Yakoba 3 - Kulimama Kwakupya

Lulimi

¹ Bawushinda wami, hinga mwinga balongeshi babengi, hinga mwa limuka ngayi tukatambula kuyata kwa kupitakana.

² Ndaba mu byuma byabingi tukupukala nimwetu. Ndi muntu wamina wufwako kupukala ku lizu, ou mukakulembuluka, ukutwesha kami kumanga lutu nimwalwo.

³ Monenu, tukuyaka lumingo mu tunwa twa zimbishi, ngayi zitwombatale, kami tukufutulula zinyutu zabo nimwazo.

⁴ Monenu kami bishepe, nibyo hinge byabinene, bikupepuka na mpepo ya yikali, bikufutuluka na lilenge lyalishelishe, oku akushinga mukakutwaminina.

⁵ Nahiyo kami lulimi lwenga shimamo shashishe, likulilundumika na byuma byabinene. Monenu, luhahi lwalushe lukubangiza lishaka lyalinenenene!

⁶ Na lulimi lwenga mundilo, litunga lya kutengama, lulimi lwenga noho mukati ka bimamo byetu, ngayi lukubipisha lutu nimwalwo na kubangiza nyendelo nimwayo! Nilwo lukubangiziwa ku ngehena.

⁷ Ndaba mushobo nimwawo wa tuyamana na tuyoni na mayoka na byuma bya mu liwate bikutambiwa ku bantu.

⁸ Ngoboni lulimi kowa muntu ukutwesha kulutambisha. Nilwo lwenga lingulunde wa mubi, lunenzala na wuhungu wa kufwa.

⁹ Tukulemesha nalwo Nyambi niye Tate, na nilwo tukutukanisha bantu, aba batendiwile mu shifwekesha sha Nyambi.

¹⁰ Mu kanwa kamo mukufuma maleema na matuka. Bawushinda wami, byuma ebye kaliha bikufwanina kwinga noho.

¹¹ Kati lishima likututwisha mema amawahe na mema akulula ha shibaka shimo ndi?

¹² Kati bawushinda wami, shitondo sha mukuyu shikutwesha kwima oliveta ndi? Hinga shinyanca shikutwesha kwima nkuyu ndi? Hinga lishima likutwesha kututwisha mema a mushele na mema a kubombola.

¹³ Yani mukangana na mukakanangatima hakati kenu? Shashiwahe amoneshe na nyendelo yayiwahe milimo yendi na kulilimbwilisha kwa ngana.

¹⁴ Ngoboni ndi muli na ntalu ya nkoko na nkani mu mitima yenu, hinga muliyemeza na kwongeza ku kupwisha.

¹⁵ Kukeya oku kukubula kushuluka kuyilu, ngoboni kwenga kwa litunga, kwa wuntu, kwa Shatana.

¹⁶ Ndaba oku kuli ntalu na nkani, oku kuli kufwilikanya na mulimo nimwawo wa wubi.

¹⁷ Ngoboni ngana zinafumu kuyilu zenga zakuyela ha kutatika, niho za kumwena, za kubomba, kaliha za kalimbwilisho, za shikeketima, na mbuto yayiwahe, zakubula shihota, zakubula shishweka.

¹⁸ Mbuto yakwoloka ikukubiwa mu kumwena kukwabo bakutenda kumwena.