambile ngayi, “Monenu, Mwana Mbelele wa Nyambi!”

³⁷ Bandongesha bendi babili bayuvwile ebye ambile, pe bakonkele Yeshu.

³⁸ Yeshu oho ashetukile, wamonene ngayi balinakumukonka, niho abepwile ngayi, “Mukushinga bishini?” Bambile kukwendi ngayi, “Labi, wekalanga kuti?” (Labi, kununguluka ngayi Mulongeshi.)

³⁹ Yeshu wakumbwile ngayi, “Yekenu mumone.” Niho bayile nendi. Shengile shikati sha wulikumi na mutanu na shimo. Bakamonene oku ekalilenga, pe bonzele nendi mutena uyo.

⁴⁰ Anduleu mukonzo wa Shimoni Pita wengile umo wa babili baya bayuvwile ebye ambile Yowano, pe wakonkele Yeshu.

⁴¹ Ha kutatika wawanine yayiyendi Shimoni, pe wamutongwezele ngayi, “Tunawana Meshiya.” (Elye lizina lya Meshiya likununguluka ngayi Kilishitu.)

⁴² Wamuletele kuli Yeshu. Oho Yeshu amutilaminine wambile ngayi, “Obe Shimoni mwana Yowano, ngoboni ukatumbiwa ngayi Kefwashi.” (Elye lizina likununguluka ngayi Pita, kutontolola ngayi, “Limanya.”)

Yeshu ukwihana Fwilipu na Natanele

⁴³ Ha mutena wakulundamina, Yeshu wahanganikile bya kuya ku Ngalileya. Wawanine Fwilipu, pe wambile kukwendi ngayi, “Nkonke!”

⁴⁴ Fwilipu wengile wa ku Mbeteshayinda, ku munzi wa Anduleu na Pita.

⁴⁵ Fwilipu wawanine Natanele niho amutongwezele ngayi, “Tunawana ou Moshesha atikitile byendi mu libuka lya Ndayano, uya kami bamiluwe batikitile byendi. Niye Yeshu wa ku Nazaleta mwana Yoshefwa.”

⁴⁶ Natanele wamwipwile ngayi, “Kati ku Nazaleta kukutwesha kufuma shuma shashiwahe ndi?” Fwilipu wamukumbwile ngayi, “Yeka umone.”

⁴⁷ Oho Yeshu amonene Natanele heza kukwendi, wambile ngayi, “Monenu Kaishalela wakupwisha, mumwendi mowa mahalo!”

⁴⁸ Natanele wepwile ngayi, “Ukundimuka nahiti?” Yeshu wakumbwile ngayi, “Nakumona oho wekala munceto ya mutondo wa mukuyu, oho Fwilipu shilolo akwihane.”

⁴⁹ Natanele wambile ngayi, “Mulongeshi, uli Mwana Nyambi! Uli Mwene wa Ishalela!”

⁵⁰ Yeshu wambile ngayi, “Ukukulupila ndaba namba kukwobe ngayi nakumona munceto ya mutondo wa mukuyu ndi? Ukamona byuma byabinene byakupitakana ebye!”

⁵¹ Wambile kami ngayi, “Nikumitongweza kupwisha ngayi mukamona liyilu likashinkuluka, kami mangeloyi a Nyambi akakandama na kuhuluka hali Mwana Muntu.”