Yakoba 5 - Kulimama Kwakupya

Kushiwulula bakakuheta

¹ Tambako, enu bakakuheta, lilenu na kukaloka ndaba ya makalikiza akamishilukila.

² Wuheti wenu unabolo na bivwalo byenu binaliwi ku tunzembule.

³ Ngolinde yenu na shiliva inaliwi, ndala yayo ikenga paki kukwenu, ikalya nyama yenu ngo mundilo. Muna libungikili wuheti ha mitena ya kukotoka.

⁴ Monenu, mpashela ya bakakutendela banateze ku mafuba enu, niyo inaholekiwi kukwenu na kwongeza, ikubilikiza. Na kukuwela kwabo banateze kunakumu ku matu a Mwene Mpandashilanga.

⁵ Munayoyo mu myelembo ha litunga na kukeyuka. Munanunishi mitima yenu ngo ha mutena wa kuziha.

⁶ Munayata na kuziha bakakwoloka na nibo kumikana bafwako.

⁷ Nohobene, bawushinda wami, ingenu ba lunzewe kuleta ku kwiza kwa Mwene. Monenu, ndimi ukutatila mbuto ya ndando yayinene ya litunga, ukuyitatilila na lunzewe shikuma hantu atambule mvula wa shituwizi na likuhulahoke.

⁸ Enu kami ingenu ba lunzewe! Shumishenu mitima yenu ndaba kwiza kwa Mwene kuli hahepi.

⁹ Hinga mutongauka umo na wamina, bawushinda, kutina mukayatiwa. Monenu, mukakuyata ukwimana hambili ya shipana.

¹⁰ Bawushinda wami, hembwilizenu bamiluwe bashimikilile mu lizina lya Mwene na kuyanda makalikiza na lunzewe.

¹¹ Monenu, tukulaba ngayi aba bakuzumanana benga bakutandala. Munayuvwu ndaba ya lunzewe Yoba, munayuvwu biya Mwene apanikile Yoba ha kukotoka. Ndaba Mwene wenga wa shikeketima shikuma na nceshe.

¹² Ngoboni hayilu ya byuma nimwabyo, bawushinda, hinga mubeza, hinge na liyilu, hinge na litunga, hinge na mbeza zamina. Ngoboni, “Ingoi” yenu inge ingoi, hinge “Byo” yenu inge byo kutina muwila ku kuyata.

¹³ Ndi kwali wamina mukatikenu ukuyanda? Alombele. Ndi kwali wamina ukuwahilila? Embile nyimbo.

¹⁴ Ndi kwali wamina wakukola mukati kenu? Ehane bakulwane ba litengo bamulombelele na kumuwabisha na mazi mu lizina lya Mwene.

¹⁵ Pe malombelo a kukulupila aka pulwisha mukakukola na Mwene ukamupindula, kami ndi unatende wubi, ukayatiwila kukwendi.

¹⁶ Itabilenu wubi wenu umo ku wamina, mulilombele umo na wamina ngayi munyongomane. Malombelo akushungama akutukumina a muntu wakwoloka akuyavwa shikuma.

¹⁷ Eliya wengile muntu wa shihemwa ngo etu, na niye walombelele shikumakuma ngayi mvula hinga aloka, kalokeleha ha litunga myaka yihatu na zingonda za mutanu na imo.

¹⁸ Kami walombelele na liyilu lyalokeshele mvula na litunga lyameneshele mbuto yalyo.

¹⁹ Bawushinda, ndi wamina kukwenu unashanuku kukupwisha, na umo ukumutengulula,

²⁰ alimuke ngayi niye ukutengulula mukawubi ku kushanuka kwa nzila yendi, ukapulwisha moyo ku kufwa na kufwika wubi wawingi.